Asebter amenzawi
Sonatrach tuɣ-d tikeṛṛusin n Renault Symbol « ay d-yettwaxedmen deg Ldzayer »
LDZAYER TAMANEƔT – Takebbanit taɣelnawt n yiserɣa Sonatrach teṭṭef-d, ass n letniyen, deg Ldzayer Tamaneɣt, tikeṛṛusin ay d-tessuter n Renault Symbol « ay d-yettwaxedmen deg Ldzayer », yerna tuɣ-itent-id akken ad tesmel ayen ay d-yettwaxdamen deg tmurt n Ldzayer.
Assuter-a llant deg-s 70 n tkeṛṛusin n Symbol s ssuma n 1,36 n umelyun n yidinaṛen, yerna ad tent-rnun ɣer tkeṛṛusin ay tesseqdac tkebbanit-a deg uxeddim. « Sonatrach tettqadar amenzay-nnes n tkebbanit yellan i lmend n tmurt yerna (s ccɣel-a) tɛewwel s ljehd akken ad tettekki deg tḥemla n « Ad nessudret afaris adzayri » », ɣef wakken ay d-yenna uselway-anemhal amatu uɛḍil n tkebbanit-a, Said Sahnoun, deg tfagla n tuḍḍfa n tkeṛṛusin-a.
Nnig waya, yenna-d dakken Sonatrach tezmer ad ternu ad d-taɣ ifarisen niḍen ara teḥwij. Ɣef leḥsab n yimḍebber-a, ṣṣenf-a n ticcurka yezmer ad yennerni yerna zemren ad ttekkin deg-s yifurka niḍen n Sonatrach am Naftal ay izemren ad tṛekkeb ixezzanen n « Sirghaz » (lgaz imengi n upitṛul) i tkeṛṛusin n Renault ay d-yettwaxdamen deg Ldzayer.
Seg yidis-nnes, anemhal amatu n « Renault Algérie production » (RAP), Guillaume Josselin, yenna-d dakken lluzin-nnes tewjed ad d-telhu d ussuter n tkebbaniyin tiɣelnawin s ubrid n ticcurka.
Lluzin n Renault Algérie n Wad Tlilat (Wehṛan), teldi deg Wambeṛ n 2014, yerna texdem-d, ar ass-a, 5.000 n tkeṛṛusin, yerna la tessefray ad ternu afares-nnes asmi ara yettwassefɛel lqanun yerzan asmad n ussuder ay d-yeffɣen deg uɣmis unṣib aneggaru.
Asurif amezwaru deg uxeddim n lluzin-a d win aydeg ara tessiweḍ ad d-txeddem 25.000 n tkeṛṛusin i useggas, sakkin, ad ternu tezmert n ufares-nnes ɣer 75.000 seg-a ɣer 2019. Lluzin-a la tessefray daɣ ad ternu afmiḍi n unnummed aɣelnaw n sin-nni n leṣnaf n tkeṛṛusin n Symbol ay d-txeddem deg Ldzayer.
S waya, seg-a ɣer tgara n 2015, ikersiyen n tkeṛṛusin-a ad qqlen ad d-ttwaxdamen deg Ldzayer sɣur yiwet n tkebbanit n ticcurka gar Ldzayer d Ṭṭerk. Afmiḍi n unnummed iɛedda, ass-a, i 17%, imi ay llant kra n tceqqufin n uplastik n tkeṛṛusin-a la tent-id-txeddem yiwet n tkebbanit tusligt deg Wehṛan.
