ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⴰⵎⵙⴻⵜⵍⴰ ⵜⴰⵖⴻⵍⵏⴰⵡⵜ: ⴰⵄⴰⵡⴻⵏ ⵏ ⵎⴻⴷⴷⴻⵏ ⴷ ⴰⵢⴻⵏ ⵢⴻⵙⵄⴰⵏ ⴰⵣⴰⵍ ⵉ ⵓⴹⵎⴰⵏ ⵏ ⵍⴰⵎⴰⵏ ⴷ ⵓⵔⴽⴰⴷ

ⵡⴻⵀⵕⴰⵏ – ⴰⵜⵜⴻⴽⴽⵉ ⵏ ⵓⵖⴻⵔⵎⴰⵏ (ⴰⵛⴻⵄⴱⵉ) ⴷⴻⴳ ⵓⵅⴻⴷⴷⵉⵎ ⵏ ⵢⵉⵎⴻⵥⵍⴰ (ⵙⵙⵔⴰⴱⴻⵙ) ⵏ ⵜⵖⴻⵍⵍⵉⵙⵜ ⴷ ⴰⵢⴻⵏ ⵢⴻⵙⵄⴰⵏ ⴰⵣⴰⵍ ⵉ ⵓⴹⵎⴰⵏ ⵏ ⵜⵖⴻⵍⵍⵉⵙⵜ ⴷ ⵓⵔⴽⴰⴷ ⴷⴻⴳ ⵜⵎⵓⵔⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵍⴻⵅⵎⵉⵙ ⵓⵎⴻⵏⵣⴰⴹ ⵏ ⵜⵙⴰⴳⵔⴰⵡⵜ ⵏ ⵡⴻⵀⵕⴰⵏ ⵏ ⵜⴻⵎⵙⴻⵜⵍⴰ ⵜⴰⵖⴻⵏⴰⵡⵜ, ⴰⴳⴻⵏⵙⴻⵙ-ⴰⴽⵏⴰⵏⴻⵔ ⴷⵊⵉⵍⴰⵍⵉ ⵜⴰⵀⵔⵉ.

ⴰⵄⴰⵡⴻⵏ ⵏ ⵎⴻⴷⴷⴻⵏ ⵖⴻⵔ ⵢⵉⴷⵉⵙ ⵏ ⵜⴻⵎⵙⴻⵜⵍⴰ ⵙ ⵡⵓⴹⴹⵓⵏ ⴰⵣⴻⴳⵣⴰⵡ 1055 ⵢⴻⵙⵙⴰⵡⴻⴹ ⵖⴻⵔ ⴼⴻⵔⵔⵓ ⵏ ⵡⴰⵟⴰⵙ ⵏ ⵜⴻⵎⵙⴰⵍ, ⵜⵓⴹⴹⴼⴰ ⵏ ⵡⵉⴷ ⴰⵢ ⵢⴻⵜⵜⴻⴽⴽⴰⵏ ⴷⴻⴳ-ⵙⴻⵏⵜ, ⵢⴻⵔⵏⴰ ⴰⵢⴰ ⵢⴻⵜⵜⴻⴽⴽⴰ ⴷⴻⴳ ⵓⵃⵓⴷⴷⵓ ⵏ ⵎⴻⴷⴷⴻⵏ ⴷ ⵡⴰⵢⵍⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵢⵉⵎⴹⴻⴱⴱⴻⵔ-ⴰ ⵉ ⵍⵎⴻⵏⴷ ⵏ ⵓⵔⵥⴰⵎ, ⴷⴻⴳ ⵍⴻⵇⵚⴻⵔ ⵏ ⵜⴻⵎⵣⵉⴽⴽⵏⵉⵏ (ⴷⴻⴳ ⵎⴷⵉⵏⴰ ⵊⴷⵉⴷⴰ, ⵡⴻⵀⵕⴰⵏ) ⵏ ⵡⵓⵙⵙⴰⵏ ⵏ « ⵜⴻⵡⵡⵓⵔⴰ ⵉⵔⴻⵥⵎⴻⵏ ⵏ ⵜⴻⵎⵙⴻⵜⵍⴰ ⵜⴰⵖⴻⵍⵏⴰⵡⵜ ».

ⴰⵔⵥⴰⵎ ⵏ ⵜⴻⴷⵢⴰⵏⵜ-ⴰ ⵏ ⵓⵙⵙⴻⵍⵖⵓ ⴰⵢⴷⴻⴳ ⵃⴻⴷⵕⴻⵏ ⵢⵉⴷⵓⴱⴰ ⵉⴷⵓⴳⴰⵏⴻⵏ ⵉⵖⴰⵔⵉⵎⴻⵏ ⴷ ⵢⵉⵙⴻⵔⴷⴰⵙⵉⵢⴻⵏ, ⵜⴻⵍⵍⴰ-ⴷ ⴷⴻⴳ-ⵙ ⵜⵓⴽⵛⵉ ⵏ ⵢⵉⴽⴻⵔⵙⵉⵢⴻⵏ ⵏ ⵢⵉⵎⴻⵄⴷⴰⵕ ⵢⴻⵜⵜⴻⴷⴷⵓⵏ ⵙ ⵜⵔⵉⵙⵉⵜⵉ ⵉ ⵢⵉⴳⴻⵔⴷⴰⵏ ⵉⵎⴻⵄⴷⴰⵕ ⵢⴻⵍⵍⴰⵏ ⴷ ⴰⵔⵔⴰⵡ ⵏ ⵡⵉⴷ ⵉⵅⴻⴷⴷⵎⴻⵏ ⴷⴻⴳ ⵜⴻⵎⵙⴻⵜⵍⴰ ⵜⴰⵖⴻⵍⵏⴰⵡⵜ ⴷ ⵜⴼⴻⴽⴽⵉⵡⵉⵏ ⵏⵉⴹⴻⵏ ⵏ ⵜⵖⴻⵍⵍⵉⵙⵜ.

