ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵙⵙⴻⴱⴷⴻⴷ ⵏ ⵜⵙⵓⴷⵓⵜ ⵜⴰⵖⴻⵍⵏⴰⵡⵜ ⵉ ⵓⵃⵓⴷⴷⵓ ⵉⴳⴻⵔⴷⴰⵏ (ⵍⵧⵓⵀ)

ⵍⴷⵣⴰⵢⴻⵔ ⵜⴰⵎⴰⵏⴻƔⵜ – ⴰⵏⴻⵖⵍⴰⴼ ⵏ ⵜⴻⵖⴷⴻⵎⵜ, ⵜⴰⵢⴻⴱ ⵍⵧⵓⵀ, ⵢⴻⵏⵏⴰ-ⴷ ⴰⵙⵙ ⵏ ⵍⴰⵕⴻⴱⵄⴰ ⴷⴻⴳ ⵍⴷⵣⴰⵢⴻⵔ ⵜⴰⵎⴰⵏⴻⵖⵜ ⴷⴰⴽⴽⴻⵏ ⵜⴻⵏⵏⵓⵍⴼⴰ-ⴷ ⵢⵉⵡⴻⵜ ⵏ ⵜⵙⵓⴷⵓⵜ ⵜⴰⵖⴻⵍⵏⴰⵡⵜ ⵉ ⵓⵃⵓⴷⴷⵓ ⴷ ⵓⵙⵎⴰⵍ ⵏ ⵢⵉⴳⴻⵔⴷⴰⵏ, ⴷ ⵜⵉⵏ ⴰⵔⴰ ⵢⴻⵙⵙⴻⵍⵡⵉ ⵉⵎⵡⴻⴽⴽⴻⵍ ⴰⵖⴻⵍⵏⴰⵡ ⵢⴻⵔⵏⴰ ⴰⵢⴰ ⵢⴻⵍⵍⴰ-ⴷ « ⵉ ⵓⵙⵙⵎⴰⴷ ⵏ ⵜⵙⴻⵔⵜⵉⵜ ⵜⴰⵖⴻⵍⵏⴰⵡⵜ ⵏ ⵓⵃⵓⴷⴷⵓ ⵏ ⵓⵃⵔⵉⵛ-ⴰ ⵏ ⵜⵎⴻⵜⵜⵉ ».

ⵎⴰⵙⵙ ⵍⵧⵓⵀ ⵢⴻⵏⵏⴰ-ⴷ ⴰⵢⴰ ⵎⵉ ⴷ-ⵢⴻⵔⵔⴰ ⵖⴻⴼ ⵜⵓⵜⵜⵔⵉⵡⵉⵏ ⵏ ⵢⵉⵎⴰⵣⴰⵏⴻⵏ ⵏ ⵓⴳⵔⴰⵡ ⴰⵖⴻⵔⴼⴰⵏ ⴰⵖⴻⵍⵏⴰⵡ ⴷⴻⴳ ⵢⵉⵡⴻⵜ ⵏ ⵜⵖⵉⵎⵉⵜ ⴰⵢ ⴷ-ⵢⴻⵍⵍⴰⵏ ⵉ ⵍⵎⴻⵏⴷ ⵏ ⵓⵙⵙⵓⴽⴽⵓ ⵏ ⵜⵉⵟ ⵖⴻⴼ ⵓⵙⴻⵏⴼⴰⵔ ⵏ ⵍⵇⴰⵏⵓⵏ ⵢⴻⵇⵇⵏⴻⵏ ⵖⴻⵔ ⵓⵃⵓⴷⴷⵓ ⵏ ⵓⴳⵔⵓⴷ, ⵢⴻⵔⵏⴰ ⵢⴻⵏⵏⴰ-ⴷ ⵓⵏⴻⵖⵍⴰⴼ ⴷⴰⴽⴽⴻⵏ ⵍⵇⴰⵏⵓⵏ-ⴰ ⵢⴻⵙⵙⴻⴼⵔⴰⵢ ⵍⴰⴷⵖⴰ « ⴰⵙⵙⴻⴱⴷⴻⴷ ⵏ ⵜⵙⵓⴷⵓⵜ ⵜⴰⵖⴻⵍⵏⴰⵡⵜ ⵉ ⵓⵃⵓⴷⴷⵓ ⴷ ⵓⵙⵎⴰⵍ ⵏ ⵓⴳⵔⵓⴷ ⵢⴻⵔⵏⴰ ⴰⴷ ⵜⵜ-ⵢⴻⵙⵙⴻⵍⵡⵉ ⵉⵎⵡⴻⴽⴽⴻⵍ ⴰⵖⴻⵍⵏⴰⵡ ⴰⵔⴰ ⴷ-ⵢⴻⵍⵀⵓⵏ ⵙ ⵓⵀⴻⵢⵢⵉ ⵏ ⵡⴰⵀⵉⵍⴻⵏ ⴷ ⵢⵉⵕⴰⴱⵓⵍⴻⵏ ⵢⴰⵍ ⴰⵙⴻⴳⴳⴰⵙ ».

