ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵕⴻⴱⴱⵉ ⵏ ⵢⵉⵙⴻⵍⵎⴰⵏ ⵢⴻⵙⵙⴻⴼⴽ ⴰⴷ ⴷ-ⵢⴻⵙⵙⴻⴽⵛⴰⵎ ⵉⴷⵔⵉⵎⴻⵏ

ⵍⴷⵣⴰⵢⴻⵔ ⵜⴰⵎⴰⵏⴻƔⵜ – ⵏⵏⴰⵏ-ⴷ ⵢⵉⵎⴰⵣⵣⴰⵢⴻⵏ ⴰⵙⵙ ⵏ ⵍⴻⵜⵏⵉⵢⴻⵏ ⴷⴻⴳ ⵍⴷⵣⴰⵢⴻⵔ ⵜⴰⵎⴰⵏⴻⵖⵜ ⴷⴰⴽⴽⴻⵏ ⴰⵅⴻⴷⴷⵉⵎ ⵏ ⵓⵕⴻⴱⴱⵉ ⵏ ⵢⵉⵙⴻⵍⵎⴰⵏ ⵢⴻⵙⵙⴻⴼⴽ ⴰⴷ ⴷ-ⵢⴻⵙⵙⴰⴷⴰⴼ ⵉⴷⵔⵉⵎⴻⵏ, ⵢⴻⵔⵏⴰ ⴰⴷ ⵢⴻⵜⵜⴻⴽⴽⵉ ⴷⴻⴳ ⵏⵏⴼⴻⵄ ⵏ ⵜⴷⴰⵎⵙⴰ ⵜⴰⵖⴻⵍⵏⴰⵡⵜ, ⴰⵎ ⵡⴰⴽⴽⴻⵏ ⴰⵢ ⴷ-ⴳⵔⴻⵏ ⵜⵉⵖⵔⵉ ⴰⴽⴽⴻⵏ ⴰⴷ ⵢⴻⵜⵜⵡⴰⵙⵎⴻⵍ ⵓⴼⴰⵔⵉⵙ ⵏ ⵓⵕⴻⴱⴱⵉ ⵏ ⵢⵉⵙⴻⵍⵎⴰⵏ ⴷⴻⴳ ⵙⵙⵓⵇ ⴰⴷⵣⴰⵢⵔⵉ.

ⵔⵔⴱⴻⵃ ⵏ ⵢⵉⵙⴻⵏⴼⴰⵔⴻⵏ ⵏ ⵓⵕⴻⴱⴱⵉ ⵏ ⵢⵉⵙⴻⵍⵎⴰⵏ ⵢⴻⵇⵇⴻⵏ ⵖⴻⵔ ⵜⴻⵣⵎⴻⵔⵜ-ⵏⵙⴻⵏ ⴰⴽⴽⴻⵏ ⴰⴷ ⴷ-ⵙⵙⵉⴷⴼⴻⵏ ⵉⴷⵔⵉⵎⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵏⵏⴰⵏ ⵡⵉⴷ ⵢⴻⵜⵜⴻⴽⴽⴰⵏ ⴷⴻⴳ ⵢⵉⵡⴻⵏ ⵏ ⵓⵙⴰⵔⴰⴳ ⵖⴻⴼ « ⵍⴰⵜⴻⵕ ⴰⵔⴰ ⵢⴻⵙⵄⵓ ⵓⵕⴻⴱⴱⵉ ⵏ ⵢⵉⵙⴻⵍⵎⴰⵏ ⴷⴻⴳ ⵜⴷⴰⵎⵙⴰ ⴷ ⵜⵡⴻⵏⵏⴰⴹⵜ », ⴰⵎ ⵡⴰⴽⴽⴻⵏ ⴰⵢ ⴷ-ⵏⵏⴰⵏ ⴷⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵙⵇⴻⵏⵄⴻⵏ ⵎⴻⴷⴷⴻⵏ ⴰⴽⴽⴻⵏ ⴰⴷ ⵜⵜⴻⵜⵜⴻⵏ ⵉⵙⴻⵍⵎⴰⵏ ⴰⵢ ⴷ-ⵢⴻⴽⴽⴰⵏ ⵙⴻⴳ ⵓⵃⵔⵉⵛ ⵏ ⵓⵕⴻⴱⴱⵉ, ⵉⵎⵉ ⵉⵙⴻⵍⵎⴰⵏ-ⴰ ⵍⵀⴰⵏ ⴰⵎ ⵡⵉⴷ ⴰⵢ ⴷ-ⵢⴻⵜⵜⴻⴽⴽⴻⵏ ⵙⴻⴳ ⵢⵉⵍⴻⵍ (ⵍⴻⴱⵃⴻⵕ).

