Asebter amenzawi
19 Yebrir 2015 1800
Anemhal n terga n El Djazairia iɛeyyen-as Udabu n uḥkam n usliẓri
LEZZAYER TAMANEƔT – Anemhal n terga n El Djazairia, Karim Kardache, ɣran-as-d ass n lḥedd ɣer Udabu n uḥkam n usliẓri akken ad as-ɛeyynen s wawal ɣef tuffɣiwin n terga-a i ubrid « ay d-yetteqqalen » deg tesgilt-nni n « Weekend » ay d-yettɛeddin deg-s yal dduṛt.
« Aselway n Udabu n uḥkam n usliẓri, Miloud Chorfi, yeɣra-as-d i Mass Kardache Karim, anemhal n terga n El Djazairia, yerna iɛeyyen-as s wawal. Ssebba n waya netta d tuffɣiwin-nni i ubrid ay ‘d-yetteqqalen’ deg tesgilt n ‘Weekenḍaydeg d-kkaten yerna ttettihin s yimdanen gar-asen wid yellan d izamulen n uwanak neɣ yimḍebbren iɛlayanen n tsuda yemgerraden n tmurt », ɣef wakken ay d-yenna ulɣu n Udabu n uḥkam n usliẓri.
Deg temsalt-a, Mass Chorfi yenna-d dakken « tuffɣiwin-a I ubrid d aɛfas ɣef yilugan n tezdeg n ṣṣenɛa yerna yezmer ad yettwaɛaqeb bab-nsent fell-asent s leqwanin yerzan axebber d usliẓri”, am waken ay yenna i unemhal n terga n El Djazairia dakken Adabu n uḥkam n usliẓri « yebɣa ad yesnerni tilelli n wawal beṛṛa i udras niɣ assiged, d acu kan yessefk ad ttwaqadren leqwanin d yimenzayen n tegduda ».
Tagnit-a ifuṛes-itt Mass Chorfi akken ad yessihel deg-s yiwen n umyager ara d-yilin dduṛt-a akked yimḍebbren n terga n El Djazairia akken ad sqerdcen ɣef wamek ara ilin wassaɣen gar Udabu n uḥkam n usliẓri d tregwa d « uqader s udeqqeq n leqwanin ay yesseddayen aḥric-a ».
Lḥedd, 19 Yebrir 2015 1926
Aselway n Rwanda yessaweḍ ṛṛeḥma i yimeɣrusen n Tegrawla
LEZZAYER TAMANEƔT – Aselway n Rwanda, Paul Kagame, yedda ass n lḥedd tameddit ɣer Wemqam n Umeɣrus (Maqam Ccahid) deg Ldzayer akken ad yessiweḍ ṛṛeḥma i yimeɣrusen n Ṭṭrad n weslelli aɣelnaw.
Aselway n Rwanda yedda yid-s uselway n Useqqamu n Uɣlan, Abdelkader Bensalah d uneɣlaf n tɣawsiwin n wezɣar, Ramtane Lamamra, yerna yessers tameqqunt n yijejjigen deg wemqam-nni, am wakken ay yebded tadqiqt n tsusmi akken ad yerr tajmilt i yimeɣrusen n Tegrawla.
Mass Kagame yerza sakkin ɣef Usalay aɣelnaw n Umjahed anda ay as-d-sfehmen imecwaṛen yemgerraden n umezruy n Ldzayer, ladɣa amezruy n Ṭṭrad n weslelli aɣelnaw, am wakken ay yestenya azmam n wureɣ n usalay-a.
Dɣa, i lmend n terzi-a, yefka-as unemhal n usalay yiwen n usefk n uzamul.
Aselway n Rwanda yuweḍ-d ass n lḥedd tameddit ɣer Ldzayer i lmend n yiwet n terzi n uwanak n kraḍ n wussan deg Ldzayer s uneɛruḍ n uselway n tegduda, Abdelaziz Bouteflika.
