ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵄⴻⵙⵙⴰⵙ ⵓⴷⵎⴰⵡⴰⵏ ⵏ ⴽⵀⴻⵍⵉⴼⴰ ⵢⴻⵏⵏⴰ-ⴷ ⵢⴻⵊⴱⴻⴷ-ⴷ ⵉⴷⵔⵉⵎⴻⵏ ⵙⴻⴳ ⵓⵙⴻⵏⴷⵓⵇ ⴰⴳⴻⵊⴷⴰⵏ ⵙ « ⵍⴰⵎⴻⵕ » ⵏ ⴽⵀⴻⵍⵉⴼⴰ ⵙ ⵜⵉⵎⵎⴰⴷ-ⵏⵏⴻⵙ

ⵍⴻⴱⵍⵉⴷⴰ – ⴰⵎⴻⵜⵜⵀⵓⵎ ⴰⴱⴷⴻⵍⵧⵓⴰⵀⴰⴱ ⵔⴻⴷⴰ, ⴰⵄⴻⵙⵙⴰⵙ ⵓⴷⵎⴰⵡⴰⵏ ⵏ ⴰⴱⴷⴻⵍⵎⵧⵓⵎⴻⵏⴻ ⴽⵀⴻⵍⵉⴼⴰ, ⵢⴻⵏⵏⴰ-ⴷ ⴷⴻⴳ ⵓⵅⵅⴰⵎ ⵏ ⵛⵛⵕⴻⵄ ⵏ ⵍⴻⴱⵍⵉⴷⴰ ⴷⴰⴽⴽⴻⵏ ⵢⴻⵊⴱⴻⴷ-ⴷ ⵉⴷⵔⵉⵎⴻⵏ ⵙ ⵓⴷⵉⵏⴰⵕ ⴷ ⵓⵇⴰⵔⵉⴹ ⴰⴱⴻⵕⵕⴰⵏⵉ ⵙⴻⴳ ⵓⵙⴻⵏⴷⵓⵇ ⵏ ⵜⴱⴰⵏⴽⴰ ⵏ ⵛⵛⵔⴰⴳⴰ ⵙ « ⵍⴰⵎⴻⵕ ⵏ ⴰⴱⴷⴻⵍⵎⵧⵓⵎⴻⵏⴻ ⵙ ⵜⵉⵎⵎⴰⴷ-ⵏⵏⴻⵙ ⵢⴻⵔⵏⴰ ⵡⴰⵔ ⵎⴰ ⵢⴻⵙⵜⴻⵏⵢⴰ ⵓⵍⴰ ⴷ ⵢⵉⵡⴻⵏ ⵏ ⵍⴽⴰⵖⴻⴹ ».

ⵙ ⵡⴰⵢⴰ, ⴰⵎⴻⵜⵜⵀⵓⵎ-ⴰ ⵉⵄⴰⵡⴻⴷ-ⴷ ⵉ ⵡⴰⵢⴻⵏ ⵢⴻⵏⵏⴰ ⵢⴰⴳⵉ ⵉ ⵍⵇⴰⴹⵉ ⵏ ⵓⵃⵜⴰⵛ ⴷ ⵜⴻⵎⵙⵓⵍⵜⴰ ⵜⴰⵖⴻⴷⵎⴰⵏⵜ, ⵢⴻⵔⵏⴰ ⵢⴻⵏⵏⴰ-ⴷ ⴷⴰⴽⴽⴻⵏ ⵉⴳⴰ ⴰⵢⴰ ⵙ ⵍⴰⵎⴻⵕ ⵏ ⴰⴱⴷⴻⵍⵎⵧⵓⵎⴻⵏⴻ ⴽⵀⴻⵍⵉⴼⴰ ⴰⵢ ⴰⵙ-ⵢⴻⵏⵏⴰⵏ ⴰⴷ ⴷ-ⵢⴻⵊⴱⴻⴷ ⵉⴷⵔⵉⵎⴻⵏ ⵙ ⵓⴷⵉⵏⴰⵕ ⴷ ⵓⵇⴰⵔⵉⴹ ⴰⴱⴻⵕⵕⴰⵏⵉ ⵙⴻⴳ ⵜⵏⴻⴳⴳⴰ ⵏ ⵜⴱⴰⵏⴽⴰ ⵏ ⴽⵀⴰⵍⵉⴼⴰ ⵙⴻⴳ ⵛⵛⵔⴰⴳⴰ, ⵢⴻⵔⵏⴰ ⵢⴻⵊⴱⴻⴷ-ⴷ ⵉⴷⵔⵉⵎⴻⵏ ⵙⴻⴳ-ⵉⵏⵏⴰ ⴰⵛⵃⴰⵍ ⴷ ⵜⵉⴽⴽⴻⵍⵜ.

