Asebter amenzawi
Tafellaḥt: Teldi tmesrit tis 15 n Sipsa-agrofood deg Ldzayer Tamaneɣt
LDZAYER TAMANEƔT – Teldi tmesrit tagraɣlant tis 15 n tkessawt, tuccit d ttawilat n tfellaḥt (Sipsa-Agrofood) ass n lexmis deg Leqṣer n temzikknin n Uzumbi n yilel (Pins maritimes) s uttekki n 600 n yinemzikknen, gar-asen 370 d ibeṛṛaniyen.
Tamesrit-a yerẓem-itt umaru amaru n uneɣlaf n tfellaḥt d tneflit n tmurt, Fodhil Ferroukhi s uḥdaṛ n umtil-nnes utrici d ugensas n Tuddsa n Tuccit d Tfellaḥt (FAO) deg Ldzayer, Mass Nabil Assaf, d waṭas n yikataren d yigensasen idiplumatiyen.
Mass Ferroukhi yenna-d dakken tamesrit-a tesɛa azal imi ara tejj tikebbaniyin ay ixeddmen deg uḥric n tfellaḥt ad ssnent tiɣawsiwin timaynutin deg ttekniyin n ufares d utewwel, am wakken ara myussanent d yicriken iɣelnawen d yigraɣlanen.
Yenna-d daɣ dakken taẓrigt tis 15 n tmesrit-a ad d-tili aseggas-a deg yiwet n tegnit aydeg iduba inagduden d tkebbaniyin ukin i wuguren ay izemren ad d-asen seg uɣelluy n ssuma n upitṛul.
« Tafellaḥt tezmer ad tettekki deg ussekcem n tenḍa deg tdamsa taɣelnawt. D wa ay d iswi agejdan n tsertit n usnerni n tfellaḥt d tmurt ay d-yebdan deg 2009 », ɣef wakken ay d-yesmekti.
Dɣa yenna-d deg temsalt-a dakken tafellaḥt teqqel tettnerni s 11% deg useggas deg tallit n 2009-2014. Aṭas n yifurkawen n tfellaḥt ay yennernan mliḥ, gar-asen lxeḍra (13,4%), aksum azewwaɣ (12,5%), akeffay (8,3%) d lbaṭaṭa (12,6%).
D acu kan, tafellaḥt yessefk ad teqqel daɣ tettakf-d aṭas.
« Asselhu n ufares deg lfirmat d ayen yesɛan azal d ameqran ma nebɣa ad d-nqam ayen ay teḥwaj tmurt yerna ad nessijjew ɣer tmura n beṛṛa », ɣef wakken ay d-yenna.
I lmend n waya, iger-d tiɣri i tkebbaniyin akken ad sterrent ugar ttawil-nsent i lmend n ussijjew.
Tamesrit tis 15 n Sipsa-Agrofood tessuddes-itt tegrawt n uxemmem n Filaha Innov (GRFI) d Tkebbanit tadzayrit n temzikknin (Safex), yerna ḥedṛent deg-s 30 n tmura, gar-asent Tutrict d tinebgit n yiseɣ.
Tamesrit-a ttekkant deg-s tkebbaniyin ay d-ixeddmen ifarisen n tfellaḥt, zzerriɛa, ttawilat d tmacinin n tfellaḥt d tkebbaniyin ay ixeddmen ama deg tfellaḥt, ama deg temguri yeqqnen ɣer-s, am wakken ay llan daɣ wudusen n uḥkam n uḥric-a d yisuda n unadi.
Taẓrigt n useggas-a d tin aydeg ara yettunefk wazal i yifarisen n tfellaḥt yerna, ula deg tmesrit-a ad d-yili daɣ uḥettet ɣef « ussuder n ufaris adzayri », imi ara yettunefk uḥric i uɛraḍ n yifarisen n tuccit idzayriyen, d win umi semman « Agrofood Dialna ».
Deg yijifeṛ n tedyant-a n 4 n wussan, ad d-ilin daɣ yinmugar gar tkebbaniyin aydeg ara d-ilin yiskasiyen d yimazzayen iɣelnawen d yigraɣlanen, ad skasin ɣef waṭas n temsal yeqqnen ɣer usselhu n ufares d tɣellist tadawsan n tuccit ladɣa deg uḥric n ukeffay, aksum n uyaziḍ d yimendi.
Deg yijifeṛ n tfagla n urẓam, imsuddsen n tmesrit-a d wid n Tmesrit tagraɣlant n tmacinin n tfellaḥt (SIMA) n Fṛansa stenyan yiwen n umtawa n ticcurka ayyes ara qqlent ad d-ttgent tamesrit n SIMA-SIPSA North Africa seg useggas n 2016 deg Ldzayer Tamaneɣt.
