Asebter amenzawi
Ldzayer d Tanzanya bɣant tifrat ara iqadren azref n uɣref aṣeḥrawi
LDZAYER TAMANEƔT – Ldzayer d Tanzanya grent-d tiɣri i Useqqamu n tɣellist n Yiɣlanen Yeddukklen akken ad ddmen akk « iɣtasen ay yessefken » akken ad d-nadin tifrat i taluft n Uneẓruf Utrim, d tifrat ara iqadren azref « ur yettwankaṛen » n uɣref aṣeḥrawi akken ad yefren azekka-nnes.
Dɣa deg temsalt-a, Ldzayer d Tanzanya « ḥettetent ɣef useqqamu n tɣellist n Yiɣlanen Yeddukklen akken ad ddmen akk iɣtasen yessefken akken ad yeddu ɣer sdat uxeddim n unadi n tifrat i taluft n Uneẓruf Utrim, yerna aseqqamu-a yesɛa dduṛ d tmasit imeqranen i lmend n uḥraz n talwit d tɣellist tagraɣlant », ɣef wakken ay d-yenna yiwen n ulɣu ucrik ay d-yeffɣen ass n letniyen sdeffir n terzi n uwanak ɣef Ldzayer n uselway atanzani, Jakaya Mrisho Kikwete, s uneɛruḍ n uselway n tegduda, Abdelaziz Bouteflika.
Iselwayen Bouteflika d Kikwete, « ɛawden wekkden-d abdad-nsen ɣer yidis n lmejhud n umaru amatu n Yiɣlanen Yeddukklen, Ban Ki-moon d umazun-nnes uzzig, Christopher Ross, akken ad d-afen tifrat tuɣdimt yerna d tadumant i taluft-a ara yebnun ɣef uzref ur yettwankaṛen n uɣref n Uneẓruf Utrim akken ad yefren azekka-nnes s tsefrant tilellit, tuɣdimt yerna d tamesɣarut », ɣef wakken ay d-yenna ulɣu-nni, am wakken ay d-yerna dakken iselwayen n snat-a n tmura wekkden-d daɣ ɣef « ubdad-nsen ɣer yidis n ussefɛel n wayen ay yessaram uɣref n Tegduda taɛṛabt taṣeḥrawit tamegdayt deg wayen yerzan lebni n tmurt-nnes ».
Sin-a n yidisan « nnan-d daɣ feṛḥen s uttekki n Tdukli tafriqit deg temsalt-a, ladɣa imi ay d-tsemma amazun-nnes uzzig ara d-yelhun d temsalt-a, Joaquim Chissano, yerna yessuffeɣ-d Useqqamu n talwit d tɣellist yiwen n ulɣu ɣef temsalt n Uneẓruf Utrim ass n 27 Meɣres 2015 ».
