Asebter amenzawi
Akemmel n ccṛeɛ n Khalifa Bank ass n ssebt s tmesliwt n yimetthumen imaynuten
LEBLIDA – Ccṛeɛ n temsalt n Khalifa Bank ikemmel ass n ssebt taṣebḥit deg uxxam n ccṛeɛ n tejrimin n Leblida, deg wass-nnes wis 10, s tmesliwt n Abdallah Boulefrad ay yellan d anemhal amatu n lluzin n tissitin n yiɣisem (lalkul) n Wehṛan, yerna ikemmel wass-nni s tmesliwt n yimetthumen niḍen.
Ccṛeɛ-a yebda deg wass n 4 Mayu yezrin, yerna deg sin n wussan imezwura, ɣran-d ṛṛay n uwexxer, sakkin seg wass-nni, azal n 20 n yimetthumen ay ibedden sdat lqaḍi Antar Menouer.
Ametthum agejdan, Abdelmoumene Rafik Khelifa, d netta ay d amezwaru ay iɛeddan sdat lqaḍi akken ad d-yerr ɣef ttehmat ayyes yettwatthem, meḥsub « assebded n tegrawt i ussefsed, akellax deg yidrimen, akellex s laman, asseqdec n lekwaɣeḍ n tkellax n tbanka d lqanun, aflas n tkellax, tukci n tjuɛal d tukerḍa n yidrimen ».
Deg sin-nni n wussan aydeg ay as-d-slan deg uxxam n ccṛeɛ, Khelifa yenkeṛ dakken yeffeɣ i yilugan ay yesseddayen El Khalifa Bank, yerna yenna-d dakken asmi ay yeffeɣ seg Ldzayer deg 2003, yejja-d tagrawt-nnes n tkebbaniyin deg lfayda.
Tiɣimit n wass n lexmis iɛedda deg-s uselway-anemhal amatu aqbur n tegrawt n Saidal, Ali Aoun, ay d-yennan dakken netta yella d yiwen seg 25 n yisefraken n tegrawt-a ay yugin ad ssersen idrimen deg Khalifa Bank, ula ma tella-d lewṣaya i lmend n waya sɣur Usenduq n uttekki n uwanak.
Ass n laṛebɛa, d ametthum Foudad Adda, anemhal aqbur n Uɣerbaz n temsulta n Ɛin Lbenyan (Ldzayer Tamaneɣt) ay ibedden deg uxeddam n ccṛeɛ akken ad yenkeṛ ttehmat ayyes yettwatthem deg temsalt-a, meḥsub akellex deg yidrimen, tajaɛalt, adɣal n lekwaɣeḍ n lqanun d tedbelt, akellex s laman d usseqdec n leḥkem iɛeddan i tlisa.
Foudad Addad, ay yellan d amaslaḍ aqbur n tseqqamut n tɛessast n Tmilalt tamatut n Tɣellist taɣelnawt, yettwatthem s wazzun n yidrimen ɣer tnegga n Khalifa Bank deg Ccraga (Ldzayer Tamaneɣt) d tin n Yibaṭwaren n Ḥusin Day, yerna yesfaydi-d seg ssrabes sɣur tegrawt n Khalifa i lmend n waya.
Mass Foudad yenkeṛ aya yerna yenna-d dakken yesɛa lekwaɣeḍ ayyes ara d-yessken aya, am wakken ay d-yenna dakken ur yesɛi ara akk « assaɣ udmawan » d Abdelmoumene Khelifa. Ass-nni daɣ, imdeqqeqen n leḥsabat n tbanka n Khalifa, Lakhdar Mimi d Hamid Sekhara, nnan-d, deg tmesliwt-nsen, dakken llant tɣawsiwin « izelgen » deg usseddu n leḥsabat n tbanka-nni deg tallit n 1998-2000 yerna deg sin yid-sen « ur llin ara ẓran » dakken yella yessefk ad as-ɛeyynen i yimwekkel n tegduda.
S ujemmal, 71 n yimetthumen ay la yettɛeddin deg ccṛeɛ deg temsalt-a, 21 seg-sen atni deg lḥebs deg wakud aydeg wiyaḍ la ttɛeddin deg ccṛeɛ d ilelliyen. Menɣir imcetkiyen d wid yenḍerren, ugar n 300 n yinagan ara d-icehden deg temsalt-a aydeg d-tella tɣimit tamezwarut n ccṛeɛ deg 2007.
