ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵥⴻⴹⴹⴰ ⵏ ⵢⵉⴱⵔⵉⴷⴻⵏ ⵏ ⵡⵓⵣⵣⴰⵍ ⵏ ⵜⵔⵉⵙⵉⵜⵉ ⴰⴷ ⵢⴰⵡⴻⴹ ⵖⴻⵔ 6000 ⵏ ⵢⵉⴽⵉⵍⵓⵎⵉⵜⵔⴻⵏ ⴷⴻⴳ 2017

ⵍⴻⴱⵍⵉⴷⴰ – ⴰⵏⴻⵖⵍⴰⴼ ⵏ ⵓⵎⴻⵙⵏⵉ ⴰⵎⴰⵔ ⴳⵀⵧⵓⵍ ⵢⴻⵏⵏⴰ-ⴷ ⴰⵙⵙ ⵏ ⵍⴻⵅⵎⵉⵙ ⴷⴻⴳ ⵍⴻⴱⵍⵉⴷⴰ ⴷⴰⴽⴽⴻⵏ ⴰⵥⴻⴹⴹⴰ ⵏ ⵢⵉⴱⵔⵉⴷⴻⵏ ⵏ ⵡⵓⵣⵣⴰⵍ ⵏ ⵜⵔⵉⵙⵉⵜⵉ ⴰⴷ ⵢⴰⵡⴻⴹ ⵖⴻⵔ 6000 ⵏ ⵢⵉⴽⵉⵍⵓⵎⵉⵜⵔⴻⵏ ⵙ ⵓⵊⴻⵎⵎⴰⵍ ⵙⴻⴳ-ⴰ ⵖⴻⵔ 2017 ⴷⴻⴳ ⵓⵇⴰⵍⴻⴱ ⵏ ⵡⴰⵀⵉⵍ ⵏ ⵓⵙⴻⵍⵡⴰⵢ ⵉ ⵍⵎⴻⵏⴷ ⵏ ⵓⵙⵙⴻⵜⵔⴻⵔ ⴷ ⵓⵙⵙⴻⴽⵛⴻⵎ ⵏ ⵜⵔⵉⵙⵉⵜⵉ ⵖⴻⵔ 12500 ⵏ ⵢⵉⴽⵉⵍⵓⵎⵉⵜⵔⴻⵏ ⵏ ⵢⵉⴱⵔⵉⴷⴻⵏ ⵏ ⵡⵓⵣⵣⴰⵍ. « ⴰⵙⵙ-ⴰ, ⴼⵓⴽⴻⵏ ⵢⴰⴳⵉ 4000 ⵏ ⵢⵉⴽⵉⵍⵓⵎⵉⵜⵔⴻⵏ [ⵏ ⵢⵉⴱⵔⵉⴷⴻⵏ ⵏ ⵡⵓⵣⵣⴰⵍ ⵏ ⵜⵔⵉⵙⵉⵜⵉ] ⵙⴻⴳ ⵡⴰⵀⵉⵍ-ⴰ ⵏ ⵓⵙⴻⵍⵡⴰⵢ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⴳⵀⵧⵓⵍ ⴷⴻⴳ ⵢⵉⵡⴻⵜ ⵏ ⵜⵙⴻⵖⵔⵓⵜ ⵉ ⵜⵖⴻⵎⵙⴰ, ⴷⴻⴳ ⵢⵉⵊⵉⴼⴻⵕ ⵏ ⵜⴻⵔⵣⵉ-ⵏⵏⴻⵙ ⵏ ⵓⵙⵙⴻⴼⵇⴻⴷ ⵏ ⵓⴼⴰⴽⵉ ⵏ ⵢⵉⵅⴻⴷⴷⵉⵎⴻⵏ ⵏ ⵜⵖⵓⵣⵉ ⵏ ⵓⴳⴻⵏⵏⴰⵔⵉ ⵏ ⵔⴰⵎⴷⴰⵏⴻ ⴷⴻⴳ ⵡⴰⴷ ⵊⴻⵕ (ⴷⴻⴳ ⵓⵜⴰⵔⴰⵎ ⵏ ⵍⴻⴱⵍⵉⴷⴰ), ⴷ ⴰⵙⴻⵏⴼⴰⵔ ⵢⴻⵜⵜⴻⴽⴽⴰⵏ ⴷⴻⴳ ⵓⵙⵙⴻⴽⵛⴻⵎ ⵏ ⵜⵔⵉⵙⵉⵜⵉ ⵖⴻⵔ ⵓⴱⵔⵉⴷ ⵏ ⵡⵓⵣⵣⴰⵍ ⵏ 56 ⵏ ⵢⵉⴽⵉⵍⵓⵎⵉⵜⵔⴻⵏ ⴰⵔⴰ ⵢⴻⵇⵇⵏⴻⵏ ⵍⴻⴱⵍⵉⴷⴰ ⵖⴻⵔ ⵄⵉⵏ ⴷⴷⴻⴼⵍⴰ.