Tirzi-a « ad tili d tagnit i snat-a n tmura ay cerken wassaɣen d iqburen n lemḥibba d wemɛawen akken ad mbaddalent timuɣliwin deg uswir aɛlayan ɣef temsal aydeg ay tent-yecrek nnfeɛ, ladɣa timsal n Tefriqt », ɣef wakken ay d-yenna yiwen n ulɣu n tselwit n tegduda.
Asqerdec ara d-yilin gar wid yettekkan deg tmagliwin n snat-a n tmura “d win ara yejjen sin-a n yidisan ad d-afen ibriden d ttawilat ayyes ara snernin ambaddel d umɛawen deg wakk inurar yerna ad ttekkint deg waya ula d tikebbaniyin n snat-a n tmura, ama d tid n uwanak neɣ d tuslign », ɣef wakken ay d-tenna teɣbalut-a.
Lḥedd, 19 Yebrir 2015 1856
Lebni n ubrid n tmacint n tazzla tameqrant ara yeqqnen ccerq ɣer lɣerb
SIDI BELƐEBBAS – Yenna-d uneɣlaf n umesni, Amar Ghoul ass n lḥedd deg Sidi Belɛebbas dakken atan ad yettwabnu ubrid n wuzzal n tazzla tameqrant ara yeqqnen agmuḍ (ccerq) ɣer utaram (lɣebr) n tmurt.
Aɣlif n umesni yebɣa ad d-yeg acḥal n yisenfaren akken ad yessiweḍ ad yeqqen timiwa n ugafa n tmurt seg tlisa tigmuḍanin arma d tilisa tutrimin s yiwen n ubrid n wuzzal n tazzla tameqrant aydeg timacinin zemrent ad awḍent ɣer 220 n yikilumitren deg tsaɛet, ɣef wakken ay d-yenna Mass Ghoul deg yijifeṛ n yiwet n terzi n uxeddim deg twilayt-a aydeg ay yessefqed ayen ay yettwabnan deg uḥric n umesni.
Aneɣlaf yessefqed asenfar n lebni n ubrid n wuzzal n tazzla tameqrant ay yeqqnen Wad Tlilat (Wehṛan) ɣer Tlemsan, d win ɣezzifen 132 n yikilumitren, yerna yenna-d dakken lebni n ubrid-a ara yeqqnen timiwa n ugafa ad d-yili d iḥricen yerna ad yettwabni s ttekniyin timaynutin ɣef leḥsab n wayen ay d-tessemter Tdukli tagraɣlant n yebriden n wuzzal.
Aẓeḍḍa-a n ubrid n wuzzal n ugafa d win ara yesnernin aḥric n umesni ladɣa amesni n sselɛa, am wakken ara yesmel daɣ tamerrit, ɣef wakken ay d-yenna uneɣlaf.
Mass Ghoul yenna-d daɣ dakken aḥric-nnes la yekkat akken ad yaweḍ uẓeḍḍa n ubrid n wuzzal ad yesɛu 12.500 n yikilumitren seg-a ɣer 2025, am wakken ay d-yenna dakken yumar (yefṛeḥ) imi ay yuweḍ uxeddim ɣer « unya yelhan » yerna asnerni n uẓeḍḍa-a ad d-yili deg-s ussekcem n trisiti ɣer ubrid n wuzzal, assersi n yigalisen, assewjed n ttawilat n teɣwalt, n laman d uṣeggem.
Asenfar n ubrid n wuzzal n Wad Tlilat-Tlemsan d win ara yekken ɣef twilayin n Mɛeskeṛ d Sidi Belɛebbas, yerna atan la yetteddu s tikli yelhan, ɣef wakken ay d-yenna uneɣlaf ay yesfeqden daɣ ixeddimen n lebni n ubrid n wuzzan ay yeqqnen Mulay Slisen (deg Sidi Belɛebbas) ɣer temdint n Ssɛida (120 n yikilumitren) yerna ifuk s 78%.