ⵏⵏⵉⴳ ⵡⴰⵢⴰ, ⴰⵏⴻⵖⵍⴰⴼ ⵢⴻⵏⵏⴰ-ⴷ ⴷⴰⴽⴽⴻⵏ ⵍⴷⵣⴰⵢⴻⵔ ⵜⴻⵅⴷⴻⵎ, ⵙⴻⴳ ⵡⴰⵙⵎⵉ ⴰⵢ ⵜⴻⵡⵡⵉ ⴰⵣⴰⵔⵓⴳ, ⴰⴽⴽⴻⵏ ⴰⴷ ⵜⵃⵓⴷⴷ ⴰⴳⵔⵓⴷ ⵙ ⵍⴻⵇⴰⵏⵉⵏ ⴷⴻⴳ ⵡⴰⴽⴽ ⵉⵃⵔⵉⵛⴻⵏ, ⵍⴰⴷⵖⴰ ⴰⵃⵔⵉⵛ ⵏ ⵓⵙⵙⴻⴳⵎⵉ (ⵜⵜⴻⵕⴱⴻⵢⵢⴰ), ⵜⴰⴷⴰⵡⵙⴰ ⴷ ⵜⴻⵎⵙⴻⵜⵍⴻⵍⵜ ⵜⴰⵖⴻⵍⵏⴰⵡⵜ.

ⵉ ⵓⵙⵙⵉⴼⵙⴻⵙ ⵏ ⵓⵅⴻⴷⴷⵉⵎ ⵏ ⵢⵉⵎⵓⵣⵣⴰⴳ ⴰⵢ ⴷ-ⵢⴻⵍⵀⴰⵏ ⵙ ⵢⵉⴳⴻⵔⴷⴰⵏ, ⵍⵇⴰⵏⵓⵏ-ⴰ ⴰⵎⴰⵢⵏⵓ ⴰⴷ ⵙⴽⴻⵛⵎⴻⵏ ⴷⴻⴳ-ⵙ ⵛⵛⵓⵔⵓⴹ ⵏ ⵓⵃⵓⴷⴷⵓ ⴰⵏⵎⴻⵜⵜⵉ ⴷ ⵓⵃⵓⴷⴷⵓ ⵏ ⵍⵇⴰⵏⵓⵏ ⴰⵢ ⵢⴻⵍⵍⴰⵏ ⴷⴰⵖ ⴷⴻⴳ ⵍⵇⴰⵏⵓⵏ ⵏ ⵓⵄⴰⵇⴻⴱ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵅⴹⴰⴼ ⵏ ⵢⵉⴳⴻⵔⴷⴰⵏ, ⵜⴰⵎⵙⴰⵍⵜ-ⴰ ⵓⵔ ⵜⵜ-ⵉⴷ-ⵢⴻⴱⴷⵉⵔ ⴰⵔⴰ ⵓⵙⴻⵏⴼⴰⵔ-ⴰ ⵏ ⵍⵇⴰⵏⵓⵏ, ⵎⴰⵛⴰ ⵎⴰⵙⵙ ⵍⵧⵓⵀ ⵢⴻⵏⵏⴰ-ⴷ ⴷⴰⴽⴽⴻⵏ ⵉⴱⴻⴷⴷⵉⵍⴻⵏ ⵉⵏⴻⴳⴳⵓⵔⴰ ⴰⵢ ⴷ-ⵢⴻⵍⵍⴰⵏ ⴷⴻⴳ ⵍⵇⴰⵏⵓⵏ ⵏ ⵓⵄⴰⵇⴻⴱ ⵙⵙⴻⴼⵔⴰⵢⴻⵏ ⴰⵙⵙⴻⵊⵀⴻⴷ ⵏ ⵓⵄⴰⵇⴻⴱ ⵏ ⵡⵉⴷ ⴰⵔⴰ ⵢⴻⵜⵜⴻⴽⴽⵉⵏ ⴷⴻⴳ ⵓⵅⴹⴰⴼ.

