ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴳⵔⵉⵏⴻ ⵉⴳⴻⵔ-ⴷ ⵜⵉⵖⵔⵉ ⵉ ⵓⵙⵙⴻⵍⵀⵓ ⵏ ⵜⴻⴳⵏⵉⵜ ⵏ ⵜⵓⴷⴻⵔⵜ ⴷ ⵓⵅⴻⴷⴷⵉⵎ ⵏ ⵢⵉⵏⴻⵖⵎⴰⵙⴻⵏ

ⵍⴷⵣⴰⵢⴻⵔ ⵜⴰⵎⴰⵏⴻƔⵜ – ⴰⵏⴻⵖⵍⴰⴼ ⵏ ⵜⴻⵖⵡⴰⵍⵜ, ⵀⴰⵎⵉⴷ ⴳⵔⵉⵏⴻ, ⵉⵄⴰⵡⴻⴷ-ⴷ, ⴰⵙⵙ ⵏ ⵍⴰⵕⴻⴱⵄⴰ ⴷⴻⴳ ⵍⴷⵣⴰⵢⴻⵔ ⵜⴰⵎⴰⵏⴻⵖⵜ, ⵜⵉⵖⵔⵉ-ⵏⵏⴻⵙ ⵉ ⵍⵎⴻⵏⴷ ⵏ ⵓⵙⵙⴻⵍⵀⵓ ⵏ ⵜⴻⴳⵏⵉⵜ ⵜⴰⵏⵎⴻⵜⵜⵉⵜ-ⵜⴰⵎⵙⴰⴷⵓⵔⵜ ⵏ ⵢⵉⵏⴻⵖⵎⴰⵙⴻⵏ. « ⵉⵎⴰⵥⵔⴰⴳⴻⵏ ⵏ ⵜⵖⴻⵎⵙⴰ ⵢⴻⵙⵙⴻⴼⴽ ⴰⴷ ⵙⵙⴻⵃⴱⵉⴱⵔⴻⵏ ⵖⴻⴼ ⵓⵙⵙⴻⵍⵀⵓ ⵏ ⵜⴻⴳⵏⴰⵜⵉⵏ ⵜⵉⵎⵙⴰⴷⵓⵔⵉⵏ ⴷ ⵜⴻⵏⵎⴻⵜⵜⵉⵢⵉⵏ ⵏ ⵢⵉⵏⴻⵖⵎⴰⵙⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⴳⵔⵉⵏⴻ ⴷⴻⴳ ⵢⵉⵊⵉⴼⴻⵕ ⵏ ⵓⵔⵥⴰⵎ ⵏ ⵜⵎⴻⵙⵔⵉⵜ ⵏ ⵜⴻⵖⵡⴰⵍⵜ « ⵜⵉⵥⵓⵔⵉⵢⵉⵏ ⴷ ⵚⵚⴻⵏⵄⴰⵜ ⵏ ⵜⵖⴻⵎⵙⴰ », ⴰⵎ ⵡⴰⴽⴽⴻⵏ ⴰⵢ ⴷ-ⵉⵃⴻⵜⵜⴻⵜ ⵖⴻⴼ « ⵍⵡⴰⵊⴻⴱ ⵏ ⵢⵉⵏⴻⵖⵎⴰⵙⴻⵏ ⴰⴽⴽⴻⵏ ⴰⴷ ⴳⴻⵏ ⵛⵛⵖⴻⵍ-ⵏⵙⴻⵏ ⵙ ⵓⵇⴰⴷⴻⵔ ⵏ ⵢⵉⵍⵓⴳⴰⵏ ⵏ ⵚⵚⴻⵏⵄⴰ ⴷ ⵜⴻⵣⴷⴻⴳ-ⵏⵏⴻⵙ ».

