Asebter amenzawi

Nijirya: iserdasen rebḥen yimenɣiyen imaynuten mgal Boko Haram

LAGOS – Igen n Nijirya yenna-d dakken yeḍḍef, ass n lḥedd, 10 n yimaziren aydeg ttilin yirebraben n Boko Haram deg teẓgi n Sambisa, yiwen wass deffir tenṭagt-nni tanɣimant ay d-yellan deg teɣsert n yisakalen (lkiṛan) n ugafa-agmuḍan aydeg mmuten 7 n yimdanen.

Deg tummɣa-a taserdasit tameqrant ay d-yellan deg uwanak n Borno, ttwenɣen aṭas n yiɣewwaɣen am wakken ay yemmut yiwen n userdas mi teṭṭerḍeq yiwet n lmina, yerna jerḥen sin niḍen, ɣef wakken ay d-yenna uneṭṭaq n yigen, Chris Olukolade.

« Mazal la tettkemmil temhelt i ussizdeg n Sambisa d tẓegwa niḍen seg yirebraben », ɣef wakken ay d-yenna ulɣu-a ay d-yettwaznen s yizen aliktṛunan.

« Isafagen iserdasiyen n Nijirya la ttɛassan tamnaḍt-a akken ad ḍefren irebraben yerna ad d-nessezg tiyita-nneɣ », ɣef wakken ay d-yenna.

Ass n ssebt, 7 n yimdanen ay yettwenɣen, yerna jerḥen 30 niḍen deg yiwet n tenṭagt-tanɣimant deg teɣsert n yisakalen n Damataru, tamaneɣt n uwanak n Yobe, yerna 6 n yiseggasen aya seg wasmi ay la d-ḍerrunt tenṭagin tirebrabin deg temnaḍt-a.

Deg yiwen n ulɣu wis sin, Mass Olukolade yenna-d dakken ur llin ara akk yiserdasen deg temnaḍt n Marte tagara-a, acku igen atan la yettkemmil ccɣel-nnes deg teẓgi n Sambisa.

« Imir-a, imi ay d-nnan dakken tella (Boko Haram deg temnaḍt-nni), ur yettɛeḍḍil ara ad yefru wugur-a », ɣef wakken ay d-yenna.