Asebter amenzawi
Taluft n Mali: timetti n Mali twekked-d abdad-nnes ɣer yidis n Umtawa n talwit n Ldzayer
BAMAKO – Taqaɛet n tuddsiwin n tmetti taɣarimt n Mali, tin aydeg ddukklen wid ixeddmen deg ddin, tuddsiwin n tlawin d tiddukliwin n yilemẓiyen, twekked-d tikkelt niḍen, deg yiwen n umyager d ameqran ay d-yellan seg melmi kan deg Bamako, dakken attan tebded ɣer yidis n Umtawa n talwit d umsuɣal ay yettwawemmṛen deg umenzu n Meɣres yezrin deg Ldzayer Tamaneɣt.
Aṭas n medden ay iḥedṛen ɣer yidis n yimḍebbren isertiyen d tugniwin (ccexṣeyyat) yettwassnen deg tmiwa yemgerraden, yerna wid akk ay d-yessawlen deg umyager-a nnan-d dakken atni ɣer yidis n Umtawa n Ldzayer ara yettwastenyin deg 15 Mayu deg Bamako. « Wa d amtawa ara iḍemnen talwit d tɣellist [laman] deg tmurt n Mali ur ibeḍḍun ara », ɣef wakken ay d-nnan.
« Talwit d tɣellist deg Mali yellan d tamurt n tgadda [aɛdal] d teɣdemt tanmetti », « akken ma nella i tmurt n Mali yeddukklen, ur ibeḍḍun », « taqaɛet n tuddsiwin n tmetti taɣarimt n Mali, akken ma nella i tmurt n Mali yeddukklen, yeddren deg talwit » d kra seg yiberriḥen ay d-sbanen medden yettekkan deg umyager-a, ɣef wakken ay d-nnan ttawilat n yisalan.
« Aql-aɣ da ass-a i lmend n Mali, maci akken ad neg tasertit. Lemmer ad fehmen medden d acu-t umihi ayɣef la tettekk tmurt n Mali, asarir-a (amkan aydeg msegrawen) ur izemmer ara ad yawi akk lɣaci ara d-yasen ɣer da », ɣef wakken ay d-yenna yiwen seg wid umi yettunefk wawal.
Nnig waya, aṭas seg wid ay d-yessawlen nnan-d dakken amtawa n Ldzayer ad yerẓem abrid i unqas n lḥif ɣef yimezdaɣen. Dɣa deg temsalt-a, yenna-d uneɣlaf amenzu aqbur, Mohamed Ag Hamani, dakken amtawa-a d tagnit ay yessefk ad tt-tfaṛes Mali.
Am wakken ay d-yenna daɣ dakken « Mali d tamurt yecban tislit n unẓar. Ulac Imucaɣ neɣ Ibambaṛaten, yella kan uɣerman. Imucaɣ ur sɛin ara deg yidammen-nsen kaṛuh n tmurt neɣ kaṛuh n yiberkanen, maca kra n tmura ijehden, ay yesɛan nnfeɛ deg tama-a ay yebɣan ad sqedcen yiwet n tegrawt i lfayda-nsen ».
Ma d taselwayt n Tsemyuddest n tiddukliwin d tuddsiwin tirnabaḍin n tsednan deg Mali (Cafo), Massa Oumou Traoré, tger-d tiɣri i wid iḥedṛen akken ad xedmen i lmend n talwit, yerna tenna-d dakken « war talwit, ur d-yettili ara unnerni », ma d agensas n yimasiḥiyen, iḥettet-d ɣef « ssmaḥ, amsuɣal d talwit ».
Aselway n Useqqamu unnig islami n Mali, limam Mahmoud Dicko yenna-d dakken « seg 2012 ay la tettɛeddi Mali ɣef yiwet n taluft d taweɛṛant », yerna iger-d tiɣri akken « ad fehmen medden amihi ay izemren ad yeswaɣ tamurt ».
Anabaḍ d yimussa ay yettekkan deg tqaɛet n Ldzayer (Amussu aɛṛab n Uzawad [ay yebḍan ɣef umussu aneṣli], Tasemyuddest i uɣref n Uzawad d Tsemyuddest n yimussa d terniwin tiferfanin n uzbu [CM-FPR]) wemmṛen amtawa-a deg umenzu n Meɣres deg Ldzayer Tamaneɣt.
D acu kan, Tasemyuddest n yimussa n Uzawad (CMA) aydeg ttekkan Umussu aɣelnaw n uslelli n Uzawad (MNLA), Aseqqamu unnig n tdukli n Uzawad (HCUA) d Umussu aɛṛab n Uzawad (MAA) tessuter « tasgunfut » akken ad ciwṛen imeɣnasen-nsen uqbel ma wemmṛen amtawa-nni.
