Asebter amenzawi
Abeddel n yineɣlafen: 10 n yineɣlafen imaynuten deg unabaḍ
LDZAYER TAMANEƔT – Aselway n tegduda, Abdelaziz Bouteflika, ibeddel kra n yineɣlafen deg unabaḍ, yerna d aya ay yejjan mraw (10) n yineɣlafen imaynuten ad ḍḍfen kra n yiḥricen s wazal-nsen am win n tedrimt, n teẓwert d ulmud imineg.
S waya, anesmigal amatu aqbur n Tiddukla n tbankiwin d yiɣsuren udrimen (ABEF), Abderrahmane Benkhelfa, yeqqel d netta ay d aneɣlaf n tedrimt. Ma d Salah Khebri yettwasemma-d d aneɣlaf n teẓwert. Aneggaru-a yella d aselway-anemhal amatu n Usudu adzayri n upitṛul (IAP, Bumerdas).
Aɣlif n yimuhal inagduden yettwawekkel fell-as Abdelkader Ouali (d awali aqbur yerna d amaru amatu aqbur n uɣlif n tɣawsiwin n daxel d tmazdayin tidiganin), ma d aɣlif n umesni, yettwasemma-d ɣef yiɣef-nnes Boudjemaa Talai ay yellan d aselway n tegrawt n temguri n unfed d yimɣuzen (IMETAL).
Azzedine Mihoubi, ay yellan d amaru n uwanak n teɣwelt, yeqqel-d ɣer unabaḍ s yisem-nnes d aneɣlaf n yidles, ma d aselway n tesdawit n Ldzayer Tamaneɣt yettwasemma-d d aneɣlaf n ulmud imineg d unadi ussnan.
Aselway n tegrawt tawamnit n ukabar n Terni n Uslelli Aɣelnaw deg Ugraw aɣerfan aɣelnaw, amazan Tahar Khaoua, yeqqel d aneɣlaf n tɣawsiwin d umni deg umkan n Khalil Mahi.
Taselmadt tasdawant tilemẓit, Iman Houda Feraoun, ay yellan d tanemhalt tamatut n Tnegga tasnetlant n unadi ussnan deg tussniwin d teknussna (ATRST), tettwasemma-d d taneɣlaft n Tesreqqest d teknussniwin n usselɣu d teɣwalt deg umkan n Zohra Derdouri.
Aneɣlaf anesmigal n tɣawsiwin n Lmeɣreb d Tefriqt, Abdelkader Messahel, yuli uswir-nnes yerna yeqqel d aneɣlaf n tɣawsiwin n Lmeɣreb d Tefriqt d umyalel agraɣlan.
Aneɣlaf n ulmud d ussileɣ amsadur, Nouredine Bedoui, yeqqel d aneɣlaf n tɣawsiwin n daxel d tmazdayin tidiganin deg umkan n Taueb Belaiz ay yeqqlen d aneɣlaf n uwanak aneṣṣaḥ uzzig n uselway n tegduda.
Amar Ghoul, ay yellan yeḍḍef amkan n uneɣlaf n umesni, yeqqel d aneɣlaf n usseqɛed n wakal, n tmerrit d tenḍi. Ma d Mohamed Mebarki yettwasemma-d d aneɣlaf n ussileɣ d ulmud amsadur, d amkan ay yeḍḍef yagi uqbel.
Aneɣlaf aqbur n yimuhal inagduden, Abdelkader Kadi, yettwasemma-d d aneɣlaf n tfellaḥt d tneflit n tmurt deg umkan n Abdelouahab Nouri, ay yeqqlen d aneɣlaf n teɣbula n waman d twennaḍt. Ma Abdelkader Khomri yeqqim dima d aneɣlaf n yilemẓiyen ara d-yelhun daɣ, seg-a ɣer sdat d waddal.
Youcef Yousfi, Mohamed Djellab, Mohamed Tahmi d Khalil Mahi ffɣen seg unabaḍ n Sellal, am wakken ay ffɣent daɣ 4 n tneɣlafin, nitenti d Nadia Labidi, Dalila Boudjemaa, Nouria Yamina Zerhouni d Zohra Derdouri.
Seg yidis niḍen, snat n tneɣlafin d yiwet n tneɣlaft tanesmigalt mazal-itent deg yimukan-nsent deg unabaḍ. Ti d Nouria Benghebrit, Mounia Meslem d Aïcha Tagabou.