ⴰⵏⴻⵖⵍⴰⴼ ⵉⴳⴻⵔ-ⴷ ⴷⴰⵖ ⵜⵉⵖⵔⵉ ⵉ ⵢⵉⵏⴻⵖⵎⴰⵙⴻⵏ ⴰⴽⴽⴻⵏ ⴰⴷ ⵜⵜⴳⴻⵏ ⴰⵅⴻⴷⴷⵉⵎ ⴷ ⴰⵎⵙⴰⴷⵓⵔ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵙⴻⴽⴽⴻⵔ ⵏ ⵢⵉⵙⴰⵍⴰⵏ, ⴰⵎ ⵡⴰⴽⴽⴻⵏ ⴰⵢ ⴷ-ⵉⵃⴻⵜⵜⴻⵜ ⴷⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵢⵉⵍⵉ ⵓⵙⵙⵉⵍⴻⵖ ⵢⴻⵜⵜⴽⴻⵎⵎⵉⵍⴻⵏ ⵉ ⵍⴼⴰⵢⴷⴰ ⵏ ⵢⵉⵏⴻⵖⵎⴰⵙⴻⵏ. ⵙⴻⴳ ⵢⵉⴷⵉⵙ ⵏⵉⴹⴻⵏ, ⴰⵏⴻⵖⵍⴰⴼ ⵢⴻⵏⵏⴰ-ⴷ ⴷⴰⴽⴽⴻⵏ ⵜⴰⵎⴻⵙⵔⵉⵜ-ⴰ, ⴰⵢ ⴷ-ⵢⴻⵍⵍⴰⵏ ⵙ ⵓⴱⴻⵔⵔⵉⵃ ⵏ « ⵉⵙⵡⵉ ⴷ ⴰⵅⴻⴷⴷⵉⵎ ⴰⵎⵙⴰⴷⵓⵔ », ⵜⴻⵍⵍⴰ-ⴷ ⴰⴽⴽⴻⵏ ⴰⴷ ⵎⵙⵉⵡⵍⴻⵏ ⴷⴻⴳ-ⵙ ⵢⵉⴷⵉⵙⴰⵏ ⵢⴻⵎⴳⴻⵔⵔⴰⴷⴻⵏ ⴰⵢ ⵉⵅⴻⴷⴷⵎⴻⵏ ⴷⴻⴳ ⵜⴻⵖⵡⴰⵍⵜ ⴷ ⵜⵜⴰⵡⵉⵍⴰⵜ ⵏ ⵢⵉⵙⴰⵍⴰⵏ ⵢⴻⵔⵏⴰ ⴰⴷ ⵎⴱⴰⴷⴷⴰⵍⴻⵏ ⵜⵜⴻⵊⵕⵉⴱⴰⵜ.

ⵙⴻⴳ ⵢⵉⴷⵉⵙ ⵏⵉⴹⴻⵏ, ⵢⴻⵏⵏⴰ-ⴷ ⵎⴰⵙⵙ ⴳⵔⵉⵏⴻ ⴷⴰⴽⴽⴻⵏ ⴰⵙⴻⵏⴼⴰⵔ ⵏ ⵍⵇⴰⵏⵓⵏ ⵖⴻⴼ ⵓⴷⴻⵍⵍⴻⵍ « ⵡⴻⵔⵊⵉⵏ ⴷ-ⵢⴻⵙⵙⵓⴽⴽ ⴼⴻⵍⵍ-ⴰⵙ ⵜⵉⵟ ⵓⵙⴻⵇⵇⴰⵎⵓ ⵏ ⵓⵏⴰⴱⴰⴹ ». ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⴰⴽⴰⵔⴹⴰ ⵏ ⵓⵏⴻⵖⵎⴰⵙ ⴰⵎⵙⴰⴷⵓⵔ, ⵢⴻⵏⵏⴰ-ⴷ ⵓⵏⴻⵖⵍⴰⴼ ⴷⴰⴽⴽⴻⵏ 2.600 ⵏ ⵜⴽⴰⵔⴹⵉⵡⵉⵏ ⴰⵢ ⵢⴻⵜⵜⵓⵏⴻⴼⴽⴻⵏ ⴰⵔ ⴰⵙⵙ-ⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴰⴽⴽⴻⵏ ⴰⵏⵔⴰⵔ ⵏ ⵜⵜⴰⵡⵉⵍⴰⵜ ⵏ ⵢⵉⵙⴰⵍⴰⵏ ⵍⵍⴰⵏ ⴷⴻⴳ-ⵙ ⴰⵙⵙ-ⴰ 400 ⵏ ⵢⵉⵖⵎⵉⵙⴻⵏ ⴷ ⵜⴻⵙⵖⵓⵏⵉⵏ, ⴳⴰⵔ-ⴰⵙⴻⵏ 150 ⵏ ⵢⵉⵖⵎⵉⵙⴻⵏ ⴰⵢ ⴷ-ⵢⴻⵜⵜⴻⴼⴼⵖⴻⵏ ⵢⴰⵍ ⴰⵙⵙ.

