Asebter amenzawi

Taluft n Libya: timuɣliwin n Ldzayer d Tunes tteddunt deg yiwen n ubrid (aɣella n unabaḍ atunsi)

LDZAYER TAMANEƔT- Aɣella n unabaḍ atunsi, Habib Essid, yenna-d ass n lḥedd deg Ldzayer Tamaneɣt dakken timuɣliwin n Tunes d Ldzayer deg wakken yerzan taluft n Libya tteddunt deg yiwen n ubrid yerna yessefk ad tefru taluft-a s ubrid aserti.

Deg yiwet n tseɣrut ay d-iga i tɣemsa deffir umyager-nnes d uselway n tegduda, Abdelaziz Bouteflika, Mass Essid yenna-d dakken tella tegnit iwatan « i umbaddel n tmuɣliwin d tukci n tmeẓẓuɣt i tenṣiḥin tumɛinin n Bouteflika ». Sin-a n yidisan bedren-d ssawlen-d daɣ ɣef waṭas n temsal yeqqnen ɣer tsertit d tdamsa.

Deg udiwenni-nsen, ssawlen-d daɣ ɣef temsalt n Libya, ɣef wakken ay d-yenna yimḍebber-a atunsi, am wakken ay d-iger tamawt dakken timuɣliwin n Ldzayer d Tunes ɣef temsalt-a d tucrikin deg wayen yerzan ferru aserti n taluft deg tmurt-a.

Mass Essid yenna-d dakken ferru n taluft deg Libya yessefk ad d-yili « s tsertit kan », am wakken ay d-yenna dakken yessefk « ad nemɛawan akk s lemɛawna, daɣ, n Yiɣlanen Yeddukklen d wakk timura tinaragin (tijiratin) n Libya akken ad nessiweḍ ɣer tifrat gar Yilibiyen yerna d tin ara qeblen akk yidisan ».