ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⴰⵎⴻⵙⵔⵉⵜ ⵏ ⵜⴻⵏⴹⵉ ⴷⴻⴳ ⵜⵉⵣⵉ ⵡⴻⵣⵣⵓ: ⴷ ⴰⵎⴽⴰⵏ ⵉⴳⴻⵔⵔⵣⴻⵏ ⵉ ⵓⵙⵙⴻⵏⵣⵉ

ⵜⵉⵣⵉ ⵡⴻⵣⵣⵓ – ⵜⴰⵥⵔⵉⴳⵜ ⵜⵉⵙ 7 ⵏ ⵜⵎⴻⵙⵔⵉⵜ ⵜⴰⵖⴻⵍⵏⴰⵡⵜ ⵏ ⵜⴻⵏⴹⵉ ⵜⴰⵎⴻⵏⵙⴰⵢⵜ ⵜⴻⴱⴷⴰ ⴰⵙⵙ ⵍⴻⵜⵏⵉⵢⴻⵏ ⴷⴻⴳ ⵓⵎⵕⴰⵃ ⵏ ⵓⴽⵏⴰⵏⴻⵔ ⵎⵧⵀⴰⵏⴷ ⵧⵓⵍⵀⴰⴷ ⴷⴻⴳ ⵜⵉⵣⵉ ⵡⴻⵣⵣⵓ ⵢⴻⵔⵏⴰ ⵜⴻⵍⵍⴰ-ⴷ ⴷ ⴰⵎⴽⴰⵏ ⵓⵙⵙⴻⵏⵣⵉ ⵉⴳⴻⵔⵔⵣⴻⵏ ⵉ ⵢⵉⵏⴹⴻⵏ (ⵡⵉⴷ ⵉⵅⴻⴷⴷⵎⴻⵏ ⵚⵚⴻⵏⵄⴰⵜ-ⴰ) ⴰⵢ ⴷ-ⵢⵓⵙⴰⵏ ⵙⴻⴳ ⵜⵡⵉⵍⴰⵢⵉⵏ ⵢⴻⵎⴳⴻⵔⵔⴰⴷⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵏⵏⴰⵏ ⵢⵉⵏⴻⵎⵣⵉⴽⴽⵏⴻⵏ.

ⵉⵎⵜⵜⴻⴽⴽⵉⵢⴻⵏ ⴷⴻⴳ ⵜⵎⴻⵙⵔⵉⵜ-ⴰ ⴰⵔⴰ ⴷ-ⵢⵉⵍⵉⵏ ⴳⴰⵔ 18 ⴷ 23 ⵎⴰⵢⵓ, ⵏⵏⴰⵏ-ⴷ ⴷⴰⴽⴽⴻⵏ ⵜⵜⵉⵄⴰⴷ-ⴰ ⴰⴷ ⵜⴻⵏ-ⵢⴻⵊⵊ ⴰⴷ ⵙⵙⴻⵏⵣⴻⵏ ⵙⵙⴻⵍⵄⴰ-ⵏⵙⴻⵏ ⴰⵛⴽⵓ « ⵉⵎⴻⵣⴷⴰⵖⴻⵏ ⵏ ⵜⵡⵉⵍⴰⵢⵜ ⵏ ⵜⵉⵣⵉ ⵡⴻⵣⵣⵓ ⴹⴹⴼⴻⵏ ⵎⵍⵉⵃ ⴷⴻⴳ ⵡⴰⴽⴽ ⴰⵢⴻⵏ ⵢⴻⵇⵇⵏⴻⵏ ⵖⴻⵔ ⵜⴻⵏⴹⵉ, ⵢⴻⵔⵏⴰ ⵃⴻⵎⵎⵍⴻⵏ ⴰⴷ ⵙⵙⵏⴻⵏ ⵜⵉⵖⴰⵡⵙⵉⵡⵉⵏ ⵏ ⵜⵡⵉⵍⴰⵢⵉⵏ ⵏⵉⴹⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵏⵏⴰⵏ ⵢⵉⵏⴹⴻⵏ ⵙⴻⴳ ⵜⵡⵉⵍⴰⵢⵉⵏ ⵏ ⵉⵍⵍⵉⵣⵉ, ⵜⵉⵒⴰⵣⴰ, ⴱⵓⵎⴻⵔⴷⴰⵙ ⴷ ⵜⵉⵏⴷⵓⴼ.

