Asebter amenzawi
Awemmeṛ n umtawa n Ldzayer sɣur Tsemyuddest n yimussa n Uzawad d llsas n talwit deg Mali (Lamamra)
LDZAYER TAMANEƔT –Tasemyuddest n yimussa n Uzawad (CMA) twemmeṛ, ass n lexmis deg Ldzayer Tamaneɣt, Amtaa n talwit d umsuɣal deg Mali, yerna aya d ayen ara yilin d llsas i lebni n talwit deg tmurt-a, ɣef wakken ay d-yenna uneɣlaf n tɣawsiwin n uzɣar, Ramtane Lamamra.
« Numar (nefṛeḥ) imi ay yerbeḥ lmejhud-a ucrik yerna reẓment tewwura i ussirem n lxir deg Mali », ɣef wakken ay d-yenna Mass Lamamra deffir ma iwemmeṛ Bilal Ag Cherif, aselway n Tsemyuddest n yimussa n Uzawad, amtawa-a.
Seg tama niḍen, yenna-d uneɣlaf dakken « tuɣdaḍt ayɣef tettwawekkel tdiplumatit tadzayrit deg teɣlamt tagraɣlant n tebdammast tewweḍ ɣer yiswi acku rsen llsisan n talwit (deg Mali) ».
Dɣa deg temsalt-a, iger-d uneɣlaf tiɣri i « wakk wid ay terza temsalt akken ad gen ayen yessefken akken ad tettwabnu talwit », yerna yenna-d dakken imi Tasemyuddest n yimussa n Uzawad twemmeṛ amtawa n Ldzayer, aya ad d-yerr assirem ijehden i uzekka icebḥen deg Mali.
Aneɣlaf iḥettet-d dakken taɣlamt n tebdammast ay tenheṛ Ldzayer la txeddem ɣef talwit, taɣellist (laman) d liser i yimezdaɣen n ugafa n Mali.
Deg wayen yerzan tidyanin-nni n tekriḍt ay d-yellan seg melmi kan deg ugafa n Mali, Mass Lamamra iwet-d deg-sent, yerna yenna-d dakken « aya iceɣɣeb mliḥ », am wakken ay d-yerna dakken « assizzel n yidammen d yimenɣi yesfayday-d seg-s ala rrebrab d tejrimt yuddsen ».
« Amtawa ay wemmṛen yidisan imaliyen yemmal-d abrid ay yessefken ad yettwaḍfer, yerna yessefk Imaliyen ad wliwlen akken ad ssiwḍen yibriden-a ɣer lebni n wayen ay izemren ad ibeddel tamurt akken ay ssaramen » yimezdaɣen n Mali, ɣef wakken ay d-yenna.
Deg wayen yerzan astenyi n umtawa ass n ljemɛa deg Bamako, aneɣlaf yessarem ula d Tasemyuddest n yimussa n Uzawad ad tili gar wid ara t-yestenyin « deg teswiɛt iwatan ».
Tasemyuddest n yimussa n Uzawad yettekka deg-s Umussu aɣelnaw n uslelli n Uzawad (MNLA), Aseqqamu Unnig n tdukli n Uzawad (HCUA) d Umussu aɛṛab n Uzawad (MAA). Uqbel ma twemmeṛ amtawa-a, Tasemyuddest-a tessuter, deg wass n umezwaru n Meɣres « tasgunfut » akken ad tciweṛ imeɣnasen-nnes.
Amtawa-a wemmṛent yagi ass n umezwaru n Meɣres unabaḍ n Mali d yimussa ay yettekkan deg tqaɛet n Ldzayer, meḥsub Amussu aɛṛab n Uzawad (MAA, yebḍan ɣef uneṣli-nni), Tasemyuddest i uɣref n Uzawad (CPA) d Tsemyuddest n yimussa d terniwin tiferfanin n uzbu (CM-FPR). Astenyi unṣib n umtawa n talwit d umsuɣal gar Yimaliyen ad d-yili ass n ljemɛa deg Bamako.
