Asebter amenzawi

Ikubṭiren deg usseɣsi n tmes n tẓegwa (tamehla n tẓegwa)

TIZI WEZZU, 05 Mayu 2015 – Tamehla tamatut n tẓegwa la tessefray ad teqqel ad tesseqdac ikubṭiren deg usseɣsi n tmes n tẓegwa deg uqaleb n unagraw aɣelnaw n uḥezzeb d usseɣsi n tmes, ɣef wakken ay d-yenna ass n ttlata deg Tizi Wezzu yimḍebber amezwaru n tmehla-a, Mohamed Seghir Noual.

Mass Noual ay yettekkan deg umyager agrakal wis 3 ɣef « ussefrek aduman n tẓegwa n yiggi d tɣara n yiferki », yenna-d dakken asseqdec n yikubṭiren i usseɣsi n tmes seg yigenni yezmer « ad d-yili aseggas-a neɣ ɣef zik lḥal », akken ad iɛawen waya wid ay yesseɣsayen times deg wakal, yerna ikubṭiren-a ad ssawaḍen ama d ixeddamen, ama d aman i lmend n usseɣsi n tmes deg yimukan aydeg ara d-tebdu.

I lmend n waya, tamehla tamatut n uḥuddu aɣarim tuɣ-d yagi ikubṭiren, gar-asen sin neɣ kraḍ ad ttwasqedcen i usseɣsi n tmes n tẓegwa, yerna sin n yiseggasen aya seg wasmi ay d-tebda tmehla-a assileɣ i yinehhaṛen (gar-asen ula d tilawin) akken ad tteddun ad sseɣsin times deg yimukan ubɛiden neɣ wuɣur yewɛeṛ ad awḍen, am wakken ara ssawaḍen ixeddamen ɣer umkan n tmes, ad ssawaḍen imejraḥ ɣer yimukan n udawi neɣ ad d-ssukkusen medden seg yimukan imihawen.

Ikubṭiren-a ad ɛawnen ttawilat ay tesɛa yagi tmurt i usseɣsi n tmes deg lqaɛa, d wid aydeg llant 500 n tegrawin n tgermant tuɛjilt d tiddukliwin n yimezdaɣen ixeddmen ɣef uḥezzeb ɣef tmes, ɣef wakken ay d-yerna Mass Noual.

Asseqdec n yisafagen n usseɣsi n tmes, ɣef wakken ay d-yenna, yettwabṭel imi isafagen-a ḥwajen ad d-ɛemmṛen aman seg yimukan iwesɛanen aydeg llan waman. « Ma yella tawilayt n Tizi Wezzu tesɛa uggug n Teqṣebt ayseg zemren yisafagen-a ad d-ɛemmṛen aman, tiwilayin niḍen ur sɛint ara amkan am wa, ɣef waya, ad ttwasqedcen yikubṭiren ay izemren ad d-ɛemmṛen 600 n llitrat n waman », ay d-yenna deg tgara n wawal-nnes.