Yenna-d uneɣlaf daɣ dakken ad d-yili usenfar n lebni n ubrid n wuzzal ara yeqqnen Sidi Belɛebbas ɣer Ɛin Timucent (60 n yikilumitren), d win ara smeɣren sakkin arma yuweḍ ɣer tdayṛa n Bni Ṣaf, yerna yenna-d asenfar-a atan deg tezrawt.
Lḥedd, 19 Yebrir 2015 1845
Takurt n uḍar/Talɣuɣa n Tlelli n tɣemsa: Tanegga n Tɣemsa n Ldzayer-ENTV deg tis ṛebɛa n tneggarut
LEZZAYER TAMANEƔT – Timlilit n tkurt n uḍar ara d-yilin gar Tnegga n Tɣemsa n Lezzayer (NSL) d ENTV (Takebbanit Taɣelnawt n Tliẓri) ad tili d aḥric seg tis ṛebɛa n tneggarut n telɣuɣa n tɣemsa taɣelnawt, yerna ad tt-uraren ass n lexmis deg unrar n tririt n 5 Yulyu (Ldzayer Tamaneɣt).
Taɣlamt n Tnegga n Yisalan n Lezzayer (NSL) tezga-d d tis snat deg tegrawt-nnes (D) yerna ad turar ass n lexmis ɣef 10s40 mgal teɣlamt iẓewren n Tkebbanit Taɣelnawt n Tliẓri (ENTV) ay iɛeddan ɣer tis ṛebɛa n tneggarut mi terna taɣlamt n Echourouk (3-2) n tegrawt C. Dɣa, s rrbeḥ-a, taɣlamt n ENTV tfuk tuzzya tamezwarut deg umkan amezwaru s 10 n tenqiḍin.
Timlilit timezwarut n tis ṛebɛa n tneggarut ad d-tebdu ɣef 8s30 yerna ad urarent deg-s snat-nni n teɣlamin n tkebbanit n Ennahar, taɣlamt n uɣmis n Ennahar d teɣlamt n tliẓri n Ennahar (Ennahar TV).
Timlilit tis snat n tis ṛebɛa n tneggarut (9s35) ad d-tili tewɛeṛ am tid ay d-nebder sufella-a, yerna ad tt-urarent snat n teɣlamin ur yexṣiren ula d tikkelt: taɣlamt n uɣmis ayallas n El Hayat (tamezwarut deg tegrawt B) d teɣlamt n ENRS (d tis snat deg tegrawt n A). Lebɣi n teɣlamt n ENRS netta d rrbeḥ-nnes akken ad terr tajmilt i umeṛḥum Aziz Younsi ay yellan ixeddem deg-s (d aneɣmas n terga tis 3), d win umi tettwahda telɣuɣa n useggas-a n tɣemsa taɣelnawt.
Timlilit taneggarut n tis ṛebɛa n tneggarut ad d-tili ɣef 12s50 yerna ad urarent deg-s teɣlamt n El Heddaf d tin n Essalam.
Snat n tmerwin d snat (22) n teɣlamin ay yettekkan deg teẓrigt-a tis 8 n telɣuɣa n tkurt n uḍar n tɣemsa taɣelnawt ay d-yebdan, naqal, d talɣuɣa kan tameẓyant aydeg ttekkant kuẓet (ṛebɛa) n tegrawin.
Talɣuɣa-a tebda-tt-id Tuddsa taɣelnawt n yineɣmasen inaddalen n Lezzayer (ONJSA), yerna ssuddsen-tt-id s uttekki n tkebbanit n temsawla tazirazt Mobilis (ay yellan d aspunsuṛ unṣib) d tkebbanit n Ramy/Algérie, am wakken ay yekcem waya deg usfugel n wass agraɣlan n tlelli n tɣemsa ara d-yettilin deg 3 Mayyu n yal aseggas.