ⴰⴱⴷⴻⵍⵧⵓⴰⵀⴰⴱ ⵔⴻⴷⴰ ⵢⴻⵏⵏⴰ-ⴷ ⴷⴰⴽⴽⴻⵏ ⵢⴻⴱⴷⴰ ⵉⵅⴻⴷⴷⴻⵎ ⴷⴻⴳ ⵜⴻⴳⵔⴰⵡⵜ ⵏ ⴽⵀⴰⵍⵉⴼⴰ ⴷⴻⴳ 2001 ⴷⴻⴼⴼⵉⵔ ⵎⴰ ⵢⴻⵡⵡⵉ ⵍⴰⵏⵜⵔⵉⵜ-ⵏⵏⴻⵙ ⵓⵇⴱⴻⵍ ⵍⴰⵡⴰⵏ ⵙⴻⴳ ⵢⵉⴳⴻⵏ ⴰⵖⴻⵍⵏⴰⵡ ⴰⵖⴻⵔⴼⴰⵏ ⴰⵏⴷⴰ ⴰⵢ ⵢⴻⵍⵍⴰ ⴷ ⴰⵎⴻⵏⵣⴰⴹ. ⴷⵖⴰ ⵙ ⵡⴰⵢⴰ, ⵢⴻⵇⵇⴻⵍ ⵉⵅⴻⴷⴷⴻⵎ ⴷ ⴰⵄⴻⵙⵙⴰⵙ ⵓⴷⵎⴰⵡⴰⵏ ⵏ ⴰⴱⴷⴻⵍⵎⵧⵓⵎⴻⵏⴻ ⴽⵀⴻⵍⵉⴼⴰ, ⴷⵖⴰ ⴷ ⴰⵢⴰ ⴰⵢ ⵜ-ⵢⴻⵊⵊⴰⵏ ⴰⴷ ⵢⴻⵜⵜⴻⴷⴷⵓ ⴷ ⴽⵀⴻⵍⵉⴼⴰ ⴷⴻⴳ ⵢⵉⵙⵙⵉⴽⵍⴻⵏ-ⵏⵏⴻⵙ ⵖⴻⵔ ⵡⴰⵟⴰⵙ ⵏ ⵜⵎⵓⵔⴰ, ⵢⴻⵔⵏⴰ ⵙ ⵡⴰⵢⴰ, ⵢⴻⵥⵔⴰ ⴰⵟⴰⵙ ⵏ ⵜⵖⴰⵡⵙⵉⵡⵉⵏ ⴷ ⵜⵜⴼⴰⵚⵉⵍ ⵖⴻⴼ ⵜⵎⴻⴷⴷⵓⵔⵜ ⵏ ⵢⴰⵍ ⴰⵙⵙ ⵏ ⴽⵀⴻⵍⵉⴼⴰ.