ⵉⵎⴰⵣⴰⵏⴻⵏ, ⴷⴻⴳ ⵡⴰⵙⵙ ⵡⵉⵙ ⵙⵉⵏ ⵏ ⵢⵉⵅⴻⴷⴷⵉⵎⴻⵏ-ⵏⵙⴻⵏ, ⵙⵙⴰⵡⵍⴻⵏ-ⴷ ⵍⴰⴷⵖⴰ ⵖⴻⴼ ⵡⴰⵣⴰⵍ ⴰⵢ ⵢⴻⵙⵄⴰ ⵓⵙⵙⴻⴱⴷⴻⴷ ⵏ ⵜⵜⴰⵡⵉⵍⴰⵜ ⴰⵢⵢⴻⵙ ⴰⵔⴰ ⵜⵜⵡⴰⵙⴼⴻⵄⵍⴻⵏ ⵢⵉⵃⴻⵣⵣⵉⴱⴻⵏ ⴰⵢ ⵢⴻⵜⵜⵡⴰⴷⴷⵎⴻⵏ. ⴷⵖⴰ, ⵉ ⵍⵎⴻⵏⴷ ⵏ ⵡⴰⵢⴰ, ⴳⵔⴻⵏ-ⴷ ⵜⴰⵎⴰⵡⵜ ⴷⴰⴽⴽⴻⵏ ⴷ ⵉⵃⴻⵣⵣⵉⴱⴻⵏ ⵏ ⵓⵄⴰⵇⴻⴱ ⴰⵢ ⵢⴻⴳⴳⵜⴻⵏ ⵓⴳⴰⵔ ⵏ ⵢⵉⵃⴻⵣⵣⵉⴱⴻⵏ ⵏ ⵓⵃⴻⵣⵣⴻⴱ ⵢⴻⵔⵏⴰ ⵡⵜⴻⵏ-ⴷ ⴷⴻⴳ ⵡⴰⵢⴰ, ⴰⵎ ⵡⴰⴽⴽⴻⵏ ⵓⵔ ⵜⴻⵏ-ⵢⴻⵄⵊⵉⴱ ⴰⵔⴰ ⴷⴰⵖ ⵉⵎⵉ ⵍⵇⴰⵏⵓⵏ-ⴰ ⴰⵎⴰⵢⵏⵓ ⵓⵔ ⴷ-ⵢⴻⴱⴷⵉⵔ ⴰⵔⴰ ⵜⴰⵎⵙⴰⵍⵜ ⵏ ⵓⵅⴹⴰⴼ ⵏ ⵢⵉⴳⴻⵔⴷⴰⵏ ⴷ ⵓⵖⴻⵍⵍⴻⵜ ⵏ ⵢⵉⴳⴻⵔⴷⴰⵏ ⴷⴻⴳ ⵜⵉⵎⵎⴻⵜⵔⵉⵜ.

ⴰⵙⴻⵏⴼⴰⵔ-ⴰ ⵏ ⵍⵇⴰⵏⵓⵏ ⵍⵍⴰⵏ ⴷⴻⴳ-ⵙ 150 ⵏ ⵢⵉⵎⴰⴳⵔⴰⴷⴻⵏ ⴰⵢ ⵢⴻⴱⴹⴰⵏ ⵖⴻⴼ 6 ⵏ ⵢⵉⵖⴼⴰⵡⴻⵏ ⴰⵢ ⵢⴻⵇⵇⵏⴻⵏ ⵖⴻⵔ ⵢⵉⵃⴻⵣⵣⵉⴱⴻⵏ ⵉⵎⵓⵜⴰ, ⴰⵃⵓⴷⴷⵓ ⵏ ⵢⵉⴳⴻⵔⴷⴰⵏ ⵢⴻⵍⵍⴰⵏ ⴷⴻⴳ ⵓⵎⵉⵀⵉ, ⴰⵃⵓⴷⴷⵓ ⵏ ⵢⵉⵍⴻⵎⵥⵉⵢⴻⵏ ⵉⵔⵏⴻⴳⴳⴰⵢⴻⵏ, ⵜⵜⴰⵡⵉⵍⴰⵜ ⵏ ⵓⵃⵓⴷⴷⵓ ⵏ ⵢⵉⴳⴻⵔⴷⴰⵏ ⴷⴻⴳ ⵡⴰⵎⵎⴰⵙⴻⵏ ⵢⴻⵎⵎⵓⵣⵣⴳⴻⵏ (ⵢⴻⵜⵅⴻⵚⵚⴻⵚⴻⵏ), ⵉⵃⴻⵣⵣⵉⴱⴻⵏ ⵏ ⵓⵄⴰⵇⴻⴱ ⴷ ⵢⵉⵃⴻⵣⵣⵉⴱⴻⵏ ⵓⵄⴹⵉⵍⴻⵏ ⴷ ⵢⵉⴳⴰⵔⴰⵏⴻⵏ.

