Asebter amenzawi
Ldzayer d Ṭṭalyan « grent iman-nsent mliḥ » deg ferru n taluft n Libya
LDZAYER TAMANEƔT – Ldzayer d Ṭṭalyan « grent iman-nsent mliḥ » deg unadi n ferru n taluft ay iḥuzan Libya yerna ssarament ad ssiwḍent « ɣef zik lḥal » ɣer bennu n unabaḍ n tdukli taɣelnawt deg tmurt-a, ɣef wakken ay d-yenna ass n ssebt deg Ldzayer Tamaneɣt unmazul n uneɣlaf n tɣawsiwin n uzɣar d umyalel agraɣlan, Lapo Pistelli.
« Aql-aɣ (Ldzayer d Ṭṭalyan) nger iman-nneɣ mliḥ, lwaḥid, deg ccɣel n ferru n taluft deg Libya. Aql-aɣ ɣer yidis n tikli n umazun uzzig n Yiɣlanen Yeddukklen i Libya, Bernadino Leone, yerna la nxeddem daɣ d tmura tinaragin (tijiratin) akken ad nessiweḍ ɣer bennu n unabaḍ n tdukli taɣelnawt », ɣef wakken ay d-yenna i tɣemsa Mass Pistelli, deg yijifeṛ n temlilit useqqamu n uḍfar adzayri-aṭalyani i ussewjed n temlilit n uswir unnig n umyalel (amɛawen) ucrik ara d-yilin ass n 27 Mayu deg Ṛuma.
Imḍebber-a aṭalyani yenna-d dakken yessaram ad d-yettwabnu unabaḍ-a n tdukli taɣelnawt « ɣef zik lḥal » yerna yenna-d dakken tamurt-nnes d Ldzayer sɛant « yiwet n tmuɣli » deg wayen yerzan aslaḍ n tegnit aydeg tella temnaḍt-a.
Seg yidis-nnes, aneɣlaf n tɣawsiwin n Lmeɣreb d Tefriqt n umyalel agraɣlan, Abdelkader Messahel, yenna-d dakken llant « tmuɣliwin tucrikin » gar Ldzayer d Ṭṭalyan deg wayen yerzan ibriden n ferru n taluft n Libya « ɣef zik lḥal ».
« Yessefk ad tɣiwel tegnit i bennu n unabaḍ n tdukli taɣelnawt ara ireẓmen abrid i tuqqla n urkad deg tmurt-a tanaragt », ay d-yenna.
Aneɣlaf yenna-d, deg temsalt-a, dakken ad d-tili temlilit n tmura tinaragin n Libya deg Ndjamena (Tcad) deg 5 Yunyu ay d-yetteddun, sakkin ad tt-id-teḍfer temlilit n kraḍ n yidisan (Ldzayer, Maṣer d Ṭṭalyan) deg 7 Yunyu deg Lqahira.
Mass Messahel yenna-d dakken yesqerdec daɣ d yinebgi-nnes ɣef « yibriden d ttawilat » ayyes ara ɛawnen agensas uzzig n Yiɣlanen Yeddukklen i Libya.
« D ayen ibanen dakken timura-nneɣ deg snat beddent ɣer yidis n lmejhud n Yiɣlanen Yeddukklen deg unadi n tifrat tasertit ara ifaken taluft n Libya », ɣef wakken ay d-yenna.
