Asebter amenzawi

Mali: astenyi ass n ljemɛa n umtawa n talwit d umsuɣal ay d-yefrurin seg umciweṛ n Ldzayer Tamaneɣt

BAMAKO – Idisan ay terza taluft deg Mali, anabaḍ d tegrawin tisertiyin-tiserdasiyin n ugafa, ad stenyin ass n ljemɛa deg yiwet n tfagla deg Bamako, Amtawa n talwit d umsuɣal deg Mali, d amtawa ay d-yefrurin seg ukala n umciweṛ n Ldzayer Tamaneɣt i lmend n ufaki n taluft ay iḥuzan tamurt-a.

Tafagla n ustenyi ad d-tili tameddit deg Wammas agraɣlan n yisaragen deg tmaneɣt n Mali, s uḥdaṛ n waṭas n yimḍebbren n tmura d tmagliwin d tuddsiwin tigraɣlanin.

Aselway n tegduda Abdelaziz Bouteflika ad yeḥdeṛ deg umkan-nnes uselway n Useqqamu n Uɣlan Abdelkader Bensalah wukud ara d-yeddu uneɣlaf n tɣawsiwin n uzɣar Ramtane Lamamra.

Iɣlanen Yeddukklen ad yeḥdeṛ s yisem-nsen Hervé Ladsous, iɣef n ugezdu n temhal n uḥraz n talwit.

Sdeffir yinawen n yimḍebbren n tmura d wid n tmagliwin, tafagla-a ad tfak s yinaw n yimḍebber n uselway n Mali, Ibrahim Boubacar Keita.

Astenyi n umtawa-a ad d-yili yiwen wass deffir ma twemmeṛ-it Tsemyuddest n yimussa n Uzawad (CMA) deg Ldzayer Tamaneɣt.

Amtawa-a wemmṛen-t yagi deg umezwaru n Meɣres anabaḍ d yimussa yettekkan deg tqaɛet n Ldzayer Tamaneɣt, meḥsub Amussu aɛṛab n Uzawad (MAA, ay yebḍan ɣef uneṣli-nni), Tasemyuddest i uɣref n Uzawad (CPA) d Tsemyuddest n yimussa d terniwin tiferfanin n uzbu (CM-FPR).