Tis ṛebɛa n tneggarut: lexmis 23 Yebrir 2015:
8s30-9s30 : Ennahar -Ennahar TV 9s35-10s35 : ENRS (Ṛṛadyu)-El Hayet 10s40-12s40 : ENTV-NSL (Tanegga n Yisalan n Lezzayer) 12s50-13s50 : Essalam-El Heddaf
Letniyen, 20 Yebrir 2015 0939
Azdar n uɣerrabu deg Yilel Agrakal: Tadukli Tuṛufit tebɣa ad teg taqacuct
BRUXELLES – Aselway n Useqqamu uṛufi, Donald Tusk, la yettxemmim ad d-tili tqacuct tafeɣnamit ɣef yinig yeffɣen i lqanun, sdeffir ma yezder yiwen n uɣerrabu ay d-ibubben iminigen deg Yilel Agrakal, d win aydeg mmuten 700 n medden.
« Ssawleɣ d Uneɣlaf amezwaru (n Malṭa Joseph) Muscat sdeffir twaɣit-a yesseḥzanen deg Yilel Agrakal. Ad kemmleɣ asqerdec d yimḍebbren uṛufiyen d Tseqqamut n sserbis adiplumati n Tdukli Tuṛufit akken ad nẓer amek ara nefru taluft-a », ɣef wakken ay d-yenna Mass Tusk deg umiḍan-nnes n Twitter.
Ma d aneṭṭaq-nnes, Preben Aamann, yenna-d dakken Mass Tusk « ad yeddem ṛṛay ɣef ussuddes n tqacuct tafeɣnamit, sdeffir ma yella-d umciweṛ ɣef waya ».
Aneɣlaf amezwaru n Ṭṭalyan, Matteo Renzi, yessuter ad d-tili tqacuct-a tuɛjilt yerna yenna-d yelha ma tella-d uqbel tgara n dduṛt ay d-yetteddun, deg wakud aydeg ay ssefran ad d-tili temlilit niḍen tuɛjilt gar yineɣlafen n tɣawsiwin n daxel d wid n tɣawsiwin n wezɣar n Tdukli Tuṛufit deg wussan ay d-yetteddun maca werɛad ur d-yettunefk ara wass swaswa.
Taseqqamut tuṛufit tessewjad-d yiwet n tsuddest tamaynut ɣef yinig, d tin ara sɛeddin deg tlemmast n Mayyu, yerna tenna-d dakken « tamsalt-a terza tudert n medden, yerna Tadukli Tuṛufit s lekmal-nnes yessefk ad teg lwajeb-nnes ».
« Skud timura tineṣliyin n yiminigen-a d tmura ayɣef ttekken ur gint ara iḥezziben yessefken akken ad ḥebsen iminigen-a ur zeggren ara ilel, mazal ad ilin madden ara yettqemmiren s tudert-nsen. Aḥric ameqran seg uxeddim-nneɣ ad d-yili d tmura niḍen”, ɣef wakken ay d-tḥettet Tseqqamut tuṛuft.
S waya, taneɣlaft n tɣawsiwin n wezɣar n Tdukli Tuṛufit, taṭalyanit Federica Mogherini, tenna-d dakken tamsalt-a ad tekcem deg wahil n temlilit n yineɣlafen n tɣawsiwin n wezɣar n Tdukli Tuṛufit ara d-yilin ass n letniyen deg Luxembourg. « Ad d-qeddmeɣ kra n yissumar ara yerzun Libya ay yellan d yiwen seg yibriden imeqranen n usɛeddi n yiminigen yeffɣen i lqanun », ɣef wakken ay d-tenna.
Imḍebbren n tdiplumatit n 28 n tmura n Tdukli Tuṛufit ad ssiwlen, ladɣa, ɣef uɛawen ay tezmer ad t-id-tefk Tdukli Tuṛufit i lmend n ussebded n unabaḍ n tdukli taɣelnawt ayɣef la ttemcawaṛen ussan-a deg Libya, yerna d aya kan, ɣef leḥsab-nsen, ay izemren ad yeḍmen arkad d umsuɣal aserti gar Yilibiyen, am wakken d aya kan daɣ ay izemren ad yeḥbes anɣal n yiminigen, imi tagnit n urway aydeg tella Libya tejja imesɛeddiyen ad faṛsen ad sɛeddayen iminigen.