ⵍⵇⴰⵏⵓⵏ-ⴰ ⵢⴻⵙⵙⴻⴼⵔⴰⵢ ⴷⴰⵖ ⴰⵙⵙⴻⴱⴷⴻⴷ ⵏ ⵜⵙⵓⴷⵓⵜ ⵜⴰⵖⴻⵍⵏⴰⵡⵜ ⵉ ⵓⵃⵓⴷⴷⵓ ⴷ ⵓⵙⵎⴰⵍ ⵏ ⵢⵉⴳⴻⵔⴷⴰⵏ, ⴷ ⵜⴰⵙⵓⴷⵓⵜ ⴰⵔⴰ ⵢⴻⵜⵜⵡⴰⵇⵇⵏⴻⵏ ⵖⴻⵔ ⵓⵖⵍⵉⴼ ⴰⵎⴻⵏⵣⵓ ⵢⴻⵔⵏⴰ ⴰⴷ ⵜⵜ-ⵢⴻⵙⵙⴻⵍⵡⵉ ⵢⵉⵎⵡⴻⴽⴽⴻⵍ ⴰⵖⴻⵍⵏⴰⵡ, ⴰⵎ, ⵡⴰⴽⴽⴻⵏ ⴰⵔⴰ ⵜⵉⵍⵉ ⵜⴻⴱⴷⴰⵎⵎⴰⵙⵜ ⴰⵔⴰ ⵢⵉⵍⵉⵏ ⴷ ⵜⴰⵎⵍⴻⵍⵍⵉⵜ ⵉ ⵓⴱⴷⴰⴷ ⵉ ⵢⵉⴳⴻⵔⴷⴰⵏ.

ⴰⵎⴰⴳⵔⴰⴷ ⵡⵉⵙ 48 ⵏ ⵓⵙⴻⵏⴼⴰⵔ-ⴰ ⵏ ⵍⵇⴰⵏⵓⵏ ⵢⴻⵜⵜⵉⵏⵉ-ⴷ ⴷⴰⴽⴽⴻⵏ ⴰⴳⵔⵓⴷ ⵏ ⴷⴷⴰⵡ ⵏ 13 ⵏ ⵢⵉⵙⴻⴳⴳⴰⵙⴻⵏ ⴰⵢⴷⴻⴳ ⵢⴻⵍⵍⴰ ⵛⵛⴻⴽ ⵏⴻⵖ ⵢⴻⵄⵔⴻⴹ ⴰⴷ ⵢⴻⴳ ⵜⴰⵊⵔⵉⵎⵜ, ⵢⴻⵣⵎⴻⵔ ⴰⴷ ⵢⴻⵜⵜⵡⴰⴹⴹⴻⴼ ⵖⴻⵔ ⵢⵉⵎⴻⵥⵍⴰ (ⵙⵙⵔⴰⴱⴻⵙ) ⵏ ⵜⵖⴻⵍⵍⵉⵙⵜ. ⵍⵇⴰⵏⵓⵏ-ⴰ ⵍⵍⴰⵏ ⴷⴻⴳ-ⵙ ⵜⵉⴱⵓⴷⴰ ⴷ ⵢⵉⵎⵎⴻⴽⵜⵉⵢⴻⵏ ⴰⵢ ⵢⴻⵇⵇⵏⴻⵏ ⵖⴻⵔ ⵢⵉⴳⴻⵔⴷⴰⵏ.