ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵉⵅⴻⴷⴷⴰⵎⴻⵏ ⵏ ⵓⵟⵔⴰⵎⵡⴰⵢ ⵏ ⵡⴻⵀⵕⴰⵏ ⵇⵇⵍⴻⵏ Ɣⴻⵔ ⵓⵅⴻⴷⴷⵉⵎ
ⵡⴻⵀⵕⴰⵏ – ⵉⵅⴻⴷⴷⴰⵎⴻⵏ ⵏ ⵓⵟⵔⴰⵎⵡⴰⵢ ⵏ ⵡⴻⵀⵕⴰⵏ, ⴰⵢ ⵉⴳⴰⵏ ⴰⵙⵙⵓⵏⴷⴻⴷ (ⵍⴰⴳⵔⵉⴼ) ⵙⴻⴳ ⵓⵎⴻⵏⵣⵓ ⵏ ⵎⴰⵢⵓ ⵢⴻⵣⵔⵉⵏ, ⴼⵓⴽⴻⵏ ⴰⵙⵙⵓⵏⴷⴻⴷ-ⵏⵙⴻⵏ ⴰⵙⵙ ⵏ ⵍⴻⵜⵏⵉⵢⴻⵏ ⵙⴷⴻⴼⴼⵉⵔ ⵎⴰ ⵜⴳⴻⵔ-ⴷ ⵜⵉⵖⵔⵉ ⵜⴷⵓⴽⵍⵉ ⵏ ⵜⵡⵉⵍⴰⵢⵜ ⵏ ⵓⴳⵜⴰ ⴰⴽⴽⴻⵏ ⴰⴷ ⵇⵇⵍⴻⵏ ⵖⴻⵔ ⵓⵅⴻⴷⴷⵉⵎ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵉⵅⴻⴱⴱⴻⵔ ⵢⵉⵎⴽⴻⵍⵍⴻⴼ ⵙ ⵜⴻⵖⵡⴰⵍⵜ ⴷⴻⴳ ⵜⴽⴻⴱⴱⴰⵏⵉⵜ ⵏ ⵙⴻⵜⵔⴰⵎ.
ⵜⴰⴷⵓⴽⵍⵉ ⵏ ⵜⵡⵉⵍⴰⵢⵜ ⵏ ⵜⴷⵓⴽⵍⵉ ⵜⴰⵎⴰⵜⵓⵜ ⵏ ⵢⵉⵅⴻⴷⴷⴰⵎⴻⵏ ⵉⴷⵣⴰⵢⵔⵉⵢⴻⵏ ⵜⴳⴻⵔ-ⴷ ⵜⵉⵖⵔⵉ, ⴰⵙⵙ ⵏ ⵍⵃⴻⴷⴷ, ⴰⴽⴽⴻⵏ ⴰⴷ ⵇⵇⵍⴻⵏ ⵢⵉⵅⴻⴷⴷⴰⵎⴻⵏ ⵏ ⵙⴻⵜⵔⴰⵎ ⵖⴻⵔ ⵓⵅⴻⴷⴷⵉⵎ. ⵜⴻⵍⵍⴰ-ⴷ ⵢⵉⵡⴻⵜ ⵏ ⵜⴻⵎⵍⵉⵍⵉⵜ, ⵙⴰⴽⴽⵉⵏ, ⴳⴰⵔ ⵢⵉⴳⴻⵏⵙⴰⵙⴻⵏ ⵏ ⵢⵉⵅⴻⴷⴷⴰⵎⴻⵏ ⴰⵢ ⵉⴳⴰⵏ ⴰⵙⵙⵓⵏⴷⴻⴷ ⴷ ⵢⵉⵎⴹⴻⴱⴱⵔⴻⵏ ⵏ ⵓⵏⵎⴰⵍⵓ (ⵙⵙⴰⵏⴷⵉⴽⴰ) ⵏ ⵜⴷⵓⴽⵍⵉ ⵏ ⵜⵡⵉⵍⴰⵢⵜ ⵏ ⵓⴳⵜⴰ. ⵉⵏⴻⴳⴳⵓⵔⴰ-ⴰ ⴹⴻⵎⵏⴻⵏ-ⴰⵙⴻⵏ ⵉ ⵢⵉⵅⴻⴷⴷⴰⵎⴻⵏ-ⵏⵏⵉ ⴰⴷ ⴰⵙⴻⵏ-ⴷ-ⴼⵔⵓⵏ ⵓⴳⵓⵔⴻⵏ-ⵏⵙⴻⵏ ⵢⴻⵎⴳⴻⵔⵔⴰⴷⴻⵏ ⵙ ⵓⵎⵛⵉⵡⴻⵕ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⴻⵖⴱⴰⵍⵓⵜ-ⴰ.
