ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⵜⴰⵡⵉⵍⴰⵜ ⵉⵎⴰⵢⵏⵓⵜⴻⵏ ⵉ ⵓⵙⵏⴻⵔⵏⵉ ⵏ ⵓⵙⵙⴻⵍⵎⴻⴷ ⵏ ⵜⵎⴰⵣⵉⵖⵜ (ⴰⵙⴻⵇⵇⴰⵎⵓ ⵓⵏⵏⵉⴳ ⵉ ⵜⵉⵎⵎⵓⵣⵖⴰ)
ⴱⴳⴰⵢⴻⵜ – « ⴰⴽⴽⴻⵏ ⴽⴰⵏ ⴰⵔⴰ ⵢⴻⴱⴷⵓ ⵓⵙⴻⴳⴳⴰⵙ ⴰⵖⵓⵔⴱⵉⵣ ⴰⵎⴰⵢⵏⵓ », ⴰⴷ ⴷ-ⵜⵜⵡⴰⵀⴻⵢⵢⵉⵏ ⵜⵜⴰⵡⵉⵍⴰⵜ ⵉⵎⴰⵢⵏⵓⵜⴻⵏ ⵉ ⵓⵙⵏⴻⵔⵏⵉ ⵏ ⵓⵙⵙⴻⵍⵎⴻⴷ ⵏ ⵜⵎⴰⵣⵉⵖⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵙⵙⴻⴱⵜ ⴷⴻⴳ ⴱⴳⴰⵢⴻⵜ ⵓⵎⴰⵔⵓ ⴰⵎⴰⵜⵓ ⵏ ⵓⵙⴻⵇⵇⴰⵎⵓ ⵓⵏⵏⵉⴳ ⵉ ⵜⵉⵎⵎⵓⵣⵖⴰ.
ⵎⴰⵙⵙ ⴰⵙⵙⴰⴷ ⴻⵍ ⵀⴰⵛⵀⴻⵎⵉ ⵢⴻⵙⵙⴰⵡⴻⵍ-ⴷ ⴷⴻⴳ ⵜⴻⵣⵡⴰⵔⴰ ⵏ ⵢⵉⵡⴻⵜ ⵏ ⵜⵖⵉⵎⵉⵜ ⵏ ⵓⵙⵙⵉⵍⴻⵖ ⵉ ⵍⵎⴻⵏⴷ ⵏ « ⵓⵖⴻⵍⵍⴻⵜ ⵏ ⵓⴹⵔⵉⵙ ⴰⵙⴻⴽⵍⴰⵏ ⵉ ⵓⵙⵙⴻⵍⵎⴻⴷ », ⵢⴻⵔⵏⴰ ⵢⴻⵏⵏⴰ-ⴷ ⴷⴰⴽⴽⴻⵏ ⵉⴷⵓⴱⴰ ⵄⴻⵡⵡⵍⴻⵏ ⴰⴷ ⴷ-ⴼⴽⴻⵏ ⵓⴳⴰⵔ ⵏ ⵢⵉⵎⵓⴽⴰⵏ ⵉ ⵢⵉⵙⴻⵍⵎⴰⴷⴻⵏ, ⴷ ⴰⵛⵓ ⴽⴰⵏ, ⴰⵙⵙⴻⴽⵛⴻⵎ ⵏ ⵢⵉⵙⴻⵍⵎⴰⴷⴻⵏ ⴰⴷ ⴷ-ⵢⵉⵍⵉ ⵙ ⵜⴻⵎⵙⵉⵣⵡⴻⵔⵜ.
ⴰⵎⴹⴰⵏ ⵏ ⵡⵉⴷ ⴰⵔⴰ ⴷ-ⵢⴻⵜⵜⵡⴰⵙⴽⴻⵛⵎⴻⵏ ⵡⴻⵔⵄⴰⴷ ⵓⵔ ⴷ-ⵉⴱⴰⵏ, ⵎⴰⵛⴰ ⵡⵉⴷ ⴰⵔⴰ ⴷ-ⵢⴻⵜⵜⵡⴰⵙⴽⴻⵛⵎⴻⵏ ⴰⴷ ⴰⵙⴻⵏ-ⴳⴻⵏ ⴰⵇⴻⵢⵢⴻⵎ ⴷ ⴰⵎⴰⵜⵓ ⴷⴻⴳ ⵜⵎⴻⵀⵍⵉⵡⵉⵏ ⵏ ⵓⵙⵙⴻⴳⵎⵉ (ⵜⵜⴻⵕⴱⴻⵢⵢⴰ) ⵏ ⵜⵡⵉⵍⴰⵢⵜ, ⵢⴻⵔⵏⴰ ⴰⴷ ⵜⵜⵡⴰⵇⴻⴱⵍⴻⵏ ⵖⴻⴼ ⵍⴻⵃⵙⴰⴱ ⵏ « ⵡⴰⵏⴻⵛⵜ ⴰⵢ ⵃⵡⴰⵊⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.
