Asebter amenzawi
Tamesgida n Ldzayer: Ixeddimen n lbenyan ddan s 54%
LDZAYER TAMANEƔT – Aneɣlaf n tnezduɣt d usseqɛed n temdint, Abdelmadjid Tebboune, yenna-d ass n ssebt deg Ldzayer dakken tiddit n yixeddimen n lebni n Tmesgida tameqrant n Ldzayer Tamaneɣt tewweḍ ɣer 54%, yerna yesmekti-d dakken asenfar-a la ssefrayen ad t-faken deg Ctembeṛ n 2016.
Deg yiwet n terzi n ussefqed n usenfar-a deg Lmuḥemmadeyya (agmuḍ n Ldzayer Tamaneɣt) ɣer yidis n uneɣlaf n tɣawsiwin n ddin d lḥubus, Mohamed Aissa, Mass Tebboune yenna-d dakken yeɛjeb-it wayen wuɣur yessaweḍ uxeddim « ay la yettkemmilen ayyur deffir wayeḍ yerna yewweḍ imir-a ɣer 54%, yili kra kan n wayyuren uqbel, yella mazal-it deg 18% ».
Asenfar n Tmesgida n Ldzayer Tamaneɣt bdan-d yixeddimen-nnes deg 2012, yerna iɛeḍḍel aseggas d uzgen ɣef ljal n wuguren ay yeqqnen ɣer leɛqudat d ussemyuddes n lecɣal gar tnarit n tezrawin talmanit « Engel und Zimmermann » d tkebbanit n unabaḍ tacinwatt « China State Construction Engineering Corporation » (CSCEC).
Awway n wugar n yixeddamen, ladɣa ixeddamen itekniyen, d ayen ay yuraren dduṛ d ameqran deg usseɛjel n uxeddim. Naqal llan 1000 n yixeddamen deg Yennayer, sakkin wwḍen armi d 1600 deg Meɣres yezrin.
Seg yidis-nnes, aneɣlaf n tɣawsiwin n ddir yenna-d dakken asenfar-a d axeddim izaden deg umezruy n Ldzayer timziregt d umaḍal ineslem.
Dɣa deg temsalt-a, yenna-d dakken tella yiwet n tseqqamut tuxliḍt aydeg ttekkan yiɣlifen n ddin d tnezduɣt) ara yemlilen deg tgara n dduṛt akken ad fernen layat n Leqran, awalen n Nnbi (taẓallit d sslam n Ṛebbi fell-as) d tesreɣtiwin ara icebbḥen tamesgida-a s uqader ummid n yiwehhiyen n uselway n tegduda ay d-icerḍen dakken lbenyan-a ad yesɛu ḍḍabeɛ n Lmeɣreb, d win ara d-yettwagmen seg yidles aɛṛab-andalusi.
Seg yidis niḍen, yenna-d uneɣlaf dakken aɣlif-nnes yebda la d-yessewjad ixeddamen n ddin (amaddan, imsiggen d limamat) ara d-yelhun d uxeddim deg tmesgida-a ara yilin d tawelha.
Tamesgida tameqrant n Ldzayer ad teḍḍef akal n wugar n 20 n yiqeṭṭaren, yerna ad tesɛu tazeɣɣa n tẓallit n 20.000 n yimitren imkuẓen (m2), d amṛaḥ d tṣumɛa ɛlayen 270 n yimitren. Nnig waya, ad tili deg-s temkarḍit, ammas adelsan, axxam n Leqran, urtan, aneɣsar n tkeṛṛusin, lbiruwat n tebdelt, ammas n uḥuddu aɣarim d tɣellist (laman) d yimukan n wucci.