ⵉⵎⴻⵛⵜⵓⵔⴰ ⵜⵜⴰⵙⴻⵏ-ⴷ ⵙ ⵡⴰⵟⴰⵙ ⴰⴽⴽⴻⵏ ⴽⴰⵏ ⴰⵔⴰ ⵜⴻⵔⵥⴻⵎ ⵜⵎⴻⵙⵔⵉⵜ-ⴰ ⴰⵢ ⴷ-ⵢⴻⵜⵜⵉⵍⵉⵏ ⵙ ⵓⵎⵄⴰⵡⴻⵏ ⴳⴰⵔ ⵜⴻⵅⵅⴰⵎⵜ ⵜⴰⴷⵉⴳⴰⵏⵜ ⵏ ⵜⴻⵏⴹⵉ ⴷ ⵚⵚⴻⵏⵄⴰⵜ (ⵛⴰⵎ) ⴷ ⵓⴳⵔⴰⵡ ⴰⵖⴻⵔⴼⴰⵏ ⵏ ⵜⵡⵉⵍⴰⵢⵜ, ⵢⴻⵔⵏⴰ ⵍⵖⴰⵛⵉ ⵃⴻⵎⵎⵍⴻⵏ ⴰⴷ ⴷ-ⵙⵖⴻⵏ ⵜⵉⵖⴰⵡⵙⵉⵡⵉⵏ ⵏ ⵜⴻⵏⴹⵉ. ⴷ ⴰⵢⴰ ⴰⵔⴰ ⵢⴻⵜⵜⴻⴽⴽⵉⵏ ⴷⴻⴳ ⵓⵙⵙⴻⵔⴱⴻⵃ ⵏ ⵜⴻⴷⵢⴰⵏⵜ-ⴰ.

ⵉ ⵓⵙⵎⴻⴽⵜⵉ, ⴷⴻⴳ ⵜⴻⵥⵔⵉⴳⵜ ⵢⴻⵣⵔⵉⵏ, ⴰⵣⴰⵍ ⵏ 25.000 ⵏ ⵢⵉⵏⴻⵔⵣⴰⴼⴻⵏ ⴰⵢ ⴷ-ⵢⵓⵙⴰⵏ, ⵢⴻⵔⵏⴰ ⴰⵎⴹⴰⵏ ⵏ ⵢⵉⵏⴻⵔⵣⴰⴼⴻⵏ ⵉⵔⴻⵏⵏⵓ ⵡⴰⵔ ⴰⵃⴱⴰⵙ ⵙⴻⴳ ⵓⵙⴻⴳⴳⴰⵙ ⴰⵔ ⴰⵙⴻⴳⴳⴰⵙ. ⵜⴰⵥⵔⵉⴳⵜ-ⴰ ⵜⵉⵙ 7 ⴷ ⵜⵉⵏ ⴰⵢⴷⴻⴳ ⵜⵜⴻⴽⴽⴰⵏ 180 ⵏ ⵢⵉⵏⴹⴻⵏ ⴰⵢ ⴷ-ⵢⵓⵙⴰⵏ ⵙⴻⴳ 38 ⵏ ⵜⵡⵉⵍⴰⵢⵉⵏ, ⴷⴻⴳ ⵡⴰⴽⵓⴷ ⴰⵢⴷⴻⴳ ⵜⵉⵏ ⵏ ⵓⵙⴻⴳⴳⴰⵙ ⵢⴻⵣⵔⵉⵏ (2014) ⵓⵙⴰⵏ-ⴷ ⵖⴻⵔ-ⵙ 150 ⵏ ⵢⵉⵏⴹⴻⵏ ⵙⴻⴳ 36 ⵏ ⵜⵡⵉⵍⴰⵢⵉⵏ. ⴷⴻⴳ 2009, ⴷⴻⴳ ⵜⴻⵥⵔⵉⴳⵜ-ⵏⵏⴻⵙ ⵜⴰⵎⴻⵣⵡⴰⵔⵓⵜ, 70 ⴽⴰⵏ ⵏ ⵢⵉⵎⵜⵜⴻⴽⴽⵉⵢⴻⵏ ⴰⵢ ⴷ-ⵢⵓⵙⴰⵏ ⵙⴻⴳ ⵡⴰⵣⴰⵍ ⵏ 20 ⵏ ⵜⵡⵉⵍⴰⵢⵉⵏ.

ⵜⴰⴷⵢⴰⵏⵜ-ⴰ ⵜⵜⵚⴰⵃⴻⵏ-ⵜⵜ-ⵉⴷ ⵢⴰⵍ ⴰⵙⴻⴳⴳⴰⵙ ⵍⴻⵎⵄⴰⵡⵏⴰ ⵏ 3 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵉⵏⴰⵕⴻⵏ ⵙⵖⵓⵔ ⵓⴳⵔⴰⵡ ⴰⵖⴻⵔⴼⴰⵏ ⵏ ⵜⵡⵉⵍⴰⵢⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵙⴻⵍⵡⴰⵢ-ⵏⵏⴻⵙ ⵀⵧⵛⵉⵏⴻ ⵀⴰⵔⵧⵓⵏ, ⴰⵢ ⴷ-ⵢⴻⵔⵏⴰⵏ, ⵉ ⵍⵎⴻⵏⴷ ⵏ ⵓⵔⵥⴰⵎ ⵏ ⵜⵎⴻⵙⵔⵉⵜ-ⴰ, ⴷⴰⴽⴽⴻⵏ ⴰⴳⵔⴰⵡ ⵏ ⵜⵡⵉⵍⴰⵢⵜ ⵢⴻⵡⵊⴻⴷ ⴰⴽⴽⴻⵏ ⴰⴷ ⴷ-ⵢⴻⴼⴽ ⴰⴽⴽ ⵜⵜⴰⵡⵉⵍⴰⵜ ⵢⴻⵙⵙⴻⴼⴽⴻⵏ ⵉ ⵓⵙⵏⴻⵔⵏⵉ ⵏ ⵜⴻⴷⵢⴰⵏⵜ-ⴰ.