ⵉ ⵓⵙⵎⴻⴽⵜⵉ, ⵙⴻⵜⵔⴰⵎ ⴷ ⵏⴻⵜⵜⴰⵜ ⴰⵢ ⴷ ⵜⴰⴽⴻⴱⴱⴰⵏⵉⵜ ⴰⵢ ⵢⴻⵙⵙⴻⴷⴷⴰⵢⴻⵏ ⴰⵟⵔⴰⵎⵡⴰⵢ ⵏ ⵡⴻⵀⵕⴰⵏ. ⴷⴻⴼⴼⵉⵔ ⵜⴻⵎⵍⵉⵍⵉⵜ-ⵏⵏⵉ, ⵢⴻⵍⵍⴰ-ⴷ ⵓⴳⵔⴰⵡ ⴰⵎⴰⵜⵓ ⵏ ⵢⵉⵅⴻⴷⴷⴰⵎⴻⵏ ⵏ ⵜⴽⴻⴱⴱⴰⵏⵉⵜ-ⴰ ⴰⵙⵙ ⵏ ⵍⵃⴻⴷⴷ ⵜⴰⵎⴻⴷⴷⵉⵜ, ⴷ ⵡⵉⵏ ⴰⵢⴷⴻⴳ ⵉⵅⴻⴷⴷⴰⵎⴻⵏ ⴰⵢ ⵉⵃⴻⴱⵙⴻⵏ ⴰⵅⴻⴷⴷⵉⵎ ⵎⵙⴻⴼⵀⴰⵎⴻⵏ ⴰⴷ ⵇⵇⵍⴻⵏ ⵖⴻⵔ ⵓⵅⴻⴷⴷⵉⵎ ⵙⴻⴳ ⵡⴰⵙⵙ ⵏ ⵍⴻⵜⵏⵉⵢⴻⵏ 18 ⵎⴰⵢⵓ.
ⵉⵅⴻⴷⴷⴰⵎⴻⵏ-ⴰ ⴰⵢ ⵉⵃⴻⴱⵙⴻⵏ ⴰⵅⴻⴷⴷⵉⵎ ⵍⴰ ⵙⵙⵓⵜⵓⵔⴻⵏ ⴰⴷ ⵜⵜⵡⴰⵙⴼⴻⵄⵍⴻⵏ ⵢⵉⵃⴻⵣⵣⵉⴱⴻⵏ ⵢⴻⵇⵇⵏⴻⵏ ⵖⴻⵔ ⵓⵅⴻⵍⵍⴻⵚ ⵏ ⵙⵙⵡⴰⵢⴻⵄ ⵏ ⵣⵣⵢⴰⴷⴰ, ⴰⵙⵙⴻⵍⵀⵓ ⵏ ⵓⵙⵙⴻⴷⴷⵓ ⵏ ⵓⵅⴻⴷⴷⵉⵎ ⴷ ⵓⵜⵜⵉⵅⴻⵔ ⵏ ⵡⵉⵏ ⵢⴻⵍⵍⴰⵏ ⵉⵎⵉⵔ-ⴰ ⴷ ⴰⵏⴻⵎⵀⴰⵍ ⵏ ⵙⴻⵜⵔⴰⵎ. ⵉⵅⴻⴷⴷⴰⵎⴻⵏ-ⴰ ⵍⴰ ⴷ-ⵙⵙⵓⵜⵓⵔⴻⵏ ⴷⴰⵖ ⵓⴳⴰⵔ ⵏ ⵜⵖⴻⵍⵍⵉⵙⵜ (ⵍⴰⵎⴰⵏ) ⵉ ⵢⵉⵏⴻⵀⵀⴰⵕⴻⵏ ⵏ ⵓⵟⵔⴰⵎⵡⴰⵢ ⴷ ⵢⵉⵎⴻⴳⴳⵉⵢⴻⵏ ⵏ ⵜⵄⴻⵙⵙⴰⵙⵜ ⴷⴻⴳ ⵓⴱⵔⵉⴷ ⵏ ⵓⵟⵔⴰⵎⴰⵢ, ⴰⵎ ⵡⴰⴽⴽⴻⵏ ⴰⵢ ⴱⵖⴰⵏ ⴰⴷ ⵢⵉⵍⵉ ⵓⵎⴻⵙⵏⵉ ⴰⵔⴰ ⵢⴻⵙⵙⴰⵡⴰⴹⴻⵏ ⵉⵅⴻⴷⴷⴰⵎⴻⵏ ⴷⴻⴳ ⵜⵍⴻⵎⵎⴰⵙⵜ ⵏ ⵡⴰⵙⵙ ⵢⴻⵔⵏⴰ ⴰⴷ ⵢⴻⵜⵜⵡⴰⴱⵟⴻⵍ ⵓⵛⴰⵕⴻⵄ ⵏ ⵢⵉⵅⴻⴷⴷⴰⵎⴻⵏ ⴰⵢ ⵉⵃⴻⴱⵙⴻⵏ ⴰⵅⴻⴷⴷⵉⵎ.
