Asebter amenzawi
Takurt n uqecwal/Talɣuɣa n Ldzayer (tilawin): Taɣlamt n tpitṛuliyin rebḥent talɣuɣa i tikkelt tis 3 ɣef usref
LDZAYER TAMANEƔT – Timaririn n GS Pétroliers rebḥent i tikkelt tis 3 ɣef usref Talɣuɣa n Ldzayer, mi rnant taɣlamt n OC Ldzayer (78-49) deg wass aneggaru n telɣuɣa-a ay urarent deg tzeɣɣa n Ḥidṛa (Ldzayer Tamaneɣt).
S rrbeḥ-a, Tipitṛuliyin rebḥent talɣuɣa-a i tikkelt tis 8, yerna d nitenti ara yuraren s yisem n Ldzayer deg telɣuɣa n Tefriqt n yisriren ilɣuɣen.
Taɣlamt n GSP tebda-d urar, deg tazwara, s 15 n tuccḍiwin, sakkin tessaweḍ ad d-terfed iman-nnes deg tgara n tis-kuẓet tamezwarut n temlilit (17-13).
Deg tis-kuẓet tis snat n temlilit, GSP tesseqdec timaririn n daxel, ladɣa takungulit Marie Mfutila (tessekcem 29 n tenqiḍin) yerna terbeḥ-d teɣlamt n GSP d12 n tenqiḍin niḍen (34-22).
Mi d-qqlent seg usgunfu, timaririn n Yacine Bellal kemmlent urar-nsent s tmaririn n daxel yerna ḍḍfent-d takurt 45 n tikkal, gar-asent 14 n tummɣiwin, maca timaririn n OC Ldzayer ssawḍent ad skecment 12 n tenqiḍin, uqbel ma teqqel-d GSP s ugmuḍ n 47 ɣer 39 deg tgara n tis-kuẓet-a.
Deg tis-kuẓet taneggarut, timaririn n GSP kemmlent tiẓin-nsent deg ugmuḍ yerna jjant s waṭas taɣlamt n OC Ldzayer. S waya, Tipitṛuliyin n GSP fukent timlilit s 78 n tenqiḍin ɣer 49, yerna rebḥent talɣuɣa-a i tikkelt tis 3 ɣef usref.
Asleɣmay n GSP, Yacine Bellal, ihenna wul-nnes am wakken ay d-yenna dakken taɣlamt-nnes tuklal mliḥ rrbeḥ-a.
« D nekkni ay iẓewren deg telɣuɣa seg wasmi ay d-tebda ar ass-a. Dɣa ttwaliɣ dakken rrbeḥ-a nuklal-it. Bɣiɣ ad snemmreɣ timaririn ɣef lmejhud ay d-fkant s teɣzef n useggas. Imir-a, teqqim-d teqbuct akken ad nerbeḥ sin n yizwal ɣef tikkelt. Taqbuct-a nezgel-itt aseggas yezrin », ɣef wakken ay d-yenna Bellal i Tnegga n Yisalan n Ldzayer.
Seg yidis-nnes, asleɣmay n teɣlamt n OC Ldzayer, Djamel Khelifa, yenna-d dakken timaririn-nnes xeṣrent timlilit n wass-a yerna ssebba n waya d inefrayen.
« Nezgel tagnit n rrbeḥ n telɣuɣa n useggas-a, maca teqqim-aɣ-d teqbuct. Deg temlilit n wass-a, d lḥeṛs ay aɣ-yeswaɣen. Neɛjel mliḥ deg tummɣa yerna nga aṭas n tuccḍiwin deg temḥaddit », ɣef wakken ay d-yenna Khelifa.
Taɣlamt n GSP terbeḥ-d talɣuɣa i tikkelt tis 8 yerna d tikkelt 3 ɣef usref aydeg ara tt-id-terbeḥ aseggas-a. GSP terbeḥ-itt-id deg 1998 d 1999 s yisem n MC Ldzayer, sakkin tɛawed-as deg 2009, 2010, 2011, 2013, 2014 d 2015 s yisem amaynu n GSP.
Igmaḍ d usettef
Igmaḍ d usettef sdeffir wass wis 10 d uneggaru n telɣuɣa n Ldzayer n tkurt n uqecwal, taẓunt taɣelnawt n tlawin, ay d-yellan ass n ssebt deg Ḥidṛa (Ldzayer).
(ass wis 10 d uneggaru):
MT Sḍif - Marine Ḥusin Day 50-74 GS Pétroliers - OC Ldzayer 78-49 Tettwaɛdeṛ : EC Lebyar
Asettef aneggaru Tinqiḍin Ass 1. GS Pétroliers 17 10 Talɣuɣt n Ldzayer 2014-2015
2 . OC Ldzayer 16 10 3. Marine Ḥusin Day 15 10 4. MT Sḍif 12 10 5. EC Lebyar 8 10
Timliliyin ay uraren ass n ljemɛa (ass wis 9) : OC Ldzayer - MT Sḍif 64-43 GS Pétroliers - EC Lebyar 88-25 Tettwaɛdeṛ: Marine Ḥusin Day
Lexmis (ass wis 8): Marine Ḥusin Day - EC Lebyar 68-17 GS Pétroliers - MT Sḍif 82-33 Tettwaɛdeṛ: OC Ldzayer
Taḥawact n telɣuɣa sdeffir ma terbeḥ GS Pétroliers
Taḥawact n telɣuɣa n Ldzayer n tkurt n uqecwal (timeqranin – tilawin) sdeffir 1993, sdeffir ma terbeḥ GSP mgal OC Ldzayer (78-49) ass n ssebt deg Ḥidṛa (Ldzayer Tamaneɣt):
1993: SR Ɛennaba 1994: ASUC-EPAU 1995: NA Ḥusin Day 1996: NA Ḥusin Day 1997: OC Ldzayer 1998: MC Ldzayer 1999: MC Ldzayer 2000: OC Ldzayer 2001: OC Ldzayer 2002: OC Ldzayer 2003: OC Ldzayer 2004: ASPTT Ldzayer 2005: OC Ldzayer 2006: ASPTT Ldzayer 2007: ASPTT Ldzayer 2008: ASPTT Ldzayer 2009: GS Pétroliers 2010: GS Pétroliers 2011: GS Pétroliers 2012: OC Ldzayer 2013: GS Pétroliers 2014: GS Pétroliers 2015: GS Pétroliers
