Asebter amenzawi
Ccṛeɛ n Tbanka n Khalifa: Abdelmoumene yenkeṛ dakken yesɛa azmam n ttjaṛa n tbanka uqbel ma yessbedd-itt-id
LEBLIDA – Ametthum agejdan deg temsalt n Khalifa Bank, Abdelmoumene Khelifa, yenkeṛ ass n lḥedd deg uxxam n ccṛeɛ n tejrimin n Leblida dakken yeḍḍef-d azmam n ttjaṛa n tbanka-nnes ma yessebded-itt-id.
Yenna-d, deg wass wis semmus (xemsa) n ccṛeɛ, dakken yeḍḍef-d ttesriḥ uɛḍil n ussebded n tbanka-nnes, d ttesriḥ n useggas, yerna yenna-d dakken Khalifa Bank tebda txeddem sin neɣ kraḍ n yiseggasen deffir waya deg « lqanun yerna s uqader n tsekkirin yeqqnen ɣer lbankat ».
Lqaḍi Antar Menouar yenna-as i Khelifa dakken yeḍḍef-d azmam-nnes n ttjaṛa uqbel ma ifuk tasekkirt yeqqnen ɣer ussebded n tbanka akken ad d-yerr aḥric-nni n ṛaselmal ay yessers deg-s, meḥsub d tis xemsa n ṛṛbeɛ n ṛaselmal amatu, azal n 125 n yimelyunen n yidinaṛen.
Ibugaṭuten n temḥaddit n Abdelmoumene Khelifa, Akerwa Merouane Boumedhouda d Ukerwa Nasserdine Lezzar, sseqsan Khelifa ɣef wamek ɣef yedrimen ayyes ay yeldi tabanka-nnes, lfayda n tkebbanit-nnes n waffug Khalifa Airways d ureḍḍal ay yella ireḍḍel-d idrimen s tefses seg Tbanka n tneflit tadigant (BDL) n Sṭawali.
Abdelmoumene Khelifa iwekked-d dakken ur as-d-ttunefken ara akk yidrimen i lmend n waya menɣir lfayda ay d-skecment kraḍt-nni (3) n tkebbaniyin-nnes n uɣraf d ussenzi n yisafaren (KRG), gar-asent yiwet n tkebbanit ay ixeddmen deg Fṛansa, imi tikebbaniyin-a llant ssekcament-d « idrimen d imeqranen yerna ad d-qamen » i ulday n tbanka, ɣef wakken ay d-yenna.
Lfayda ay tella tessekcam-d tbanka n Khalifa tella tettaweḍ ɣer « 5 n yimelyaṛen n yidinaṛen deg wass », yerna lfayda n Khalifa Airways « tella tugar aya », ɣef wakken ay d-yenna, d acu kan, yenkeṛ dakken yesseqdec idrimen n tkebbanit-nni n waffug i lfayda-nnes tudmawant.
Abdelmoumene Khelifa yettwacaṛeɛ ɣef « ukellex deg yidrimen, tadukli i lmend n ussefsed, tukerḍa, asseqdec n lekwaɣeḍ n tbanka n tkellax, axdaɛ n laman ay gan deg-s yidisan niḍen, asseqdec n tmussni i ussefsed, tukci n tjuɛal, arɣam d ussefles n tkellax ».
Deg 2007, yettwacaṛeɛ netta iɣab, yerna yeffeɣ-d fell-as leḥkem n lḥebs s teɣzef n tudert. S ujemmal, 76 n yimetthumen (gar-asen 21 ttwaḥebsen) ay yettekkan deg temsalt-a, deg wakud aydeg inagan ɛeddan i 300.
