Asebter amenzawi

Taqbuct Tafriqit n Yiɣlanen 2015/U-23: taɣlamt tadzayrit ad turar d Sudan ass n ttlata deg Leblida

LDZAYER TAMANEƔT – Taɣlamt tulimpit tadzayrit n tkurt n uḍar ad textem annan-nnes ay d-tebda dduṛt aya deg Sidi Musa (Ldzayer) s yiwet n temlilit tammidwant mgal teɣlamt tasudanit deg usarir n Mustapha-Tchaker n Leblida ɣef 07s00 n tmeddit.

Asnefran n teɣlamt tulimpit tadzayrit, aswisi Pierre André Schurmann, yefren-d 24 n yimariren ay la yetturaren deg Temɣunin timsadurin 1 d 2 akken ad ttekkin deg wannan-a, yerna aya yudef deg ussejwed-nsen akken ad alin ɣer telɣuɣa n Tefriqt n yiɣlanen CAN-2015.

Ad mlilen daɣ yimariren-a deg Sswis, mi ara tfak tsemhuyt n useggas-a yerna ad sgunfun.

Din, imeddukal n Oussaa Darfalou (RC Laṛebɛa) ad uraren 3 n temliliyin timmidwanin, ɣef wakken ay d-tenna Tfidiṛalit tadzayrit n tkurt n uḍar (FAF).

Taɣlamt tulimpit tadzayrit tettwaɛfa seg snat n tuzzyiwin timezwura n telɣuɣa n Tefriqt n 2015 n U-23, d acu kan ad turar mgal teɣlamt ara irebḥen deg snat-nni n temliliyin n twadda d wuɣal ara d-yilin gar Sierra Leone d Kamrun deg tgara n Mayu 2015.

Timlilit n twadda gar snat-a n tmura ad d-tili deg wass n 22 Mayu deg Sierra Leone, ma d tin n tuqqla ad d-tili deg 29 Mayu deg Kamrun.

Taɣlamt tadzayrit ad turar timlilit n twadda n tuzzya tis kraḍt yerna d taneggarut i lmend n uɛeddi deg wass n 19 Yulyu ay d-yetteddun deg Ldzayer, yerna ad teddu ɣer temlilit n tuqqla ara d-yilin gar 31 Yulyu d 2 Ɣuct.

Aḥric aneggaru n telɣuɣa n Tefriqt n Yiɣlanen n U-23 ad d-yili seg 5 ɣer 19 Dujembeṛ ay d-yetteddun deg Sinigal. Kraḍt (3) n tmura timezwura ara d-yefrurin seg uḥric-a ad ttekkint s yisem n Tefriqt deg Wuraren Ulimpiyen n 2016 deg Rio de Janeiro, ma d tis kuẓet (4) ad turar mgal yiwet seg tmura n Asya.