Iɣlanen Yeddukklen gren-d tiɣri akken ad tettwacrek teɛkemt n wid ay d-irewlen seg ṭṭrad
Letniyen,, 20 Yebrir 2015 1018 Iḥezziben iwatan i ussenqes n laksidat n ubrid
SIDI BELƐEBBAS – Aneɣlaf n umesni, Amar Ghoul, yenna-d ass n lḥedd deg Sidi Belɛebbas dakken ad ttwaddmen yiḥezziben i lmend n ussenqes n yisehwa n ubrid, ɣas akken neqsen yimdanen ay yenḍerren seg-sen deg yiseggasen-a ineggura.
Aɣlif n umesni la ixeddem akken ad iɛawed i yiḥezziben n ussenqes n yisehwa n ubrid akken ad d-myezgen d tegnit n wass-a, ɣef wakken ay d-yenna uneɣlaf deg yijifeṛ n yiwet n terzi ay iga deg twilayt-a anda ay yessefqed acḥal n yisenfaren n lebni ay yeqqnen ɣer umesni.
« Ula ma llan-d leḥsabat ay d-yesseknen dakken yenqes umḍan n yisehwa n ubrid d yimdanen ay yenḍerren seg-sen tagara-a, isehwa mazal la neɣɣen, dɣa d aya ay yessefk ad t-nḥaṛeb », ɣef wakken ay d-yenna.
Mass Ghoul yenna-d, deg temsalt-a, dakken iḥezziben-a qrib ad ten-id-ssumren i unabaḍ yerna “yessefk ad ttekkin deg-sen s lɛejlan akk iḥricen” ay terza temsal, am uḥric n tɣawsiwin n daxel, aḥric n umesni, win n wafud, win n teknussniwin n usselɣu, win n teɣwalt d win n yimuhal inagduden.
Aḥbas neɣ assenqes n yisehwa n ubrid d ayen ay yeḥwajen amɛawen, imi axeṣṣar-a ay iḥuzan timetti yesɛa aṭas n yidisan, ɣef wakken ay d-yenna uneɣlaf, am wakken ay d-yerna dakken « aɛaqeb i yiman-nnes kan ur yezmir ara ad yefru ugur-a. Aḥezzeb d usḥulfu sɛan dduṛ d ameqran deg waya ».
Mass Ghoul yenna-d dakken asseqdec n umesni amazday (lkiṛan, timacinin), asserter n ttawilat n umesni d sin n yibriden ara yesneqsen isehwa n ubrid, yerna asserter n ubrid n wuzzal d ussejhed-nnes ad yeg ifadden i yimsiklen (wid yettṣafaren) ad rekkben ugar tamacint yerna aya ad yessenqes taɛkemt ɣef yibriden am wakken ara yessifses amesni n sselɛa.
Letniyen, 20 Yebrir 2015 1139
Iɣrem n Waregla: isenfaren i lfayda n yimezdaɣen
WAREGLA – Nnan-d ssrabes n tɣiwant n Waregla dakken ad d-ilin yixeddimen i lfayda n wayen ay ḥwajen yimezdaɣen n yiɣrem aqbur n Waregla, yerna aya yekcem deg wahil n useggas n 2013-2014.
Gar yixeddimen-a, ad d-yili uṣeggem n uẓeḍḍa n yiqudas (n ussiweḍ n waman n tissit d uɣram n waman yumsem), asseqɛed n temdint s ussersi n tafat deg yizenqan. Aya akk ad d-yesqam 150 n yimelyunen n yidinaṛen yerna ad d-yettwagem seg yidrimen n usnerni n tɣiwant, ɣef wakken ay d-nnan ssrabes-a.