ⵢⴻⵏⵏⴰ-ⴷ ⴷⴰⵖ ⴷⴰⴽⴽⴻⵏ ⵢⴻⵍⵍⴰ ⵢⴻⵜⵜⴰⵡⵉ-ⴰⵙ-ⴷ ⵉ ⴰⴱⴷⴻⵍⵎⵧⵓⵎⴻⵏⴻ ⴽⵀⴻⵍⵉⴼⴰ ⴳⴰⵔ 10 ⴷ 50 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵙⴰⵏⵜⵉⵎⴻⵏ ⴷ ⵢⵉⴷⵔⵉⵎⴻⵏ ⵏⵉⴹⴻⵏ ⵙ ⵡⵓⵕⵓ ⴷ ⵓⴷⵓⵍⴰⵕ, ⵢⴻⵔⵏⴰ, ⵖⴻⴼ ⵍⴻⵃⵙⴰⴱ ⵏ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ, ⵉⴷⵔⵉⵎⴻⵏ-ⴰ ⵢⴻⵍⵍⴰ ⵢⴻⵜⵜⵚⴻⵔⵔⵉⴼ-ⵉⵜⴻⵏ ⴰⴱⴷⴻⵍⵎⵧⵓⵎⴻⵏⴻ ⴷⴻⴳ ⵢⵉⵙⵙⵉⴽⵍⴻⵏ-ⵏⵏⴻⵙ (ⴰⵚⴰⴼⴻⵔ) ⵓⴷⵎⴰⵡⴰⵏⴻⵏ, ⵢⴻⵔⵏⴰ, ⵜⵉⴽⴽⴰⵍ, ⵢⴻⵍⵍⴰ ⵢⴻⵜⵜⵅⴻⵍⵍⵉⵚ ⵢⴻⵙ-ⵙⴻⵏ ⵉⵅⴻⴷⴷⴰⵎⴻⵏ ⵏ ⵜⵣⴻⴷⵓⵖⵜ-ⵏⵏⴻⵙ ⵜⵓⴷⵎⴰⵡⴰⵏⵜ ⵏⴻⵖ ⵢⴻⵜⵜⵚⴻⵔⵔⵉⴼ-ⵉⵜⴻⵏ ⴷⴻⴳ ⵍⴻⵄⵢⵓⴷⴰⵜ.

ⴰⵎⴻⵜⵜⵀⵓⵎ-ⴰ ⵢⴻⵏⵏⴰ-ⴷ ⴷⴰⴽⴽⴻⵏ ⵉⴷⵔⵉⵎⴻⵏ-ⴰ ⵢⴻⵍⵍⴰ ⵢⴻⵜⵜⴰⴽⴼ-ⴰⵙ-ⵜⴻⵏ-ⵉⴷ ⵢⵉⵡⴻⵏ ⵏ ⵓⵔⴳⴰⵣ ⵉⵙⴻⵎ-ⵏⵏⴻⵙ ⴰⴽⵍⵉ ⵢⵧⵓⵛⴻⴼ ⴰⵢ ⵢⴻⵍⵍⴰⵏ, ⴷⴻⴳ ⵜⴰⵍⵍⵉⵜ-ⵏⵏⵉ, ⴷ ⵉⵎⴹⴻⴱⴱⴻⵔ ⵏ ⵓⵙⴻⵏⴷⵓⵇ ⵏ ⵜⵏⴻⴳⴳⴰ ⵏ ⵜⴱⴰⵏⴽⴰ ⵏ ⵛⵛⵔⴰⴳⴰ, ⵡⴰⵔ ⵎⴰ ⵢⴻⵍⵍⴰ-ⴷ ⵍⴽⴰⵖⴻⴹ ⵖⴻⴼ ⵜⵓⴽⵛⵉ-ⴰ ⵏ ⵢⵉⴷⵔⵉⵎⴻⵏ, ⵢⴻⵔⵏⴰ ⵓⵔ ⵢⴻⵥⵔⵉ ⴰⵔⴰ ⵎⴰ ⵢⴻⵍⵍⴰ ⵜⵜⵡⴰⵔⵓⵏ ⵢⵉⴷⵔⵉⵎⴻⵏ-ⴰ ⴷⴻⴳ ⵓⵣⵎⴰⵎ ⵏ ⵜⴱⴰⵏⴽⴰ ⵏⴻⵖ ⵓⵀⵓ.