« ⴰⵢⴻⵏ ⴰⵢ ⵃⵡⴰⵊⴻⵏⵜ ⵜⵎⴻⵀⵍⵉⵡⵉⵏ ⵏⵉⴹⴻⵏ ⴰⴷ ⴷ-ⵢⵉⵍⵉ ⵖⴻⴼ ⵍⴻⵃⵙⴰⴱ ⵏ ⵡⴰⵏⴻⵛⵜ ⴰⵢ ⵢⴻⵍⵍⴰⵏ ⵏ ⵡⵉⴷ ⴰⵢ ⴷ-ⵉⴼⵓⴽⴻⵏ ⵜⵉⵣⵔⴰⵡⵉⵏ-ⵏⵙⴻⵏ ⵙⴻⴳ ⵜⴻⵙⴷⴰⵡⵉⵜ ⵢⴻⵔⵏⴰ ⴱⵖⴰⵏ ⴰⴷ ⵅⴻⴷⵎⴻⵏ ⴷ ⵉⵙⴻⵍⵎⴰⴷⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.
« ⴰⵢⴰ ⵢⴻⵜⵜⴰⴽⴼ-ⴷ ⴰⵙⵙⵉⵔⴻⵎ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⴷⴰⴽⴽⴻⵏ ⴰⵏⴻⵖⵍⴰⴼ ⴰⵎⴻⵏⵣⵓ ⵢⴻⴱⴷⴻⴷ ⴷ ⴰⵡⵉⵣⵉ ⵖⴻⵔ ⵢⵉⴷⵉⵙ ⵏ ⵓⵙⴻⵇⵇⴰⵎⵓ ⵓⵏⵏⵉⴳ ⵉ ⵜⵉⵎⵎⵓⵣⵖⴰ ⵉ ⵍⵎⴻⵏⴷ ⵏ « ⵓⵙⵙⴻⴽⵛⴻⵎ ⵛⵡⵉⵟ, ⵛⵡⵉⵟ ⵏ ⵜⵎⴰⵣⵉⵖⵜ ⴷⴻⴳ ⵓⵖⴻⵔⴱⴰⵣ » ⵙ ⵓⵙⵙⴻⵡⵙⴻⵄ ⵏ ⵓⵙⵙⴻⵍⵎⴻⴷ ⵏ ⵜⵎⴰⵣⵉⵖⵜ ⴱⴻⵕⵕⴰ ⵉ ⵃⴷⴰⵛ-ⵏⵏⵉ (11) ⵏ ⵜⵡⵉⵍⴰⵢⵉⵏ ⴰⵢⴷⴻⴳ ⵍⴰ ⵜⴻⵜⵜⵡⴰⵙⵙⴻⵍⵎⴰⴷ ⵉⵎⵉⵔ-ⴰ. ⵉⵙⵡⵉ ⵏ ⵡⴰⵢⴰ ⵏⴻⵜⵜⴰ ⴷ ⴰⵀⴻⵢⵢⵉ ⵏ ⵍⵍⵙⴰⵙ ⵉ ⵓⵙⵙⴻⵍⵎⴻⴷ ⵉⵎⵃⴻⵜⵜⴻⵎ ⵏ ⵜⵎⴰⵣⵉⵖⵜ.
ⵎⴰⵙⵙ ⴰⵙⵙⴰⴷ ⵉⴼⵓⵕⴻⵙ, ⵙⴻⴳ ⵜⴰⵎⴰ ⵏⵉⴹⴻⵏ, ⴰⴽⴽⴻⵏ ⴰⴷ ⴷ-ⵢⴻⴱⴷⴻⵔ ⴰⴽⴽ ⵜⵜⴰⵡⵉⵍⴰⵜ ⴰⵢ ⵙⵙⴻⴼⵔⴰⵏ ⴰⴷ ⵜⴻⵏ-ⵙⵇⴻⴷⵛⴻⵏ ⵉ ⵓⵙⵏⴻⵔⵏⵉ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙ ⵓⵎⴰⵜⴰ, ⵍⴰⴷⵖⴰ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵙⵙⵓⴼⴼⴻⵖ ⵏ ⵢⵉⴷⵍⵉⵙⴻⵏ ⴷ ⵓⵣⵔⴰⵄ ⵏ ⵜⵜⴰⵡⵉⵍⴰⵜ ⵏ ⵓⵙⵙⴻⵍⵎⴻⴷ ⴷ ⵓⵙⵙⵉⵍⴻⵖ ⵏ ⵢⵉⵎⵙⵉⵍⵖⴻⵏ.