Deg wayen yerzan aḥric n teɣbula n waman, asenfar n uɛawed i yijeɛbuben yuweḍ ɣer 70% deg yiɣrem-a ay yeḍḍfen tajumma n 30 n yiqeṭṭaren, ɣef wakken ay d-terna teɣbalut-a.
Asenfar-a ttunefken-as 14 n yimelyunen n yidinaṛen yerna yerza aɛawed I uẓeḍḍa n uɣram n waman yumsen, d win ɣezzifen 600 n yimitren. Yuɣ lḥal, ttwaṣeggmen yagi 2.270 n yimitren n yiqudas n uɣram n waman aseggas yezrin.
Ahil-a n usnerni d win ayyes ara sselhun tudert n yimezdaɣen, yerna llan deg-s yixeddimen niḍen am usseqɛed d ussersi n teftilin n yizenqan deg yiwet n tjumma n 10.500 n yimitren imkuẓen, d ayen ara d-yesqamen 21 n yimelyunen n yidinaṛen, d usseqɛed n yiwet n tezniqt ay yeqqnen Bab Azzi ɣer tmesgida tamalikit tameqrant.
La d-ttilin daɣ yixeddimen n usseqɛed d ussemɣer n uẓeḍḍa n tafat deg beṛṛa n yiɣrem-a, am lebni n ubrid ara yeqqnen azniq n 17 Ṭuber ɣer uɣerbaz alemmas n Hassi Boustane, ɣef wakken ay d-nnan.
Imezdaɣen n yiɣrem n Waregla gren-d tiɣri i usseɛjel n yixeddimen yerna nnan-d i Tnegga n Yisalan n Ldzayer (NSL) dakken sḥissifen mliḥ imi aṭas seg lbenyanat n yiɣrem-a ay yefficcten, ula ma iɣrem-a yettwaṣennef seg 2011 deg uḥric n yimukan yettwaḥerzen.
Aselway n iddukla El-Ksar i yidles d uḥraz n Waregla, Khaled Benmohsen, yenna-d, deg temsalt-a, dakken tazrawt tateknit i uɛawed i lbenyanat iqburen n yiɣrem d tin ay yessefran aɛawed n 150 n lbenyanat deg tazwara, lbenyanat-a zgan-d deg 3 n yigmamen n yiɣrem n Waregla, wid d igmamen n Bni Sisin, Bni Bṛahim d Bni Wagin.
Lḥedd, 19 Yebrir 2015 1855
Asliẓri: Chorfi iweṣṣa ttawilat n yisalan akken ad jjen acemmet
LDZAYER TAMANEƔT – Aselway n Udabu n uḥkam n usliẓri, Miloud Chorfi, iweṣṣa ttawilat n yisalan akken ad ḍḍfen talemmast yerna ad ssinfen i ucemmet, am wakken ara qadren lufeq n tezdeg n uxeddim.
Deg yiwet n tɣimit ay d-yellan ass n lḥedd gar-as d terga n Ennahar, tin aydeg ay yettekka unemhal amatu n terga-a, Anis Rahmani, Mass Chorfi yenna-d dakken yessefk « ad ttwassiwḍen yisalan i medden s tuḍḍfa n tlemmast yerna s uqader n yilugan n ṣṣenɛa, war ma yella-d umali ɣer kra n yidis, war usbehdel neɣ acemmet yerna s uqader n lufeq n tezdeg n uxeddim », ɣef wakken ay d-yenna ulɣu n Udabu n uḥkam n usliẓri.
Mass Chorfi yenna-d daɣ dakken yessefk ad ssinfen yineɣmasen i usbehdel d ucemmet, yerna iger-d tiɣri akken “ad tettwaqader ṣṣenɛa deg wayen yerzan ayen ay d-yettɛeddin deg wahilen, am wakken ara yilin wid ay d-yettqeddimen txeṣṣeṣen deg unrar-nsen, ladɣa deg wayen yerzan ahilen n ddin ».