ⴷⴻⴳ ⵜⴻⴳⵏⵉⵜ-ⴰ ⴷⴰⵖ, ⵢⴻⵏⵏⴰ-ⴷ ⵓⵏⴻⵖⵍⴰⴼ ⴷⴰⴽⴽⴻⵏ ⵜⴰⴷⵓⴽⵍⵉ ⵜⴰⵎⴰⵜⵓⵜ ⵏ ⵢⵉⵅⴻⴷⴷⴰⵎⴻⵏ ⵉⴷⵣⴰⵢⵔⵉⵢⴻⵏ (ⵓⴳⵜⴰ) ⵜⴻⵖⵜⴻⵙ ⴰⴽⴽⴻⵏ ⴰⴷ ⴷ-ⵜⴻⵔⵔ ⵍⵊⴻⵀⴷ ⵉ ⵜⴼⵉⴷⵉⵕⴰⵍⵉⵜ ⵜⴰⵖⴻⵍⵏⴰⵡⵜ ⵏ ⵢⵉⵏⴻⵖⵎⴰⵙⴻⵏ. ⵜⴰⵎⴻⵙⵔⵉⵜ ⵏ ⵜⴻⵖⵡⴰⵍⵜ « ⵜⵉⵥⵓⵔⵉⵢⵉⵏ ⴷ ⵚⵚⴻⵏⵄⴰⵜ ⵏ ⵜⵖⴻⵎⵙⴰ » ⵜⴻⵔⵥⴻⵎ ⴰⵙⵙ ⵏ ⵍⴰⵕⴻⴱⵄⴰ ⴷⴻⴳ ⵍⴷⵣⴰⵢⴻⵔ ⵜⴰⵎⴰⵏⴻⵖⵜ ⵢⴻⵔⵏⴰ ⴰⴷ ⵜⴻⵇⵇⵉⵎ ⵎⵔⴰⵡ (10) ⵏ ⵡⵓⵙⵙⴰⵏ.

ⵜⴰⵎⴻⵙⵔⵉⵜ-ⴰ ⵍⵍⴰⵏ ⴷⴻⴳ-ⵙ 83 ⵏ ⵢⵉⵏⴻⵎⵣⵉⴽⴽⵏⴻⵏ, ⴰⵎ ⵡⴰⴽⴽⴻⵏ ⴰⵔⴰ ⴷ-ⵢⵉⵍⵉ ⴷⴻⴳ-ⵙ ⵡⴰⵀⵉⵍ ⴷ « ⴰⵎⴻⵕⴽⴰⵏⵜⵉ », ⴷ ⵡⵉⵏ ⴰⵢ ⵢⴻⵇⵇⵏⴻⵏ ⵖⴻⵔ ⵚⵚⴻⵏⵄⴰ ⵏ ⵜⵖⴻⵎⵙⴰ ⵙ ⵍⴻⵛⵖⴰⵍ-ⵏⵏⴻⵙ ⵢⴻⵎⴳⴻⵔⵔⴰⴷⴻⵏ. ⵏⵏⵉⴳ ⵡⴰⵢⴰ, ⴰⴷ ⴷ-ⵉⵍⵉⵏ ⴷⴰⵖ ⵢⵉⵙⴽⴰⵙⵉⵢⴻⵏ ⵢⴻⵍⴷⵉⵏ ⵉ ⵓⴳⴷⵓⴷ ⴰⵢⴷⴻⴳ ⴰⵔⴰ ⵜⵜⴻⴽⴽⵉⵏ ⵢⵉⵙⴷⴰⵡⴰⵏⴻⵏ ⴷ ⵢⵉⵅⴻⴷⴷⴰⵎⴻⵏ ⴷⴻⴳ ⵓⵏⵔⴰⵔ ⵏ ⵜⵖⴻⵎⵙⴰ.