Asebter amenzawi
Asmekti n tuḍḍfa n Falesṭin: snat n tegrawin tifalesṭiniyin i lmend n tuqqla n yizruzaɣ
LDZAYER TAMANEɣT – Tirni taɣerfant d Tirni tamegdayt i uslelli n Falesṭin nnant-d, as n ssebt deg Ldzayer, dakken mazal-itent ḍḍfent deg uzref n tuqqla n yizruzaɣ ifalesṭiniyen ay d-yettwaẓẓɛen seg wakal-nsen deg 1948, am wakken ay ḍḍfen deg tdukli taɣelnawt, yerna nnan-d dakken « ulac tifrat i taluft tafalesṭinit war ma tefra taluft n yizruzaɣ ».
I usmekti n umulli wis 67 n Nnaqba (Tawaɣit) n tuḍḍfa n wakal n Falesṭin, yella-d yiwen n usarag aydeg yettekka ugensas n Terni tamegdayt n uslelli n Falesṭin, Mohamed El Hamami, d ugensas n Terni taɣerfant deg Ldzayer, Salah Mohamed, yerna yenna-d uneggaru-a dakken « amulli-a wis 67 d win aydeg ara tejhed tuḍḍfa n uɣref afalesṭini deg uzref-nnes n tuqqla deg ukatar n tneɣtust tis 194 Useqqamu n tɣellist (n Yiɣlanen Yeddukklen) », am wakken ara tejhed daɣ tuḍḍfa n Yifalesṭiniyen deg tdukli-nsen taɣelnawt, ɣef wakken ay d-yenna.
Salah Mohamed yenna-d daɣ dakken s tdukli-nsen taɣelnawt ay ssawḍen Yifalesṭiniyen ad sxeṣren iɣawasen isṛayiliyen ay yekkaten akken ad ten-sfeclen.
Seg yidis niḍen, yenna-d dakken d awezɣi ad d-afen tifrat tasertit war ma tettwassefɛel tneɣtust tis 194 n Yiɣlanen Yeddukklen ay d-yennan dakken izruzaɣ ifalesṭiniyen sɛan azref ad qqlen ɣer wakal-nsen yerna ad asen-yettwaɣrem wayen sṛuḥen.
Nnig waya, yenna-d dakken azref n tuqqla n yizruzaɣ yeqqen mliḥ ɣer yimenɣi afalesṭini.
Mohamed Salah yebder-d daɣ tidyanin tineggura ay la d-iḍerrun deg tmura taɛṛabin d wamek ay ḥuzant imenɣi afalesṭini, ladɣa tidyanin ay la d-yettilin deg Surya d Yaman, am wakken ay yetthem anabaḍ amarikani ay yefkan afus deg temsalt-a « akken ad yessiweḍ ɣer nnfeɛ-nnes yerna ad as-yeḍmen taɣellist (laman) i Isṛayil ».
Assedrem n Surya, n Yaman neɣ n tmura taɛṛabin niḍen, akken bɣunt ilint, « d ayen ara d-yeglun s lexṣara i yimenɣi afalesṭini », ɣef wakken ay d-yenna, am wakken ay d-iger tiɣri akken ur d-yettili ara lettkal ɣef unabaḍ amarikani « ay yeddan deg yidis n Isṛayil deg 22-a n yiseggasen n lemcawṛat ».
Imḍebber n Terni taɣerfant iger-d tiɣri, deg temsalt-a, i ucaṛeɛ n Isṛayil, am wakken ay d-yenna dakken tiririt yelhan akk i unabaḍ ameḍḍarfu isṛayili netta d asdukkel n Yifalesṭiniyen d ussebded n unabaḍ n umsefham aɣelnaw.
Seg tama niḍen, iger-d daɣ tiɣri i ussudder n tseqquma ay yekkaten ɣef tuqqla n yizruzaɣ, anda ma llant deg umaḍal, ladɣa deg Tuṛuft, akken ad d-sseknen Yifalesṭiniyen tuḍḍfa-nsen deg uzref-a.
Dɣa yerra tajmilt, deg temsalt-a, i waddud n Tdukli Tuṛufit ay iɣunzan ifarisen isṛayiliyen, am akken ay d-yenna dakken yessefk ad yettwassefɛel uɣanzu adamsan d win n tesdawiyin.
Seg tama niḍen, agensas n Terni tamegdayt i uslelli n Falesṭin, Mohamed Hamami, yenna-d dakken Isṛayil « texṣer » deg uxeddim-nnes akken ad tessefcel imenɣi afalesṭini ay yeqqlen « imir-a d ul n uxeddim n tmura taɛṛabin ».
Seg yidis niḍen, iwekked-d dakken « war azref n tuqqkla, s kra n uxeddim ara d-yilin i ferru n taluft n Falesṭin ur yessawaḍ ɣer wacemma ».
Agensas n Terni tamegdayt i uslelli n Falesṭin iḥettet-d dakken yessefk ad d-tili tdukli gar tegrawin tisertiyin, imussa iɣelnawen ifalesṭiniyen d yimeɣnasen.
Dɣa i lmend n waya, iger-d tiɣri i ussebded n unabaḍ n ussukkes aɣelnaw aydeg ara ttekkin akk yidisan n uɣref afalesṭini akken ad bedden deg wudem n unabaḍ isṛayili.
Iger-d daɣ tiɣri ugensas-a i uḍfar n tikli tamaynut deg yimenɣi, d tin aydeg ara d-rren tudert i uzbu aɣerfan ɣef leḥsab n wayen ay d-yenna Useqqamu alemmas afalesṭini deg temlilit-nnes n Meɣres yezrin.
