Asebter amenzawi
Yaman: tamsisit taɛṛabt teqqel ɣer tyita ula ma Iɣlanen Yeddukklen ssutren-d ad ikemmel uḥbas n tyita
LDZAYER TAMANEƔT – Tamsisit taɛṛabt deg Yaman ay yellan ddaw ṛṛay n Tgelda Tasaɛudit, teqqel ɣer tyitiwin-nnes seg yigenni, akken kan ay ifuk uḥbas-nni n yimenɣi i lmend n uɛawen n wid yeḥwajen, ula ma Iɣlanen Yeddukklen gren-d tiɣri akken ad sɣezfen tallit-nni n uḥbas n tyita s semmus (5) n wussan d uḥbas n tyita s lbumbat i lmend n ussiweḍ n lemɛawna ɣer tmiwa ay tḥuza taluft.
Isafagen n temsisit wten, deg yiḍ n lḥedd d letniyen, imukan n yiɣewwaɣen iciɛiyen iḥutiyen deg Ɛaden, deg unẓul n Yaman, deffir ma tfuk tallit-nni n uḥbas n tyita, ɣef wakken ay d-nnant teɣbula tiserdasiyin d yinagan.
Ma ulac, snat n tkeṛṛusin n Yiḥutiyen ay yerrẓen deg tyitiwin-a ay iḥukṛen agmam n Tawahi, deg temdint tameqrant n Ɛaden, am wakken ay yettwet daɣ ugmam n Khor Maksar, ɣef wakken ay d-rnant teɣbula-a, war ma bedrent-d acḥal ay yemmuten seg Yiḥutiyen.
Seg yidis niḍen, yiwet n tyita tḥuza ṣṣur n leqṣer n telwit, ma d tayeḍ tḥuza asadur n yiɣallen uzzigen, d sin n yimukan ay ḍḍfen yiɣewwaɣen d wid yeddan yid-sen, iserdasen ibedden ɣer yidis n uselway aqbur Ali Abdallah Saleh.
Ti d tiytiwin timezwura seg yigenni ay d-yellan deg Yaman segmi ay ifuk uḥbas n tyita ɣef 8s00 n tmeddit (s wakud n Greenwich), d aḥbas ay d-yebdan seg wass n ttlata yezrin i lmend n ussiweḍ n lemɛawna i wid yeḥwajen deg Yaman.
Aḥbas-a n tyita tebda-t-id Tgelda Tasaɛudit ay yellan d timḍebbert n temsisit-a seg 26 Meɣres, ass aydeg ay d-tebda yiwet n tḥemla n tyitiwin tigenwanin mgal yiɣewwaɣen iciɛiyen, akken ad ɛawnen wid yeddan d uselway imennejli Abd Rabbo Mansour Hadi.
Aḥbas-a n tyita yella-d deg-s yimenɣi deg lberr, yerna tikkal, yella wanda ay mmuten medden, ama seg yiɣewwaɣen, ama seg yiɣallen yeddan d Yiḥutiyen, am wakken ay d-yella umbaddel n tyita ɣef tlisa gar Yaman d Tgelda Tasaɛudit, anda ay d-nnan Yisaɛudiyen dakken la ten-id-kkaten seg ugafa n Yaman ay yellan gar yifassen n Yiḥutiyen.
Tamsisit tɛeyyen-d dakken ur tettkemmil ara ad teṣber i « tuffɣiwin-a n ubrid » ay la d-yetteqqalen sɣur Yiḥutiyen, ay yeḍḍfen, seg tazwara n tummɣa-nsen deg Yulyu, timiwa d timeqranin deg tlemmast d utaram n tmurt n Yaman.