ⵉⵎⵜⵜⴻⴽⴽⵉⵢⴻⵏ ⴷⴻⴳ ⵓⵙⴰⵔⴰⴳ-ⴰ ⵃⴻⵜⵜⴻⵜⴻⵏ-ⴷ ⴷⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵢⴻⵜⵜⵓⵏⴻⴼⴽ ⵜⵜⴰⵡⵉⵍ ⵉ ⵓⵕⴻⴱⴱⵉ-ⴰ ⴰⴽⴽⴻⵏ ⴰⴷ ⴷ-ⵢⵉⵍⵉ ⴷⴻⴳ-ⵙ ⵓⵎⵏⴻⴽⵏⵉ ⴳⴰⵔ ⵜⴷⴰⵎⵙⴰ ⴷ ⵜⵡⴻⵏⵏⴰⴹⵜ, ⵍⴰⴷⵖⴰ ⵉⵎⵉ ⴰⵕⴻⴱⴱⵉ-ⴰ ⵏ ⵢⵉⵙⴻⵍⵎⴰⵏ ⵢⴻⵜⵜⴻⴽⴽⴰⵢ ⴷⴻⴳ ⵓⵃⵓⴷⴷⵓ ⵏ ⵜⵡⴻⵏⵏⴰⴹⵜ ⵏ ⵢⵉⵍⴻⵍ.

ⴰⵙⴻⵍⵡⴰⵢ ⵏ ⵜⵙⴻⵇⵇⴰⵎⵓⵜ ⵏ ⵓⵕⴻⴱⴱⵉ ⵏ ⵢⵉⵙⴻⵍⵎⴰⵏ ⵏ ⵓⵙⴻⵇⵇⴰⵎⵓ ⴰⵎⴰⵜⵓ ⵏ ⵓⴳⵎⴰⵔ ⵏ ⵢⵉⵙⴻⵍⵎⴰⵏ ⴷⴻⴳ ⵢⵉⵍⴻⵍ ⴰⴳⵔⴰⴽⴰⵍ ⴰⵢ ⵢⴻⵇⵇⵏⴻⵏ ⵖⴻⵔ ⵜⵓⴷⴷⵙⴰ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉ ⵡⵓⵛⵛⵉ ⴷ ⵜⴼⴻⵍⵍⴰⵃⵜ, ⵢⴻⵏⵏⴰ-ⴷ ⴷⴰⴽⴽⴻⵏ ⵍⴷⵣⴰⵢⴻⵔ ⵜⴻⵣⵎⴻⵔ ⴰⴷ ⵜⴻⵙⵏⴻⵔⵏⵉ ⵜⴰⵎⵓⴷⴻⵎⵜ ⵢⴻⵎⴳⴻⵔⵔⴰⴷⴻⵏ ⵏ ⵓⵕⴻⴱⴱⵉ ⵏ ⵢⵉⵙⴻⵍⵎⴰⵏ ⵉⵎⵉ ⴰⵢ ⵜⴻⵙⵄⴰ ⵜⴰⵣⵎⴻⵔⵜ ⴰⴽⴽⴻⵏ ⴰⴷ ⴷ-ⵜⴻⴳ ⵉⵙⴻⵏⴼⴰⵔⴻⵏ ⴷⴻⴳ ⵢⵉⵃⴻⴱⴱⴰⵙⴻⵏ ⵏ ⵡⴰⵎⴰⵏ, ⴷⴻⴳ ⵢⵉⵔⵉ ⵏ ⵢⵉⵍⴻⵍ ⴷ ⵜⵎⴻⴷⵡⵉⵏ.