ⴰⵀⵉⵍ-ⴰ ⵏ ⵓⵙⴻⵍⵡⴰⵢ ⴷ ⵡⵉⵏ ⴰⵔⴰ ⵉⵃⴰⵣⴻⵏ ⴰⴽⴽ ⵜⵉⵎⵉⵡⴰ ⵏ ⵜⵎⵓⵔⵜ (ⵙⴻⴳ ⵓⴳⴰⴼⴰ ⵖⴻⵔ ⵓⵏⵥⵓⵍ, ⵢⴻⵔⵏⴰ ⴰⴷ ⵢⴻⴽⴽ ⵖⴻⴼ ⵢⵉⴳⵏⴰⵏ ⵉⵄⵍⴰⵢⴰⵏⴻⵏ), ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ, ⵢⴻⵔⵏⴰ ⴰⵙⵎⵉ ⴰⵔⴰ ⵉⴼⴰⴽ, ⴰⴷ ⵇⵇⵍⴻⵏⵜ ⵜⵎⴰⵛⵉⵏⵉⵏ ⴰⴷ ⵜⵜⴰⵡⴹⴻⵏⵜ ⴰⵔⵎⴰ 220 ⵏ ⵢⵉⴽⵉⵍⵓⵎⵉⵜⵔⴻⵏ ⵉ ⵜⵙⴰⵄⴻⵜ (ⴷⴻⴳ ⵡⴰⴽⵓⴷ ⴰⵢⴷⴻⴳ ⵉⵎⵉⵔ-ⴰ ⵍⴰ ⵜⵜⴰⵣⵣⴰⵍⴻⵏⵜ ⴳⴰⵔ 80 ⴷ 160 ⵏ ⵢⵉⴽⵉⵍⵓⵎⵉⵜⵔⴻⵏ ⵉ ⵜⵙⴰⵄⴻⵜ), ⵢⴻⵔⵏⴰ ⵉⵙⵡⵉ ⴰⵏⴻⴳⴳⴰⵔⵓ ⵏⴻⵜⵜⴰ ⴷ ⴰⵙⵙⵉⵡⴻⴹ ⵏ ⵜⴰⵣⵣⵍⴰ ⵏ ⵜⵎⴰⵛⵉⵏⵉⵏ ⵖⴻⵔ 350 ⵏ ⵢⵉⴽⵉⵍⵓⵎⵉⵜⵔⴻⵏ ⵉ ⵜⵙⴰⵄⴻⵜ ⵙ ⵓⵙⵙⴻⴽⵛⴻⵎ ⵏ ⵜⵎⴰⵛⵉⵏⵉⵏ ⵏ ⵡⴰⵣⵣⴰⵍ ⴰⵎⴻⵇⵔⴰⵏ (ⵜⴳⵠ).