ⴰⵏⴻⵎⵀⴰⵍ ⵏ ⵜⴻⵅⵅⴰⵎⵜ ⵏ ⵜⴻⵏⴹⵉ ⴷ ⵚⵚⴻⵏⵄⴰ, ⴰⴱⴷⴻⵍⴽⵔⵉⵎ ⴱⴻⵔⴽⵉ, ⵢⴻⵙⵎⴻⴽⵜⵉ-ⴷ ⴷⴰⴽⴽⴻⵏ ⵉⵙⵡⵉ ⵏ ⵜⵎⴻⵙⵔⵉⵜ-ⴰ ⵏⴻⵜⵜⴰ ⴷ ⵜⵓⴽⵛⵉ ⵏ ⵓⵎⴽⴰⵏ ⵉ ⵢⵉⵏⴹⴻⵏ ⴰⴽⴽⴻⵏ ⴰⴷ ⵙⵙⴻⵏⵣⴻⵏ ⵙⵙⴻⵍⵄⴰ-ⵏⵙⴻⵏ. ⵜⴰⵎⴻⵙⵔⵉⵜ-ⴰ ⵜⴻⵜⵜⵉⵍⵉ-ⴷ ⴷⴰⵖ ⴷ ⵜⴰⵙⵡⵉⵄⵜ ⴰⵢⴷⴻⴳ ⴰⵔⴰ ⵎⵍⵉⵍⴻⵏ ⵢⵉⵏⴹⴻⵏ ⵏ ⵜⵡⵉⵍⴰⵢⵉⵏ ⵢⴻⵎⴳⴻⵔⵔⴰⴷⴻⵏ ⵏ ⵜⵎⵓⵔⵜ ⴰⴽⴽⴻⵏ ⴰⴷ ⵎⴱⴰⴷⴷⴰⵍⴻⵏ ⵜⵜⴻⵊⵕⵉⴱⴰⵜ-ⵏⵙⴻⵏ ⵢⴻⵔⵏⴰ ⴰⴷ ⵎⵢⴻⵏⵚⴰⵃⴻⵏ, ⴰⵎ ⵡⴰⴽⴽⴻⵏ ⴰⵢ ⴷ-ⵜⴻⵜⵜⵉⵍⵉ ⴷ ⵜⵜⵉⵄⴰⴷ ⵡⵓⵖⵓⵔ ⴷ-ⵜⵜⴰⵙⴻⵏ ⵎⴻⴷⴷⴻⵏ ⴰⴽⴽⴻⵏ ⴰⴷ ⴷ-ⴰⵖⴻⵏ ⵜⵉⵖⴰⵡⵙⵉⵡⵉⵏ ⵏ ⵜⴻⵏⴹⵉ.

