Asebter amenzawi
Imḍebbren n laman ur d-sfaydin ara seg uṣafer baṭel sɣur Khalifa Airways (Khelifa)
LEBLIDA – Ikataren n tɣellist taɣelnawt ur asen-ttunefkent ara tkarḍiwin n umesni akken ad rekkben baṭel deg yisafagen n Khalifa Airways, wanag sfaydin-d kan seg « ussenqes » deg ssuma n rrekba s uqader n umtawa ay testenya Tmehla tamatut n tɣellist taɣelnawt d tkebbanit-a n waffug, ɣef wakken ay d-yenna umɛellem aqbur n tegrawt n Khalifa, Rafik Abdelmoumene Khelifa, deg uxxam n ccṛeɛ n tejrimin.
Mi yemqabal d unemhal aqbur n ssrabes inmettiyen d uselway n useqqamu n tedbelt n tmilalt n yinuwar n temsulta, Belarbi Salah Hamdene, ay yellan d yiwen seg yimetthumen deg temsalt n Khalifa, Abdelmoumene Khelifa yenna-d dakken « amtawa-nni ay yettwastenyan gar tegrawt (n Khelifa) d Tmehla tamatut n tɣellist taɣelnawt d tin ay yessefran ad d-sneqsen 30% seg ssuma n rrekba daxel d beṛṛa tmurt d 50% seg ssuma n rrekba ɣer tmiwa n unẓul n tmurt. »
« Imir-a, ma llant tkarḍiwin n rrekba baṭel, aya ur t-ẓriɣ ara nekk », ɣef wakken ay d-yenna mi t-yesseqsa lqaḍi Antar Menouar.
Ametthum Belarbi yenna-d, uqbel, dakken ikataren n Tmehla tamatut n tɣellist taɣelnawt ttunefkent-asen, s ujemmal, 26 n tkarḍiwin (22 i yikataren d 4 i yineṣṣaḥen), d acu kan yenna-d dakken « ta d tamhelt tufṛizt ur yesɛin ara assaɣ d ussersi n yidrimen n tmilalt deg tnegga n Tbanka n Khalifa deg Ccraga ».
Aselway n useqqamu n tedbelt n tmilalt n yinuwar n temsulta yettwatthem deg temsalt-a s tjaɛalt, asseqdec n tmussni i ussefsed d usfaydi seg ssrabes imi ay yessers idrimen n tmilalt-a deg Tbanka n Khalifa.
Ɣef leḥsab n umetthum-a, tamilalt tessers 257 n yimelyunen n yidinaṛen deg tnegga n Yibaṭwaren n Ḥusin Day s lewṣaya n unmazul n uselway n tseqqamut n tɛessast n tmilalt, Foudad Addad, yerna sdeffir ma yeqbel useqqamu n tedbelt.
Nnig waya, Belarbi yenna-d dakken yella yettxebbir « s tira » anemhal amatu n tɣellist taɣelnawt ɣef wakk ayen ay yetteg.
Deg wayen yerzan assersi n yidrimen, yenna-d umetthum dakken « lfayda tella telha mliḥ » deg tbanka n Khalifa, yerna tella tettaweḍ ɣer 14%, deg wakud aydeg deg tbankiwin tinagdudin, lfayda ur telli ara tettɛeddi i 9%, am wakken ay d-yesmekti dakken imḍebber ameqran n tmilalt, Mokrani Mohamed, yestenya amtawa n ussersi n yidrimen.
Imetthumen ay iɛeddan uqbel deg ccṛeɛ, amalal n unemhal amatu aqbur n Tnegga n tneflit tanmettit, Mohamed Meziani Mouiloud, anemhal n tedrimt n Usenduq n usenkid n trebbawt (CNAC), Laichar Rachid d unemhal n tedrimt d tsiḍent n Tkebbanit taɣelnawt n wallus n usenkid, Mohamed Ouandjeli, nnan-d akk dakken ssersen idrimen deg Tbanka n Khalifa s uqbal n yiseqquma-nsen n tedbelt.
Mohamed Meziani Mouiloud yenna-d dakken ssersen idrimen s uqbal n useqqamu n uwehhi n Tnegga n tneflit tanmettit (ADS) d uɣlif (ay cawṛen s tira), ma « d takarḍa-nni n wammas n udawi s waman yeḥman, yenna-d dakken yesseqdec-itt snat neɣ kraḍt n tikkalt ».
Ma d imḍebber n CNAC, Laichar Rachid, yessers deg Tbanka n Khalifa 192 n yimelyunen n yidinaṛen, yerna yenna-d dakken yella yesɛa takarḍa n wammas n udawi s waman yeḥman uqbel ma tewweḍ-d tbanka n Khalifa ɣer Ldzayer, am wakken ay yenkeṛ ttehmat n tjaɛalt d usfaydi seg ssrabes.
Anemhal n tedrimt d tsiḍent n Tkebbanit taɣelnawt n wallus n usenkid, Mohamed Ouandjeli, yesteɛṛef, seg yidis-nnes, dakken yessers 300 n yimelyunen n yidinaṛen deg tnegga n Khalifa n Lḥeṛṛac, yerna yesfaydi-d seg tkarḍiwin i udawi baṭel deg wammas n udawi s waman n Sidi Fṛej, d acu kan yenna-d dakken iɣil dakken ammas-a d « asrir i umyager n yikataren n tkebbaniyin yellan d ticrikin n tbanka-a ».
