Asebter amenzawi
Tamettant n Francis Jacob, d ameɣnas yennuɣen ɣef uzarug n Ldzayer
LDZAYER – Akerwa Francis Jacob, yemmut deg Paris ɣer 82 n yiseggasen deffir yiwen waḍḍan ɣezzifen, ɣef wakken ay d-yenna Useqqamu Aɣelnaw Adzayri n Temsetlelt d Uɣref Aṣeḥrawi deg yiwen n ulɣu ay d-yuzen i Tnegga n Yisalan n Ldzayer. Jacob d ameɣnas yennuɣen ɣef yizerfan d tlelli, yefka-d akk tizemmar-nnes akken ad tawi Ldzayer azarug-nnes, am wakken ay yennuɣ daɣ ɣef yizerfan n Yiṣeḥrawiyen.
Asmi ay yella meẓẓiy, Akerwa Jacob yudef imenɣi ɣef uzarug n Ldzayer seg wul d lqanaɛa. Dɣaz i lmend n waya, yettekka deg umazday n Yibugaṭuten n Terni n uslelli aɣelnaw (FLN).
Francis Jacob yella ɣer yidis n tmura n umaḍal wis kraḍ yerna d aẓragraɣlan, am wakken ay yettekka deg wakk imenɣiyen n tallit-nnes: mgal ṭṭrad n Vietnam, i usserbeḥ n tegrawla n Kuba, yerna yennuɣ s uɛewwel mgal ussehres deg Ldzayer i lmend n uzarug n uɣref adzayri, ɣef wakken ay d-yenna ulɣu-nni.
Jacob yennuɣ armi d ussan-nnes ineggura ɣer yidis n Yiṣeḥrawiyen i lmend n temsalt-nsen tuzrift akken ad awin azref-nsen ad tt-id-frun ɣef uzekka-nsen yerna ad ddren d ilelliyen, d imzirgen, ɣef wakken ay d-yerna uḍris-a.
Abugaṭu Frabcis Jacob ay yellan d yiwen seg yimḍebbren n Temɣunt n yizerfan n umdan (LDH), yella-d daɣ d aselway amezwaru n Unmalu n yibugaṭuten n Fṛansa (SAF).
« S ljehd n yimenɣiyen-nnes, yesmekti-aɣ-d dakken ur tezmir ara ad tili tmetti tamegdayt ma yella ur d-yettili ara imenɣi yettkemmilen ɣef tlelli », ɣef wakken ay d-yura uselway n Unmalu n yibugaṭuten n Fṛansa, Florian Borg yerna bedren-t-id ttawilat n yisalan.
Aselway n yimaslaḍen n Useqqamu Aɣelnaw Adzayri n Temsetlelt d Uɣref Aṣeḥrawi rran-as tajmilt i tikli-nnes taqeɛdant, axeddim-nnes i uɛawen n wiyaḍ d uɣnas-nnes ay yessawaḍen s iswi, ɣef wakken ay d-yebder ulɣu-nni.
Ljanaza n Francis Jacob ad d-tili ass n ljemɛa 22 Mayu deg tnerɣut n Père-Lachaise deg Paris, ɣef wakken ay d-yenna ulɣu-a.
Francis Jacob ilul deg Strasbourg ass n 17 Ɣuct 1930. Yexdem d abugaṭu deg Paris seg 1964 ɣer 2002, yerna yettekka daɣ deg Ukabar asduklan afṛensis. Jacob yella d aselway n Useqqamu i tugdut deg Paraguay gar 1985 d 1995 yerna d aselway n Tiddukla n yimeddukal n Tegduda taɛṛabt taṣeḥrawit tamegdayt, ɣef wakken ay d-yebder Unmalu n yibugaṭuten n Fṛansa.