ⴰⵙⵙⴻⵜⵔⴻⵔ ⴷ ⵓⵙⵙⴻⴽⵛⴻⵎ ⵏ ⵜⵔⵉⵙⵉⵜⵉ ⵖⴻⵔ ⵢⵉⴱⵔⵉⴷⴻⵏ ⵏ ⵡⵓⵣⵣⴰⵍ ⴷ ⴰⵢⴻⵏ ⴰⵔⴰ ⵢⴻⵜⵜⴻⴽⴽⵉⵏ ⴷⴰⵖ, ⵖⴻⴼ ⵍⴻⵃⵙⴰⴱ ⵏ ⵎⴰⵙⵙ ⴳⵀⵧⵓⵍ, ⴷⴻⴳ ⵓⵙⴻⵔⵔⴻⵃ ⵏ ⵢⵉⴱⵔⵉⴷⴻⵏ ⵏ ⵜⴽⴻⵕⵕⵓⵙⵉⵏ, ⵉⵎⵉ ⵙⵙⴻⵍⵄⴰ ⴰⴷ ⵜⴻⵇⵇⴻⵍ ⴰⴷ ⵜⴻⵜⵜⴻⴷⴷⵓ ⵙ ⵓⴱⵔⵉⴷ ⵏ ⵡⵓⵣⵣⴰⵍ (ⴰⴼⴰⵔⵉⵙⴻⵏ ⵏ ⵓⵒⵉⵜⵕⵓⵍ, ⵏ ⵜⴼⴻⵍⵍⴰⵃⵜ, ⵏ ⵜⴻⵎⴳⵓⵔⵉ), ⵍⴰⴷⵖⴰ ⴰⵙⵎⵉ ⴰⵔⴰ ⵜⵜⵡⴰⵇⵇⵏⴻⵏ ⵢⵉⴱⵔⵉⴷⴻⵏ ⵏ ⵡⵓⵣⵣⴰⵍ ⵖⴻⵔ ⵢⵉⵙⵓⴳⴰⵏ (ⵍⵎⴻⵔⵚⴰⵜ), ⵉⵏⴰⴼⴰⴳⴻⵏ ⴷ ⵜⵎⵉⵡⴰ ⵏ ⵍⵍⵓⵣⵉⵏⴰⵜ ⴷ ⵜⴰⵍⵍⵓⵏⵉⵏ ⵜⵉⵍⵓⵊⵉⵙⵜⵉⵢⵉⵏ.

ⵙⴻⴳ ⵢⵉⴷⵉⵙ ⵏⵉⴹⴻⵏ, ⴰⵀⵉⵍ-ⴰ ⴰⴷ ⵢⴻⵜⵜⴻⴽⴽⵉ ⴷⴻⴳ ⵓⵙⵙⴻⵍⵀⵓ ⵏ ⵓⵎⴻⵙⵏⵉ, ⴰⵎ ⵡⴰⴽⴽⴻⵏ ⴰⵔⴰ ⵢⴻⵙⵙⴻⵏⵇⴻⵙ ⴰⵄⵣⴰⵍ ⵏ ⵜⵎⵉⵡⴰ ⴰⵢⵖⴻⴼ ⴰⵔⴰ ⵄⴻⴷⴷⵉⵏ ⵢⵉⴱⵔⵉⴷⴻⵏ ⵏ ⵡⵓⵣⵣⴰⵍ, ⵢⴻⵔⵏⴰ ⴰⴷ ⵏⴻⵇⵙⴻⵏ ⵓⵍⴰ ⴷ ⵉⵙⴻⵀⵡⴰ ⵏ ⵓⴱⵔⵉⴷ.