ⴰⵎⴻⵜⵜⵀⵓⵎ ⵢⴻⵏⴽⴻⵕ ⴷⴰⴽⴽⴻⵏ ⵢⴻⵍⵍⴰ ⵉⵅⴻⴷⴷⴻⵎ ⴷ ⴰⵄⴻⵙⵙⴰⵙ ⵙ ⵍⴻⵙⵍⴰⵃ ⵏ ⵜⵎⴻⵙ ⴰⵢ ⴰⵙ-ⵢⴻⴼⴽⴰ ⴰⴱⴷⴻⵍⵎⵧⵓⵎⴻⵏⴻ. ⵙⴻⴳ ⵜⴰⵎⴰ ⵏⵉⴹⴻⵏ, ⵢⴻⵙⵙⴻⴼⵀⴻⵎ-ⴷ ⴰⵙⵙⴰⵖⴻⵏ ⴰⵢ ⵉⵛⴻⵔⴽⴻⵏ ⴰⴱⴷⴻⵍⵎⵧⵓⵎⴻⵏⴻ ⴷ ⴽⵔⴰ ⵙⴻⴳ ⵢⵉⵏⴻⵚⵚⴰⵃⴻⵏ-ⵏⵏⴻⵙ ⴰⵎ ⵓⵍⵓⴱⵏⴰⵏⵉ ⵔⴰⴻⴷ ⴻⵛⵀⴰⵎⴰⴽⵀ ⴰⵢ ⵢⴻⵍⵍⴰⵏ ⵢⴻⵙⵙⵓⵎⵓⵔ-ⴷ ⵜⵉⴽⵜⴰ ⵜⵉⵎⴰⵢⵏⵓⵜⵉⵏ ⵖⴻⴼ ⴰⴱⴷⴻⵍⵎⵧⵓⵎⴻⵏⴻ ⴷⴻⴳ ⴰⵢⴻⵏ ⵢⴻⵔⵣⴰⵏ ⴰⵙⵙⴻⴼⵜⵉ ⴷⴻⴳ ⵢⵉⵏⵓⵔⴰⵔ ⵢⴻⵎⴳⴻⵔⵔⴰⴷⴻⵏ.

ⴰⵎⴻⵜⵜⵀⵓⵎ ⵢⴻⵏⴽⴻⵕ ⴷⴰⵖ ⴷⴰⴽⴽⴻⵏ ⵢⴻⵙⴼⴰⵢⴷⵉ-ⴷ ⵙⴻⴳ ⴽⵔⴰ ⵏ ⵜⵖⴰⵡⵙⴰ ⵉⵣⴰⴷⴻⵏ ⴷⴻⴳ ⵓⵅⴻⴷⴷⵉⵎ-ⵏⵏⴻⵙ ⴷⴻⴳ ⵜⴻⴳⵔⴰⵡⵜ ⵏ ⴻⵍ ⴽⵀⴰⵍⵉⴼⴰ ⴰⵎ ⵓⵔⴻⴹⴹⴰⵍ ⵙⴻⴳ ⵜⴱⴰⵏⴽⴰ ⵏⴻⵖ ⴽⵔⴰ ⵏ ⵓⵎⵉⴹⴰⵏ ⴰⵎⴰⵥⵍⴰⵢ ⵎⴻⵏⵖⵉⵔ ⵜⴰⵛⴻⵀⵕⵉⵜ-ⵏⵏⴻⵙ ⴰⵢⴷⴻⴳ ⵢⴻⵍⵍⴰ ⵢⴻⵜⵜⴰⵖ 15 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵙⴰⵏⵜⵉⵎⴻⵏ.

