Asebter amenzawi

Agensas n Tuddsa Tamaḍlant n Tdawsa deg Ldzayer yebder-d azal ay yesɛa uɣawas aɣelnaw n uḥaṛeb n waḍḍanen ur ineṭṭḍen ara

LEZZAYER TAMANEƔT – Agensas n Tuddsa tamaḍlant n tdawsa deg Ldzayer, Bah Keita, yerra tajmilt, deg Ldzayer, i uɣawas aɣelnaw n uḥaṛeb n waḍḍanen ur ineṭṭḍen.

Deg yiwen n wass n usḥulfu d uḥezzeb mgal walluy n wadad (aṭunsyu), agensas n Yiɣlanen Yeddukklen yenna-d dakken Ldzayer d nettat ay d « d tamurt tafriqit tamezwarut ay d-igan ahil aɣelnaw i uḥaṛeb n waḍḍanen ur ineṭṭḍen », am wakken ay yerra tajmilt i lmejhud n uwanak deg unrar-a. Deg wass-a n usḥulfu yella-d daɣ beddu n uxeddim n yiwet n teklinit tazirazt i udawi n walluy n wadad.

Tuddsa tamaḍlant n tdawsa, ɣef wakken ay d-yenna, « tettḍafar yerna tebded ɣer yidis » n lmejhud ay tetteg Ldzayer akken ad d-telhu d uḥezzeb.

Amelyaṛ n yimdanen ay yuḍnen aḍḍanen ur ineṭṭḍen, ɣef wakken ay d-yenna Mass Keita ay d-yessawel ɣef wayen ay yessifsisen ad d-banen waḍḍanen-a am ṣṣenf n tudert ay yettedder umdan, tuzert d tɣimit.

9 n yimelyunen n medden ay yettmettaten yal aseggas seg waḍḍanen ur ineṭṭḍen, gar-asen 80% deg tmura ay la yettneflin, ɣef wakken ay d-yenna.

Dɣa s waya, iḥettet-d dakken yessefk « ad d-sbedden anagraw iwatan n tdawsa, am wakken ay yessefk medden ad beddlen tudert-nsen akken ad ḥezzben i waḍḍanen-a, ur yessefk ara ad ttessen iɣisem (lalkul) neɣ ad ttkeyyifen, yerna yessefk ad ttgen addal, am wakken ay yessefk ad d-yili usḥulfu d ukcaf n waḍḍan ɣef zik lḥal ».