ⴰⴼⴰⵔⴻⵙ ⵏ ⵍⴼⵉⵔⵎⴰⵜ ⵏ ⵓⵕⴻⴱⴱⵉ ⵏ ⵢⵉⵙⴻⵍⵎⴰⵏ ⴷⴻⴳ ⵢⵉⵍⴻⵍ ⴰⴳⵔⴰⴽⴰⵍ ⵢⴻⵇⵇⴻⵍ ⵢⵓⴳⴰⵔ, ⴷⴻⴳ 7 ⵏ ⵢⵉⵙⴻⴳⴳⴰⵙⴻⵏ-ⴰ ⵉⵏⴻⴳⴳⵓⵔⴰ, ⴰⴼⴰⵔⴻⵙ ⵏ ⵢⵉⵙⴻⵍⵎⴰⵏ ⴰⵢ ⴷ-ⵢⴻⵜⵜⵡⴰⵚⴻⵢⵢⴰⴷⴻⵏ ⴷⴻⴳ ⵢⵉⵍⴻⵍ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⴷⴰⴽⴽⴻⵏ ⴷ ⵎⴰⵚⴻⵔ ⴰⵢ ⴷ-ⵢⴻⵜⵜⴼⴰⵔⴰⵙⴻⵏ 60% ⵙⴻⴳ ⵢⵉⵙⴻⵍⵎⴰⵏ ⴰⴽⴽ ⴰⵢ ⴷ-ⵢⴻⵜⵜⴻⴽⴽⴻⵏ ⵙⴻⴳ ⵓⵕⴻⴱⴱⵉ.

ⵙⴻⴳ ⵜⴰⵎⴰ ⵏⵉⴹⴻⵏ, ⵉⴳⴻⵔ-ⴷ ⵜⴰⵎⴰⵡⵜ ⴷⴰⴽⴽⴻⵏ ⵉⵖⴻⵔⵔⵓⴱⴰ ⴰⵢ ⵢⴻⵜⵜⵉⵍⵉⵏ ⴷⴻⴳ ⵢⵉⵙⵓⴳⴰⵏ (ⵍⵎⴻⵔⵚⴰⵜ) ⵉⴷⵣⴰⵢⵔⵉⵢⴻⵏ ⵙⵙⴻⵏⵇⴰⵙⴻⵏ ⵜⵉⵎⵏⴰⴹⵉⵏ ⴰⵢⴷⴻⴳ ⴰⵔⴰ ⵜⵜⵡⴰⵕⴻⴱⴱⵉⵏ ⵢⵉⵙⴻⵍⵎⴰⵏ, ⵢⴻⵔⵏⴰ ⵢⴻⵏⵏⴰ-ⴷ ⴷⴰⴽⴽⴻⵏ ⵅⵓⵚⵚⴻⵏ ⵢⵉⵎⵓⴽⴰⵏ ⴰⵔⴰ ⴷ-ⵉⵅⴻⴷⵎⴻⵏ ⵓⵛⵛⵉ ⵉ ⵢⵉⵙⴻⵍⵎⴰⵏ, ⴰⵎ ⵡⴰⴽⴽⴻⵏ ⴰⵢ ⵓⵍⴰⵛ ⴷⴻⴳ ⵍⴷⵣⴰⵢⴻⵔ ⵍⵍⵓⵣⵉⵏⴰⵜ ⴰⵔⴰ ⵢⴻⵔⵔⴻⵏ ⴰⵢⴻⵏ ⴷ-ⵢⴻⴳⴳⵔⴰⵏ ⵙⴻⴳ ⵢⵉⵙⴻⵍⵎⴰⵏ ⴷ ⵓⵛⵛⵉ ⵉ ⵢⵉⵙⴻⵍⵎⴰⵏ ⵏⵉⴹⴻⵏ.

