Asebter amenzawi

Aselway Bouteflika yemmuger aneɣlaf afṛensis n tɣawsiwin n uzɣar

LDZAYER TAMANEƔT – Aselway n tegduda, Abdelaziz Bouteflika, yemmuger ass n ttlata deg Ldzayer Tamaneɣt aneɣlaf afṛensis n tɣawsiwin n uzɣar d tneflit tagraɣlant, Laurent Fabius.

Amyager- yella-d s uḥdaṛ n uneɣlaf n tɣawsiwin n uzɣar Ramtane Lamamra, aneɣlaf n temguri d lminat Abdeslem Bouchouareb, aneɣlaf n umesni Amar Ghoul d uneɣlaf anesmigal n tɣawsiwin n Lmeɣreb d Tefriqt, Abdelkader Messahel.

Ldzayer-Fṛansa: Fabius « yefṛeḥ » s « ugerrez » n wassaɣen ucriken

Aneɣlaf afṛensis n tɣawsiwin n uzɣar d tneflit tagraɣlant, Laurent Fabius, yenna-d ass n ttlata deg Ldzayer dakken « yefṛeḥ » s « ugerrez » n wassaɣen ucriken gar Ldzayer d Fṛansa.

« Imir-a kan ay iyi-yemmuger uselway Bouteflika yerna nezzi-d ɣef wakk timsal timeqranin, s litteɛ yerna s telqey, deg wayen yerzan assaɣen-nneɣ ucriken ay igerzen deg wakk idisan », ɣef wakken ay d-yenna Mass Fabius deg yiwet n tseɣrut n tɣemsa sdeffir umyager-nni ay d-yellan gar-as d uselway n tegduda, Abdelaziz Bouteflika.

Dɣa yenna-d dakken « agerrez » n wassaɣen-a d ayen yessefṛaḥen, acku, ɣef wakken ay d-yessefhem, aya yusa-d seg ṛṛay n yiselwayen Bouteflika d François Hollande ay iɛewwlen, kraḍ n yiseggasen aya, ad d-sbedden « ticcurka ay d-yufraren » gar snat-a n tmura.

Deg wayen yerzan ayen ay yessawel Mass Fabius d uselway n tegduda, aneɣlaf afṛensis n tɣawsiwin n uzɣar yenna-d dakken aselway Bouteflika « yessukkuy tiṭ s telqey » ɣef temsal, yerna « axemmem-nnes igerrez s waṭas ».

Aneɣlaf n tɣawsiwin n uzɣar yenna-d dakken yessukk-d tiṭ d uselway n tegduda ɣef temsal yeqqnen ɣer « tkelsertit d tsuddest tagraɣlant ama deg Tefriqt neɣ deg Temrikt Talatinit ».

Yerna, ifuṛes Mass Fabius deg tegnit-a, akken ad d-ixebber dakken aselway François Hollande ad d-yerzu ɣef Ldzayer ayyur ay d-yetteddun (Yunyu), yerna yenna-d dakken yesqerdec ɣef ussewjed n terzi-a d uselway Bouteflika.