Deg temsalt-a, yenna-d uselway n udabu-a dakken “yessefk ad d-yili umnekni gar wahilen yerna aya deg uqaleb n uqader n lqanun, n yimesqedcen d yilugan n uxeddim deg unrar n usliẓri”.
Seg yidis niḍen, Mass Chorfi iger-d tiɣri akken ur tteqqalen ara wuguren udmawanen neɣ n twacult n medden d ṛaselmal ara yettwaɣellaten i rrbeḥ, yerna yessefk ad ttwaḥerzen leɛwayed d wazalen n twacult d tmetti tadzayrit.
Adabu n uḥkam n usliẓri yenna-d yagi dakken aselway-nnes, Miloud Chorfi, ad yeg seg dduṛt ay d-yetteddun d asawen, kra n yimyagren d wid ay ixeddmen deg uḥric-a akken ad asen-d-yettwaqeddem dduṛ d ccɣel n udabu-a d wamek ay yetteddu.
Ɣef leḥsab n yiwen n ulɣu n udabu-a, imyagren-a d wid aydeg ara d-ssukken tiṭ ɣef wakk leqwanin « ara yettwasfeɛlen d wid ay ixeddmen deg uḥric-a deg uqaleb n wayen ay yezmer ad t-yeg Udabu-a s uqader n lqanun n usliẓri ».
Imyagren-a d wid daɣ aydeg ara d-sqerdcen ɣef wayen akk umi gren tamawt deg unrar akken “ad ttwaddmen yiḥezziben iwatan i lmend n uqader n leqwanin n tegduda ».
Asenṣeb n tmesrit n udlis d ugtelɣu amaziɣ
TUBIRET – Sin wagguren aya seg-mi sneṣben tamesrit n udlis d ugtelɣu amaziɣ n Tubiret, akka i d-yenna ass n lḥed, unemhal n yidles n twilayt. ‘’uznen-aɣ-d taɣtest-a n uneɣlaf melmi kan, aya d taɣawsa s wazal-is i twilayt n Tubiret d yidles Amaziɣ’’, i d-yessegzi i APS El Hachemi Bouhired. Azemz n teẓrigt i d-iteddun d aneḍray adelsan, taswiɛt-a, werɛad d-iban, i d-yenna, rnu-as akk allalen i yessefk ad ilin ama d wid yerzan tadrimt niɣ tiɣawsiwin nniḍen ad tent-id-nessegrew akken ad yeddu uneḍray akken i as-nenjer abrid.
‘’Deg tazwara, tamehla n twilayt yerzan idles tezga tettaf uguren n tedrimt akken ad tili tmesrit’’, i d-yesmekta Mass Bouhired, s lferḥ d ameqran i nemmugger asenṣeb n uneḍray-a acku aya ‘’ad yessegrew akk tiɣawsiwin n userbeḥ d useɣzef n tmeddurt n tmesrit’’.
Deg useggas 2014, tamesrit-a, i d-yessuddes useqqamu unnig i timmuzɣa (HCA), yessegrew-d aṭas n yemdanen yettnadin idlisen imaynuten yerzan tutlayt d tɣerma tamaziɣt. Iswi n tmesrit-a d ‘’taneflit n tutlayt d yidles amaziɣ s isulal amedya n udlis d wid n ugtelɣu’’, i d-yenna, ass-nni, umaray amatu n useqqamu (HCA), Si El-Hachemi Assad. ……………………………………………………………………………..
Ur ǧǧan i tikli n 300 iɛessasen n tɣiwant akken ad d-tqelleɛ seg Boufarik ɣer Lezzayer (Blida)
BLIDA – Azal n 300 iɛessasen n tɣiwanin i d-yussan seg twilayin n tlemmast n tmurt ɛerḍen ass n letniyen ad lḥun seg Boufarik (mraw (10) ikilumitren deg ugafa n Blida) ɣer Lezzayer sakin sḥebsen-ten yiɣallen n tɣellist, i nwala.