ⵎⵉ ⵜ-ⵢⴻⵙⵙⴻⵇⵙⴰ ⵢⵉⵎⵡⴻⴽⴽⴻⵍ ⴰⵎⴰⵜⵓ ⵖⴻⴼ 500 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵙⴰⵏⵜⵉⵎⴻⵏ ⴰⵢ ⴰⵙ-ⵢⴻⵙⵙⵓⵜⴻⵔ ⴽⵀⴻⵍⵉⴼⴰ ⴰⴷ ⴰⵙ-ⵜⴻⵏ-ⵉⴷ-ⵢⴻⵊⴱⴻⴷ ⵎⵉ ⵢⴻⵍⵍⴰ ⴷⴻⴳ ⵓⵣⵖⴰⵔ, ⴰⴱⴷⴻⵍⵧⵓⴰⵀⴰⴱ ⵔⴻⴷⴰ ⵢⴻⵏⵏⴰ-ⴷ ⴷⴰⴽⴽⴻⵏ ⵓⵔ ⴷ-ⵢⴻⵊⴱⵉⴷ ⴰⵔⴰ ⵉⴷⵔⵉⵎⴻⵏ-ⴰ ⴰⵛⴽⵓ ⵓⵔ ⵢⴻⵙⵙⴰⵡⴻⴹ ⴰⵔⴰ ⴰⴷ ⴷ-ⵢⴻⵎⵍⵉⵍ ⴰⴽⵍⵉ ⵢⵧⵓⵛⴻⴼ, ⵢⴻⵔⵏⴰ ⵢⴻⵏⵏⴰ-ⴷ ⴷⴰⴽⴽⴻⵏ ⵙⵙⵓⵎⴰ ⵜⴰⵎⴻⵇⵔⴰⵏⵜ ⴰⴽⴽ ⴰⵢ ⴷ-ⵢⴻⵊⴱⴻⴷ ⵙⴻⴳ ⵜⴱⴰⵏⴽⴰ ⴷ ⵜⵉⵏ ⵏ 150 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵙⴰⵏⵜⵉⵎⴻⵏ.

ⴰⵎⴻⵜⵜⵀⵓⵎ-ⴰ ⵜⵜⵡⴰⵃⴻⴽⵎⴻⵏ ⴼⴻⵍⵍ-ⴰⵙ ⵢⴰⴳⵉ ⵙⵉⵏ ⵏ ⵢⵉⵙⴻⴳⴳⴰⵙⴻⵏ ⵏ ⵍⵃⴻⴱⵙ ⴷ ⵍⴻⵅⴹⴻⵢⵢⴰ ⵏ 20 000 ⵏ ⵢⵉⴷⵉⵏⴰⵕⴻⵏ ⵖⴻⴼ ⵓⵜⵜⴻⴽⴽⵉ-ⵏⵏⴻⵙ ⴷⴻⴳ ⵜⴻⴳⵔⴰⵡⵜ ⵏ ⵓⵙⵙⴻⴼⵙⴻⴷ, ⵜⵓⴽⴻⵔⴹⴰ ⴷ ⵓⴽⴻⵍⵍⴻⵅ ⵙ ⵍⴰⵎⴰⵏ.

ⵙ ⵓⵊⴻⵎⵎⴰⵍ, 71 ⵏ ⵢⵉⵎⴻⵜⵜⵀⵓⵎⴻⵏ (ⵙⴷⴻⴼⴼⵉⵔ ⵎⴰ ⵎⵎⵓⵜⴻⵏ 5 ⵏⵉⴹⴻⵏ) ⴰⵢ ⵍⴰ ⵢⴻⵜⵜⵄⴻⴷⴷⵉⵏ ⴷⴻⴳ ⵛⵛⵕⴻⵄ ⴷⴻⴳ ⵜⴻⵎⵙⴰⵍⵜ-ⴰ, 21 ⵙⴻⴳ-ⵙⴻⵏ ⴰⵜⵏⵉ ⴷⴻⴳ ⵍⵃⴻⴱⵙ ⴷⴻⴳ ⵡⴰⴽⵓⴷ ⴰⵢⴷⴻⴳ ⵡⵉⵢⴰⴹ ⵍⴰ ⵜⵜⵄⴻⴷⴷⵉⵏ ⴷⴻⴳ ⵛⵛⵕⴻⵄ ⴷ ⵉⵍⴻⵍⵍⵉⵢⴻⵏ.

ⵎⴻⵏⵖⵉⵔ ⵉⵎⵛⴻⵜⴽⵉⵢⴻⵏ ⴷ ⵡⵉⴷ ⵢⴻⵏⴹⴻⵔⵔⴻⵏ, ⵓⴳⴰⵔ ⵏ 300 ⵏ ⵢⵉⵏⴰⴳⴰⵏ ⴰⵔⴰ ⴷ-ⵉⵛⴻⵀⴷⴻⵏ ⴷⴻⴳ ⵜⴻⵎⵙⴰⵍⵜ-ⴰ.