ⵙⴻⴳ ⵢⵉⴷⵉⵙ ⵏⵉⴹⴻⵏ, ⵉⵎⵜⵜⴻⴽⴽⵉⵢⴻⵏ ⴱⴻⴷⵔⴻⵏ-ⴷ ⴷⴰⵖ « ⵓⴳⵓⵔ ⵏ ⵍⵍⵙⴰⵙ » ⴰⵢ ⴷ-ⵢⴻⵜⵜⵎⴰⴳⴰⵔ ⵓⵕⴻⴱⴱⵉ ⵏ ⵢⵉⵙⴻⵍⵎⴰⵏ ⴷⴻⴳ ⵍⴷⵣⴰⵢⴻⵔ ⵢⴻⵔⵏⴰ ⵡⴰ ⴷ ⵓⴳⵓⵔ ⵏ ⵓⵙⵙⴻⵏⵣⵉ ⴷ ⵍⴻⵅⵚⴰⵚ ⵏ ⵓⴷⴻⵍⵍⴻⵍ ⴰⴽⴽⴻⵏ ⴰⴷ ⴳⴻⵏ ⵉⴼⴰⴷⴷⴻⵏ ⵉ ⵎⴻⴷⴷⴻⵏ ⴰⴷ ⴷ-ⵜⵜⴰⵖⴻⵏ ⵉⵙⴻⵍⵎⴰⵏ ⵏ ⵓⵕⴻⴱⴱⵉ.

ⴷⴻⴳ ⵢⵉⵊⵉⴼⴻⵕ ⵏ ⵓⵎⵢⴰⴳⴻⵔ-ⴰ, ⴰⵏⴻⵖⵍⴰⴼ ⵏ ⵓⴳⵎⴰⵔ ⵏ ⵢⵉⵙⴻⵍⵎⴰⵏ ⴷ ⵜⴻⵖⴱⵓⵍⴰ ⵏ ⵓⴳⵎⴰⵔ, ⵙⵉⴷ ⴰⵀⵎⴻⴷ ⴼⴻⵔⵔⵧⵓⴽⵀⵉ, ⵉⵡⴻⴽⴽⴻⴷ-ⴷ ⴷⴰⴽⴽⴻⵏ ⴰⵖⵍⵉⴼ-ⵏⵏⴻⵙ ⵍⴰ ⵢⴻⵜⵜⵏⴰⴷⵉ ⴰⵎⴻⴽ ⴰⵔⴰ ⵉⵚⴻⴳⴳⴻⵎ ⵙⵙⵓⵇ ⵏ ⵢⵉⵙⴻⵍⵎⴰⵏ ⵙ ⵓⵎⴰⵜⴰ, ⴷ ⵙⵙⵓⵇ ⵏ ⵢⵉⵙⴻⵍⵎⴰⵏ ⵏ ⵓⵕⴻⴱⴱⵉ ⵙ ⵍⵅⵓⵚⵓⵚ, ⴰⴽⴽⴻⵏ ⴰⴷ ⴷ-ⵔⵔⴻⵏ ⴷⴻⴳ ⵍⴻⵃⵙⴰⴱ-ⵏⵙⴻⵏ ⴰⵙⵙⵓⵜⴻⵔ ⵢⴻⵔⵏⴰ ⴰⴷ ⴷ-ⵙⵙⵉⴷⵉⴼⴻⵏ ⵉⴷⵔⵉⵎⴻⵏ ⵉ ⵡⵉⴷ ⵢⴻⵙⵙⴻⴼⵜⵉⵏ ⴷⴻⴳ-ⵙⴻⵏ.

