Asebter amenzawi
Abrid amazzal agmuḍ-ataram: aṣeggem n uḥric gar Tlemsan d Wehṛan ad ifak deg Yulyu
LezZAYER TAMANEƔT – Aneɣlaf n yimuhal inagduden, Abdelkader Kadi, yenna-d ass n lexmis deg Ldzayer Tamaneɣt dakken imuhal n uṣeggem n uḥric n ubrid amazzal agmuḍ-ataram gar Tlemsan d Wehṛan ad faken deg tgara n Yulyu ay d-yetteddun.
Lebni n uḥric-a iɛeḍḍel ɣef ljal n waṭas n wuguren, ɣef wakken ay d-yenna Mass Kadi deg yiwet n tɣimit ay d-yellan i tuttriwin s wawal deg Ugraw aɣerfan aɣelnaw, am wakken ay d-yerna dakken d tagrawt tacinwatt CITIC-CRCC ay d-yelhan d lebni n uḥric-a ay yessefken ad t-tṣeggem.
Imuhal n uṣeggem n yiḥricen n Ɛin Ddefla, Tlemsan, Sidi Belɛebbas, Mɛeskeṛ, Ɣilizan d wadaf n twilayt n Wehṛan ttunefken daɣ i tegrawt-a tacinwatt.
Yenna-d daɣ dakken fuken yimuhal (ixeddimen) deg Ɣilizan d Mɛeskeṛ, ma d wid n Wehṛan, Ɛin Ddefla, Sidi Belɛebbas d Tlemsan mazal la ttkemmilen.
Deg wayen yerzan aseyyex n wakal deg kra n yiḥricen n ubrid amazzal, yenna-d dakken tebda-d yiwet n tezrawt ara yeqqimen aseggas d uzgen i lmend n unadi ɣef yimukan aydeg yezmer ad iseyyex wakal deg tmurt.
Mi yettwatter ɣef wuguren yellan deg kra n yiḥricen n yibriden iɣelnawen deg twilayt n Wad Suf, aneɣlaf n yimuhal inagduden yenna-d dakken tazrawt ay yerzan abrid yeqqnen abrid aɣelnaw 3 ɣer ubrid aɣelnaw 48A la tettkemmil yerna la d-yettili uqeyyem-nnes.
Akaram yeqqnen ɣer temalt-a yettunefk i ccṛeɛ yerna la ttṛajun d acu ara d-yettwaḥekmen ɣef tkebbanit ay yebnan abrid-a, ɣef wakken ay d-yenna.
Akk tignatin iwatan wejdent-d akken ad bdun asseqɛed n ubrid-a mi ara d-yeḥkem ccṛeɛ ɣef temsalt-a, yerna ula ma iɛeḍḍel lebni n tleggit (tiqenṭert) n usenfar-a ay ssefran deg 2006, aɛeḍḍel-a ad d-yettwaqḍeɛ deg Yulyu ay d-yetteddun, ɣef wakken ay d-yenna.
Deg yerzan abrid aɣelnaw 41 deg twilayt-a, yenna-d uneɣlaf dakken d idudanen (n ubrid) ay d ssebba n uxṣar n ubrid-a, ula ma ttwamenɛen ad ten-xedmen din. Nnig waya, ula d ikamyunen ay d-yettɛebbin nnig tezmert-nsen ttekkan deg waya, am wakken ay d-yenna dakken aɣlif iɛeyyen-asen i yiwaliyen, ccifan n ddayṛat d lmirat ɣef temsalt-a deg wakk timiwa n tmurt.
Ma deg wayen yeqqnen s abrid aɣelnaw 48A, Mass Kadi yenna-d dakken ad yebdu usseqɛed n sin n yibriden ara as-d-yessemḥillqen, yerna tazrawt n sin-a n yibriden ad d-tewjed deg tgara n 2015.
Deg wayen yerzan assihrew n ubrid wis 3 n twilayt n Wad Suf, tfuk tezrawt-nnes s 50% yerna lebni-nnes ad d-yili deg tezrawra n 2016.
Abdelkader Kadi yettwasemma-d ass n lexmis d aneɣlaf n tfellaḥt d usnerni n tmurt deg uqaleb n ubeddel n yineɣlafen ay iga uselway n tegduda, Abdelaziz Bouteflika.