ⴰⵏⴻⵖⵍⴰⴼ ⵏ ⵓⵎⴻⵙⵏⵉ ⵉⵡⴻⵚⵚⴰ ⵡⵉⴷ ⴰⵢ ⴷ-ⵢⴻⵍⵀⴰⵏ ⵙ ⵓⵙⴻⵏⴼⴰⵔ ⵏ ⵓⵙⵙⴻⴽⵛⴻⵎ ⵏ ⵜⵔⵉⵙⵉⵜⵉ ⵖⴻⵔ ⵓⴱⵔⵉⴷ ⵏ ⵡⵓⵣⵣⴰⵍ ⵏ ⵍⵄⴻⴼⵕⵓⵏ-ⵅⵎⵉⵙ ⵎⴻⵍⵢⴰⵏⴰ « ⴰⴷ ⵙⵄⴻⵊⵍⴻⵏ ⴰⵅⴻⴷⴷⵉⵎ ⵢⴻⵔⵏⴰ ⴰⴷ ⴼⴰⵕⵙⴻⵏ ⴷⴻⴳ ⵓⵏⴻⴱⴷⵓ ⴰⴽⴽⴻⵏ ⴰⴷ ⵙⵇⴻⵄⴷⴻⵏ ⴰⴽⴰⵍ ⵢⴻⵔⵏⴰ ⴰⴷ ⵅⴻⴷⵎⴻⵏ ⵛⵛⵖⴻⵍ-ⵏⵙⴻⵏ ⵙ ⵓⵎⵄⴰⵡⴻⵏ ⴷ ⵢⵉⴷⵓⴱⴰ ⵉⴷⵉⴳⴰⵏⴻⵏ, ⴰⵎ ⵡⴰⴽⴽⴻⵏ ⴰⵢ ⵢⴻⵙⵙⴻⴼⴽ ⴰⴷ ⵙⵙⴻⵃⴱⵉⴱⵔⴻⵏ ⵖⴻⴼ ⵓⵇⴰⴷⴻⵔ ⵏ ⵢⴰⵍ ⵜⴰⵎⴰ ⴰⵢⵖⴻⴼ ⴰⵔⴰ ⵄⴻⴷⴷⵉⵏ ».

ⵏⵏⵉⴳ ⵏ ⵙⵉⵏ-ⵏⵏⵉ ⵏ ⵢⵉⴳⴻⵏⵏⴰⵔⵉⵢⴻⵏ ⵏ ⵓⴱⵔⵉⴷ ⵏ ⵡⵓⵣⵣⴰⵍ ⴰⵢ ⵍⴰ ⴱⴻⵏⵏⵓⵏ ⴷⴻⴳ ⵔⴰⵎⴷⴰⵏⴻ (2,8 ⵏ ⵢⵉⴽⵉⵍⵓⵎⵉⵜⵔⴻⵏ) ⴷ ⴳⴻⵏⵟⴰⵙ (7,3 ⵏ ⵢⵉⴽⵉⵍⵓⵎⵉⵜⵔⴻⵏ), ⴰⵏⴻⵖⵍⴰⴼ ⵢⴻⵏⵏⴰ-ⴷ ⴷⴰⵖ ⵢⴻⵙⵙⴻⴼⴽ ⴰⴷ ⵜⵜⵡⴰⴱⵏⵓⵏⵜ ⵜⴻⵖⵙⴰⵔ ⵏ ⵜⵎⴰⵛⵉⵏⵜ, ⵢⴻⵔⵏⴰ ⵜⵉⴽⴻⴱⴱⴰⵏⵉⵢⵉⵏ ⵢⴻⵙⵙⴻⴼⴽ ⴰⴷ ⵃⴻⵣⵣⴱⴻⵏⵜ ⵙⴻⴳ ⵜⴰⵣⵡⴰⵔⴰ ⵖⴻⴼ ⵡⴰⵎⴻⴽ ⴰⵔⴰ ⵙⵙⴰⵡⴰⴹⴻⵏⵜ ⵜⵜⴰⵡⵉⵍⴰⵜ ⴰⵢ ⵃⵡⴰⵊⴻⵏⵜ ⵖⴻⵔ ⵓⵏⵔⴰⵔ (ⵙ ⵓⵇⴰⴷⴻⵔ ⵏ ⵡⴰⵍⵓⴳ ⵏ ⵛⵛⵓⵔⵓⴹ ⵏ ⵓⵙⴻⵏⴼⴰⵔ) ⴷ ⵜⵓⴽⴽⵙⴰ ⵏ ⵡⴰⴽⴽ ⵓⴳⵓⵔⴻⵏ ⴰⵔⴰ ⴷ-ⵎⵎⴰⴳⵔⴻⵏⵜ ⴷⴻⴳ ⵓⵏⵔⴰⵔ.