ⴰⵖⵍⵉⴼ ⵍⴰ ⴷ-ⵢⴻⵙⵙⵓⴽⴽⵓⵢ ⵜⵉⵟ ⴷⴰⵖ ⵖⴻⴼ ⵙⵙⵓⵎⴰⵜ ⵏ ⵢⵉⴼⴰⵔⵉⵙⴻⵏ ⵏ ⵓⵕⴻⴱⴱⵉ ⵏ ⵢⵉⵙⴻⵍⵎⴰⵏ, ⴰⵛⴽⵓ ⵔⵔⴱⴻⵃ ⵏ ⵢⵉⵙⴻⵏⴼⴰⵔⴻⵏ ⵏ ⵓⵕⴻⴱⴱⵉ ⵏ ⵢⵉⵙⴻⵍⵎⴰⵏ ⵢⴻⵇⵇⴻⵏ ⴷⴰⵖ ⵖⴻⵔ ⵡⴰⵏⴻⵛⵜ ⴰⵔⴰ ⴷ-ⵢⴻⵙⵇⴰⵎ ⵓⵅⴻⴷⴷⵉⵎ-ⴰ, ⵍⴼⴰⵢⴷⴰ ⴷ ⵡⴰⵏⴻⵛⵜ ⴰⵔⴰ ⵢⴻⵏⵣⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵙⵎⴻⴽⵜⵉ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⴼⴰⵔⴻⵙ ⵏ ⵜⵓⵛⵛⵉⵜ ⵏ ⵢⵉⵙⴻⵍⵎⴰⵏ, ⵎⴰⵙⵙ ⴼⴻⵔⵔⵧⵓⴽⵀⵉ ⵢⴻⵏⵏⴰ-ⴷ ⴷⴰⴽⴽⴻⵏ ⵢⴻⵍⵍⴰ ⵡⴰⵀⵉⵍ ⵉ ⵍⵎⴻⵏⴷ ⵏ ⵓⵙⵏⴻⵔⵏⵉ ⵏ ⵜⴻⵎⴳⵓⵔⵉ-ⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⴷⴰⴽⴽⴻⵏ ⴰⴼⴰⵔⴻⵙ ⵏ ⵜⵓⵛⵛⵉⵜ ⵏ ⵢⵉⵙⴻⵍⵎⴰⵏ ⴷ ⴰⵛⵇⵉⵔⵔⴻⵡ ⴰⵎⴻⵇⵔⴰⵏ ⵢⴻⵔⵏⴰ ⴰⴽⴽⴻⵏ ⴰⴷ ⵜⴰⵡⴻⴹ ⵜⵎⵓⵔⵜ ⴰⴷ ⴷ-ⵜⴻⵜⵜⴼⴰⵔⴰⵙ 80 000 ⵏ ⵢⵉⵟⵓⵏⴻⵏ ⵏ ⵢⵉⵙⴻⵍⵎⴰⵏ ⵏ ⵓⵕⴻⴱⴱⵉ, ⵢⴻⵙⵙⴻⴼⴽ ⴰⴷ ⴷ-ⵜⵅⴻⴷⴷⴻⵎ 160 000 ⵏ ⵢⵉⵟⵓⵏⴻⵏ ⵏ ⵜⵓⵛⵛⵉⵜ ⵏ ⵢⵉⵙⴻⵍⵎⴰⵏ.

ⵙⴻⴳ ⵜⴰⵎⴰ ⵏⵉⴹⴻⵏ, ⵢⴻⵏⵏⴰ-ⴷ ⴷⴰⵖ ⴷⴰⴽⴽⴻⵏ ⵍⴰ ⴷ-ⵢⴻⵜⵜⵉⵍⵉ ⵓⵏⴰⴷⵉ ⵖⴻⴼ ⵍⴻⵚⵏⴰⴼ ⵉⵎⴰⵢⵏⵓⵜⴻⵏ ⵏ ⵢⵉⵙⴻⵍⵎⴰⵏ ⵏ ⵓⵕⴻⴱⴱⵉ ⴰⵔⴰ ⵇⵇⵍⴻⵏ ⴰⴷ ⵜⴻⵏ-ⴽⴻⵙⵙⴻⵏ ⵙⴻⴳ-ⴰ ⵖⴻⵔ ⵙⴷⴰⵜ ⵉⵎⵉ ⴰⵢ ⵣⴻⵎⵔⴻⵏ ⵉ ⵓⵏⴻⵣⵡⵓ ⵏ ⵜⵎⵓⵔⵜ ⵏ ⵍⴷⵣⴰⵢⴻⵔ ⵢⴻⵔⵏⴰ ⴰⴷ ⴷ-ⵇⴰⵎⴻⵏ ⴰⵙⵙⵓⵜⴻⵔ ⵏ ⵙⵙⵓⵇ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴰⴽⴽⴻⵏ ⵡⵉⴷ ⴰⵢ ⵢⴻⵙⵙⴻⴼⵜⴰⵢⴻⵏ ⴷⴻⴳ ⵓⵃⵔⵉⵛ-ⴰ ⵙⵙⴰⴼⴻⵙⵙⴻⵏ-ⴰⵙⴻⵏ ⵍⴻⵛⵖⴰⵍ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵔⴻⴹⴹⴰⵍ ⵏ ⵢⵉⴷⵔⵉⵎⴻⵏ ⵙⴻⴳ ⵜⴱⴰⵏⴽⴰ, ⵍⴻⴽⵡⴰⵖⴻⴹ, ⴰⵙⵙⵉⵍⴻⵖ ⴷ ⵓⵏⴰⴷⵉ.