ⵜⴰⵎⴻⵀⵍⴰ ⵏ ⵙⴻⵜⵔⴰⵎ ⵜⴳⴻⵔ-ⴷ ⵜⵉⵖⵔⵉ, ⵓⵇⴱⴻⵍ ⴰⵢⴰ, ⵉ ⵢⵉⵅⴻⴷⴷⴰⵎⴻⵏ ⴰⵢ ⵉⵃⴻⴱⵙⴻⵏ ⴰⵅⴻⴷⴷⵉⵎ ⴰⴽⴽⴻⵏⴰ ⴷ ⵇⵇⵍⴻⵏ ⵖⴻⵔ ⵓⵅⴻⴷⴷⵉⵎ-ⵏⵙⴻⵏ, ⴷⴻⴳ ⵢⵉⵡⴻⵏ ⵏ ⵓⴳⵔⴰⵡ ⴰⵎⴰⵜⵓ ⴰⵢ ⴷ-ⵢⴻⵍⵍⴰⵏ ⴷⴻⴳ 12 ⵎⴰⵢⵓ ⵢⴻⵣⵔⵉⵏ ⴷⴻⴳ ⵍⴱⵉⵔⵓ-ⵏⵏⴻⵙ ⴰⵍⴻⵎⵎⴰⵙ ⵏ ⵡⴻⵀⵕⴰⵏ, ⴷ ⴰⴳⵔⴰⵡ ⴰⵢⴷⴻⴳ ⵜⴻⵜⵜⴻⴽⴽⴰ ⵜⵎⴰⵔⵉⵜ ⵜⴰⵎⴰⵜⵓⵜ ⵏ ⵓⵏⵎⴰⵍⵓ.
ⴰⵟⵔⴰⵎⵡⴰⵢ ⵢⴻⵍⵍⴰ ⵢⴻⵜⵜⴻⴷⴷⵓ ⴽⴰⵏ ⵙ ⵙⵙⴻⵔⴱⵉⵙ ⴰⵎⴻⵥⵢⴰⵏ ⴰⵢⴷⴻⴳ ⵅⴻⴷⵎⴻⵏ ⵢⵉⵏⴻⵀⵀⴰⵕⴻⵏ ⵓⵔ ⵢⴻⵜⵜⴻⴽⴽⴰⵏ ⴰⵔⴰ ⴷⴻⴳ ⵓⵃⴱⴰⵙ ⵏ ⵓⵅⴻⴷⴷⵉⵎ. ⴰⵅⵅⴰⵎ ⵏ ⵛⵛⵕⴻⵄ ⵏ ⵙⵙⴻⵏⵢⴰ ⵢⴻⵃⴽⴻⵎ-ⴷ, ⴰⵙⵙ ⵏⵏ 4 ⵎⴰⵢⵓ ⵢⴻⵣⵔⵉⵏ, ⴷⴰⴽⴽⴻⵏ ⴰⵙⵙⵓⵏⴷⴻⴷ-ⴰ ⵢⴻⴼⴼⴻⵖ ⵉ ⵍⵇⴰⵏⵓⵏ.
