Asebter amenzawi

Uraren n 2015 n yimeɛdaṛ: Ldzayer tfuk deg umkan wis 11

SEOUL – Ldzayer tfuk taẓrigt-a tis 5 n Wuraren imaḍlanen n waddalen n yimeɛdaṛ n 2015 (i wid yettwalin) n Seoul (deg Kurya n Unẓul) deg umkan wis 11, yerna terbeḥ-d s ujemmal 7 n tzalɣiwin (4 n wureɣ, 1 n uẓref d 2 n ubṛunz) deg 3 n waddalen, am wakken ay iga umazzal Abdelatif Baka aklis n umaḍal amaynu.

Ldzayer tettekka deg 3 n waddalen gar 9 deg wahil amatu n wuraren-a, yerna wid ara irebḥen deg waddalen-a ad ttekkin deg Wuraren Ulimpiyen n Yimeɛdaṛ n Rio n 2016.

Nnig n rrbeḥ ay d-ḥazen sa-nni (7) n yinaddalen idzayriyen, yella-d daɣ uklis n umaḍal deg temsizzelt n 800 n yimitren (T13), d aklis n 1:50:70, yili aklis aqbur yella ɣer unazzal akubi Lazaro Rashid s 2:52:50, d win ay d-yellan deg 2007 deg Rio).

Gar 58 n tmura ay yettekkan, 43 ay d-irebḥen tizalɣiwin, yerna tamurt tamezwarut deg-sent d Rusya s 114 n tzalɣiwin, gar-asent 48 n wureɣ d 35 n uẓref, sakkin teḍfer-tt-id Ukṛanya s 38 n tzalɣiwin gar-asent 16 n wureɣ, sakkin d Iṛan s 32 n tzalɣiwin gar-asent 15 n wureɣ.

Seg yidis niḍen, d Ldzayer ay d tamurt tafriqit tamezwarut uqbel Muzambik ay d-irebḥen 8 n tzalɣiwin gar-asent 3 n wureɣ.

Idzayriyen ay d-irebḥen tizalɣiwin d Abdelatif Baka, d anazzal ay yeqqlen d alɣuɣ n umaḍal deg snat n temsizzlin (1500 n yimitren d 800 n yimitren T13), Lynda Hamri (aneggez s teɣzef T12) d ujudoka Mouloud Noura (ddaw n 60 n yikilugṛamen). Seg yidis niḍen, tazalɣi n uẓref tawḥidt ay d-yettwarebḥen yewwi-tt yimneggez Bentria Firas deg uneggez n kraḍ n yisurifen (T11) yerna d netta daɣ ay yewwin tazalɣi n ubṛunz deg uneggez s teɣzef.

Tazalɣi taneggarut n ubṛunz yewwi-tt ujudoka Mehdi Meskine (ddaw n 73 n yikilugṛamen).

S tḥawact-a deg Wuraren imaḍlanen n Seoul, Ldzayer tesselha aswir-nnes s wugar n tzalɣiwin n wureɣ ɣef leḥsab n 2011, asmi ay tettekka deg wuraren-a deg Antalya (Ṭṭerk) yerna tewwi-d din 8 n tzalɣiwin (2 n wureɣ, 2 n uẓref d 4 n ubṛunz).