ⵜⵜⴰⵡⵉⵍⴰⵜ ⵏ ⵓⵄⴰⵡⴻⵏ ⵉ ⵓⵙⵏⵓⵍⴼⵓ ⵏ ⵓⵅⴻⴷⴷⵉⵎ, ⵜⵉⴷⴷⵓⴽⵍⵉⵡⵉⵏ ⵏ ⵜⴻⵏⴹⵉ, ⵜⵉⴷ ⵏ ⵜⵡⴻⵏⵏⴰⴹⵜ, ⵜⵉⴷ ⵏ ⵢⵉⴷⵍⴻⵙ ⴷ ⵜⵉⴷ ⵏ ⵢⵉⵎⴻⵄⴷⴰⵕ ⵃⴻⴷⵕⴻⵏⵜ ⴷⴰⵖ ⴷⴻⴳ ⵜⵜⵉⵄⴰⴷ-ⴰ. ⵢⵉⵡⴻⵜ ⵏ ⵜⵏⴻⴼⵙⴰⵔⵜ ⵜⴻⵜⵜⵓⵏⴻⴼⴽ ⵉ ⵜⵖⴰⵡⵙⵉⵡⵉⵏ ⵏ ⵓⵛⴻⴱⴱⴻⵃ ⵢⴻⵔⵏⴰ ⵔⵙⴻⵏ ⴷⴻⴳ-ⵙ ⵢⵉⵖⴻⵔⵔⵓⴱⴰ ⵉⵎⴻⵥⵢⴰⵏⴻⵏ ⴷ ⵏⵏⵇⵓⵛⴰⵜ ⵖⴻⴼ ⵡⴰⵍⵓⵎⵉⵏⵢⵓⵎ, ⴷ ⵢⵉⵡⴻⵜ ⵏ ⵜⵥⵓⵔⵉ ⴰⵢⴷⴻⴳ ⵎⵎⵓⵣⵣⴳⴻⵏ (ⵜⵅⴻⵚⵚⴻⵚⴻⵏ) ⵢⵉⵎⴻⵃⴱⴰⵙ ⵏ ⵍⵃⴻⴱⵙ ⵏ ⵜⵉⵣⵉ ⵡⴻⵣⵣⵓ, ⵢⴻⵔⵏⴰ ⴰⵟⴰⵙ ⵏ ⵎⴻⴷⴷⴻⵏ ⴰⵢ ⴷ-ⵢⴻⵔⵣⴰⵏ ⵖⴻⴼ ⵜⵏⴻⴼⵙⴰⵔⵜ-ⴰ ⵉⵎⵉ ⴰⵢ ⵜⴻⵏ-ⵉⴷ-ⵜⴻⵊⴱⴻⴷ ⵛⵛⴱⴰⵃⴰ ⵏ ⵜⵖⴰⵡⵙⵉⵡⵉⵏ-ⵏⵏⵉ ⴰⵢ ⵢⴻⵃⵡⴰⵊⴻⵏ ⵚⵚⴱⴻⵔ ⴰⴽⴽⴻⵏ ⴰⴷ ⵜⴻⵏⵜ-ⵉⴷ-ⵅⴻⴷⵎⴻⵏ, ⴰⵎ ⵡⴰⴽⴽⴻⵏ ⴰⵢ ⵡⴻⵀⵎⴻⵏ ⵍⵖⴰⵛⵉ ⵎⵉ ⵥⵔⴰⵏ ⴽⵔⴰ ⵙⴻⴳ ⵜⵖⴰⵡⵙⵉⵡⵉⵏ ⵉⵛⴻⴱⵃⴻⵏ ⴰⴽⴽ ⴰⵢ ⴷ-ⴳⴰⵏ ⵢⵉⵎⴻⵃⴱⴰⵙ-ⴰ.

ⴰⵟⴰⵙ ⵙⴻⴳ ⵚⵚⴻⵏⵄⴰⵜ ⵏ ⵜⴻⵏⴹⵉ ⵜⴰⵎⴻⵏⵙⴰⵢⵜ ⴰⵢ ⵉⵃⴻⴷⵕⴻⵏ ⴷⴻⴳ ⵜⵎⴻⵙⵔⵉⵜ-ⴰ, ⴳⴰⵔ-ⴰⵙⴻⵏⵜ ⵉⵙⵖⵓⵏⴻⵏ, ⵉⵛⴻⴹⴹⵉⴹⴻⵏ, ⵉⵇⴻⵛⵡⴰⵍⴻⵏ, ⴰⴼⴻⵅⵅⴰⵔ, ⵜⵉⵕⴰⴽⵏⵉⵡⵉⵏ ⴷ ⵜⴻⵎⵥⵉⴷⵉⵏ ⵜⵉⵎⴻⵏⵙⴰⵢⵉⵏ. ⴰⴷ ⴷ-ⵢⵉⵍⵉ ⴷⴰⵖ ⵡⴰⵀⵉⵍ ⵏ ⵓⵙⵙⴻⴽⴼⴻⴹ ⴰⴷⴻⵍⵙⴰⵏ, ⵢⴻⵍⵍⴰ ⴷⴰⵖ ⵓⵙⴰⵔⴰⴳ ⵖⴻⴼ ⵍⴰⵜⴻⵕ ⴰⵢ ⵜⴻⵙⵄⴰ ⵜⴻⵏⴹⵉ ⴷⴻⴳ ⵜⵏⴻⴼⵍⵉⵜ ⵜⴰⴷⵉⴳⴰⵏⵜ, ⴰⵎ ⵡⴰⴽⴽⴻⵏ ⴰⵔⴰ ⴷ-ⵜⵉⵍⵉ ⵜⴻⵎⵙⵉⵣⵡⴻⵔⵜ ⵏ ⵓⴼⴰⵔⵉⵙ ⵉⵎⵅⴻⵢⵢⴻⵔ ⴰⴽⴽ ⵏ ⵜⴻⵏⴹⵉ ⴷⴻⴳ ⵜⵎⴻⵙⵔⵉⵜ-ⴰ.