Asebter amenzawi

Mi yessawel d tɣemsa deg yijifeṛ n terzi tis 18 n tmesrit tagraɣlant n lebni, n yifarisen n tmeṣkiwt d yimuhal inagduden « Batimatec 2015 », Mass Tebboune yenna-d dakken fukent lemcawṛat d tkebbaniyin n lebni i beddu n bennu n 32.000 n tnezduɣin n AADL, yerna leɛqudat i lmend n waya ad ttunefken i unabaḍ seg-a ɣef dduṛt akken ad ttwaqeblen. « Asenfar la yetteddu akken iwata. Yella-d wanda ay xuṣṣent kra n tɣawsiwin, maca nessaweḍ ad d-neqḍeɛ ayen ifaten », ɣef wakken ay d-yenna uneɣlaf. Ahil n AADL ad yebdu ad d-yettban uxeddim-nnes uqbel tgara n 2015. Wid ay yemmeṛkan deg AADL deg 2001 d 2002 ad asen-ttunefken yiɣtasen n tukci n tnezduɣt, ula d wid ay wehhan ɣer wahil asmalan anagdud (LPP). Tukci n tsura i wid terza temsalt ad d-tili seg tezwara n 2016 d asawen, mi ara faken yixeddimen n usseqɛed n beṛṛa d ussersi n ttawilat ay yeqqnen ɣer waya. Tinezduɣin tismalanin tinagdudin (LPP) ad sɛunt akk ttawilat. Deg wayen yerzan tinezduɣin tismalanin tinagdudin, Mass Tebboune yenna-d dakken lebni-nsent la yettɣawal xir n uqbel, yerna kra seg yisenfaren-a n lebni ad faken seg-a ɣef kra n wayyuren deg twilayin yemgerraden, am twilayt n Tipaza. Deg twilayt n Ldzayer, 13.000 n tnezdupɣin ay yebdan s lebni, deg wakud aydeg llan 20.000 n yimsutren, ɣef wakken ay d-yenna uneɣlaf ay d-yernan dakken llant timudrutin (lbarṭmat) n tmudemt yellan deg Sidi Ɛebdellah (anda ay yedda mliḥ uxeddim n lebni) ad d-wejdent seg-a ɣef sin n wayyuren.