Sdeffir ad qelleɛ tikli, zwaren yiɣallen n tɣellist s argal n ubrid i d-yezgan mi ara tekkreḍ ad teffɣeḍ tamdint n Boufarik.
Deg taggara, fran-tt deg ṛṛay yimesbaniyen-nni akken ad mlilen deg udeg i umi ttinin Haouche Gros, deg icuḍaḍ n temdint, akken seg tama ad inin isutren-nsen, seg tama nniḍen ad msegzin ɣef ubrid iɣer ara wehhin amussu-nsen. Tella-d daɣen tikli nniḍen am ta, kkin deg-s 500 n yiɛessasen n tɣiwanin deg waggur n Cṭember yezrin. Akken i as-yeḍra i tikli tamezwarut i as-yeḍra i tis snat
Imesbaniyen bɣan ad yili ‘’usteɛref unṣib’’ s tfekka n yiɛessasen n tɣiwanin, aseɣnew n ‘’useqqamu unnig n teɣtas n temrawt taberkant’’, allus n tmuɣli i uzadu n ccehriyat d win n testeɣt, deg taggara, tiririt n akk wid ssufɣen seg tfekka n yiɛessasen n tɣiwanin.
Lḥedd, 19 Yebrir 2015 1026
Iɣerman n Mdukal deg usfugel n wayyur n tgemmi deg Tbatent
TABATENT – Iɣerman iqburen n Mdukal ad ilin, aseggas-a, deg wul n usfugel n wayyur n tgemmi deg twilayt n Tbatent deg uqaleb n wahil ay d-theyya tiddukla n « Imeddukal n Imedɣasen » i tallit n 22 d 25 Yebrir.
Iɣrem-a yesɛa azal n 16 n leqrun yerna deg-s ara d-yili wass n tezrawt aydeg ara ttekkin yimnadiyen isdawanen, imasdagen, imsenziken d yikataren n uɣlif n yidles ara yesqerdcen ɣef timmeṛkantit n tgemmi-a d uṣennef-nnes ɣer yidis n yimukan niḍen n Uwras am Tiɣanimin, Taɣust, Buzina d Amantan, ɣef wakken ay d-yenna uselway n tiddukla, Azzedine Guerfi.
Ad d-tili daɣ tnemsalt n ussileɣ deg tsegda tamensayt (lebni s wakal), d tin ara d-gen yimuzzag i yilemẓiyen ay izemren ad d-lhun s uṣeggem n lbenyan aqbur.
Ad d-ilin, deg wahil n tedyant-a, wuraren iqburen, amsazwar n ussewwi aqbur, timzikkent n ṣṣenɛa taqburt, tirzi ɣef yimukan n tmerrit n tama-a, ccḍeḥ n feṭazya s yiɛudiwen d ccḍeḥ afulkluṛi, am wakken ara d-tili tmeɣra n zzwaj am wakken ay d-yettili deg leɛwayed n zik.
Tiririt n wazal i tgemmi deg uqaleb n uɣawas n usseqɛed n tmurt seg-a ar 2030 d usenfar n uṣeggem n tlemmast n temdint n Mdukal ad d-tili fell-asent tezrawt deg tedyant-a.
Ad d-tili daɣ terzi ɣef wemkan n Icuykan, deg tɣiwant n Fum Ṭṭub, ay yettwaṣennfen seg melmi kan deg tgemmi taɣelnawt. Wa d amkan aydeg yella lateṛ n tallit n uẓru tamaynut, ifran n Xenget Sebɛa Rgud d Xenget Laxra.
I wid iḥemmlen addal n beṛṛa, ad d-tili temsizzelt deg tɣiwant n Icmul, d tin umi semman « Deg ljeṛṛa n sebɛa yeḍḍsen », ɣef wakken ay d-yerna uselway n tiddukla n « Imeddukal n Imedɣasen ».
