Asebter amenzawi
Aɣmis n « L'Echo d’Alger », d ttawil i usseddu n ddiɛaya n Fṛansa d uḥaṛeb n tnefsit n medden (amyager)
SKIKDA, 7 Mayu 2015 – Aɣmis n « L’Echo d’Alger » yella-d d ttawil i ṭṭrad asnafsi d tezniwt n Fṛansa deg Ldzayer, ɣef wakken ay d-nnan yimttekkiyen n temlilit ɣef « Twilayt tis Snat deg ṭṭrad n uzarug », ay ireẓmen ass n lexmis deg Uxxam n yidles n Skikda.
Mass Amor Bouderba, n tesdawit n Msila, iga-d asarag ɣef uɣmis n « L’Echo d’Alger d tummɣa n ugafa n Qsenṭina » aydeg ay d-yenna dakken aɣmis-a n tehrest (listiɛmaṛ) ay d-sbedden deg 1909, d aɣmis ay d-yesskanayen timuɣliwin n uyeffus ameḍḍarfu yerna d win ay yellan yekkat ɣef akken tadersi tuṛufit yeddren deg Ldzayer ad tif imezdaɣen ineṣliyen ama deg tdamsa, ama deg yidles neɣ deg tsertit.
Deg tallit n ṭṭrad n uslelli aɣelnaw, aɣmis-a yella yessuffuɣ-d ilɣa n yigen afṛensis, yerna yella yessuffuɣ-d daɣ irupurṭajen « iwehhan ɣer udafeɛ ɣef tmuɣliwin n udabu n tehrest », ɣef wakken ay d-yenna umsarag-a.
Aɣmis-a yebder-d acḥal d tikkelt isem n umeɣrus (ccahid) Zighoud Youcef deg wayen yerzan tummɣa n 20 Ɣuct 1955, yerna yenna-d dakken ayen ay yella yetteg-it Yigen n uslelli aɣelnaw yusa-d seg yiwen n ṛṛay abeṛṛani. Iswi n tezniwt-a, ɣef leḥsab n Mass Bouderba, netta d acemmet n ccɣel-a ameqran akken ur d-ttabdaden ara lejnas ɣer yidis n yimenɣi adzayri.
Amnadi-a yenna-d daɣ dakken aɣmis n « L’Echo d’Alger » yella d netta ay d aneṭṭaq n yijiniṛalen-nni ay igan tuttya taserdasit deg 1961, yerna aɣmis-a yella yesskanay-d akṛah-nnes i ujiniṛal De Gaulle, yerna d tin ay yellan d tamuɣli n umur ameqran n Wuṛufiyen ay yeddren deg Ldzayer.
Timlilit-a n sin n wussan ay tga tmehla n yidles d Tesdawit n 20 Ɣuct 1955 deg Skikda, ttekkan deg-s yimsaragen ay d-yusan seg tesdawiyin yemgerraden n tmurt.
