Asebter amenzawi
Addalen n yimeɛdaṛ - Uraren imaḍlanen n tkurt n yiswi: Ldzayer ad tebdu urar d Japun
SEOUL – Taɣlamt tadzayrit n tlawin n tkurt n yiswi ad d-tebdu urar-nnes deg Wuraren imaḍlanen n waddalen n yimeɛdaṛ (i wid yettwalin) ass n letniyen mgal teɣlamt n Japun, deg wass amezwaru, deg tegrawt B deg Seoul (Kura n Unẓul).
Taɣlamt tadzayrit ad turar deg tegrawt-a ɣer yidis n Japun, Kanada, Kurya n Unẓul), Langliz, Ustṛalya, Lalman d Sswid.
Tagrawt A llant deg-s Ccinwa, Ghana, Isṛayil, Spenyul, Finland, Legrig, Ukṛanya d Danmaṛk.
D iseggasen aya seg wasmi ur tettekka ara teɣlamt tadzayrit n tlawin deg wuraren-a imaḍlanen, yerna sdeffir n Japun, taɣlamt tadzayrit ad turar mgal tin n Kanada (ass n ttlata), sakkin mgal tin n Sswid (ass n laṛebɛa), sakkin mgal Kurya n Unẓul d Langliz (ass n lexmis), sakkin mgal tin n Ustṛalya d tin n Lalman (ass n ljemɛa).
Kuẓet (4) n teɣlamin timezwura n yal tagrawt ad urarent deg tis kuẓet n tneggarut ara d-yilin ass n ssebt ay d-yetteddun, ma d azgen n tneggarut d tneggarut ad d-ilint ass n lḥedd.
« Taɣlamt n tlawin n tkurt n yiswi d tamaynut yerna ad tfaṛes, seg wuraren-a imaḍlanen n Seoul, akken ad tessewjed iman-nnes akken iwata i telɣuɣa n Tefriqt n tkurt n yiswi ara d-yilin deg Wambeṛ, yerna s telɣuɣa-a ara ɛeddint ɣer wuraren ulimpiyen n yimeɛdaṛ n Rio », ɣef wakken ay d-tessefhem Tdifiṛalit tadzayrit n waddalen n yimeɛdaṛ.
Menɣir takurt n yiswi n tlawin, Ldzayer ad tettekki deg sin n waddalen niḍen deg Wuraren imaḍlanen n Kurya n Unẓul (seg 10 ɣer 18 Mayu 2015). Wi d tatlitit d ujudu.
Deg ujudu, attekki n Yidzayriyen ad d-yili ass n laṛebɛa, d ass aydeg ara nnaɣen yirgazen n ddaw n 60 kg, yerna ad yettekki deg waya ulɣuɣ n umaḍal, Mouloud Noura, d Belabes Mohamed Kamel. Ad ttekkin daɣ yirgazen n ddaw n 66 kg, yerna ad yili gar-asen udzayri Sid Ali Lamri. Ahil n wass n laṛebɛa ad nnaɣent daɣ deg-s tlawin n ddaw n 57 kg d ddaw n 70 kg.
Ussan n lexmis d ljemɛa ad d-ilin deg-s yimenɣiwen n waffas (tukksa) d yimenɣiyen n tneggarut n taggayin niḍen, s uttekki n Youcef Radjai, Abdelaoui Cherine, Mehdi Meskine, Tahar Hideb d Yacine Chekkali. Tineggura s teɣlamin ad d-ilint ass n ssebt.
Deg tatlitit, Ldzayer ad tettekki s Firas Bentria ay iɛeddan ɣer tneggarut n temsizwert n teɣzef (T11), Lynda Hamri (teɣzef T12), Nacereddine Karfas (timsizzlin n 5000 n lmitrat d 10000 n lmitrat, T12) d Abdelatif Baka (T13) deg temsizzlin n uzgen n uɣezfan.
« Ad d-nerbeḥ tizalɣiwin d tenqiḍin » i lmend n uttekki deg Wuraren Ulimpiyen n Yimeɛdaṛ n Rio n 2016 d iswi ay d-tga i yiman-nnes Tfidiṛalit tadzayrit n waddalen n yimeɛdaṛ deg uttekki-nnes deg Wuraren imaḍlanen n Seoul.