ⵜⴻⵇⵇⴻⵍ ⴷⴰⵖ ⵜⴻⵊⵎⵉⵍⵜ ⵉ ⴽⵔⴰ ⵏ ⵢⵉⵎⴰⵙⵜⴰⵖⴻⵏ (ⵡⵉⴷ ⵢⴻⵡⵡⵉⵏ ⵍⴰⵏⵜⵔⵉⵜ) ⵏ ⵜⴻⵎⵙⴻⵜⵍⴰ ⵜⴰⵖⴻⵍⵏⴰⵡⵜ ⴷⴻⴳ ⵜⴻⴷⵢⴰⵏⵜ-ⴰ.

ⵡⵉⴷ ⵉⵃⴻⴷⵕⴻⵏ ⴷⵉⵏ ⵔⵣⴰⵏ, ⴷⴰⵖ, ⵖⴻⴼ ⵢⵉⵡⴻⵜ ⵏ ⵜⴻⵎⵣⵉⴽⴽⴻⵏⵜ ⴰⵢ ⴷ-ⵢⴻⵙⵙⴽⴰⵏⴰⵢⴻⵏ ⵍⴻⵛⵖⴰⵍ ⵢⴻⵎⴳⴻⵔⵔⴰⴷⴻⵏ ⵏ ⵜⴻⴳⵔⴰⵡⵉⵏ ⵏ ⵜⴻⵎⵙⴻⵜⵍⴰ, ⴳⴰⵔ-ⴰⵙⴻⵏⵜ ⵜⵉⴷ ⵏ ⵓⵃⵓⴷⴷⵓ ⵏ ⵢⵉⴳⴻⵔⴷⴰⵏ, ⴰⵃⵓⴷⴷⵓ ⵏ ⵜⵡⴻⵏⵏⴰⴹⵜ ⴷ ⵢⵉⵎⴻⵏⵖⵉ ⵎⴳⴰⵍ ⵓⵙⵙⴻⴼⵙⴻⴷ ⵏ ⵡⴰⵢⵍⴰ.

ⵏⵏⵉⴳ ⵡⴰⵢⴰ, ⵉⴼⴻⵔⴷⵉⵙⴻⵏ ⵏ ⵜⴻⵎⵙⴻⵜⵍⴰ ⴳⴰⵏ ⵜⵉⵙⵙⴽⴰⵏⵉⵏ ⴰⴽⴽⴻⵏ ⴰⴷ ⴷ-ⵙⵙⴻⴽⵏⴻⵏ ⵜⵉⵎⵓⵙⵙⵏⵉⵡⵉⵏ-ⵏⵙⴻⵏ ⴷⴻⴳ ⵢⵉⵎⴻⵏⵖⵉ ⵏ ⵓⵃⵓⴷⴷⵓ ⵏ ⵢⵉⵎⴰⵏ, ⴰⵙⵙⴻⵇⴷⴻⵛ ⵏ ⵍⴻⵙⵍⴰⵃ ⴷ ⵓⵃⵓⴷⴷⵓ ⵏ ⵡⵉⴷ ⵢⴻⵜⵜⵡⴰⵙⵙⵏⴻⵏ.

ⵜⵉⵡⵡⵓⵔⴰ-ⴰ ⵉⵔⴻⵥⵎⴻⵏ ⴰⴷ ⴷⴹⴼⴻⵏⵜ 3 ⵏ ⵡⵓⵙⵙⴰⵏ ⵢⴻⵔⵏⴰ ⵉⵙⵡⵉ-ⵏⵙⴻⵏⵜ, ⵖⴻⴼ ⵍⴻⵃⵙⴰⴱ ⵏ ⵡⵉⴷ ⴰⵢ ⵜⴻⵏⵜ-ⵢⴻⵙⵙⵓⴷⴷⵙⴻⵏ, ⴷ ⴰⵇⴻⴷⴷⴻⵎ ⵉ ⵎⴻⴷⴷⴻⵏ ⵏ ⴷⴷⵓⵕ ⴷ ⵍⴻⵛⵖⴰⵍ ⵏ ⵜⴻⵎⵙⴻⵜⵍⴰ ⴰⵢ ⵢⴻⵜⵜⵡⴰⵡⴻⴽⴽⵍⴻⵏ ⴰⴽⴽⴻⵏ ⴰⴷ ⵜⴻⵙⵙⴻⴼⵄⴻⵍ ⵍⵇⴰⵏⵓⵏ ⵏ ⵜⴻⴳⴷⵓⴷⴰ ⵢⴻⵔⵏⴰ ⴰⴷ ⵜⵃⵓⴷⴷ ⵉⵎⴷⴰⵏⴻⵏ ⴷ ⵡⴰⵢⵍⴰ.

ⵜⵉⵎⵣⵉⴽⴽⴻⵏⵜ-ⴰ ⵜⴻⵎⵎⴰⵍ-ⴷ ⴷⴰⵖ ⵉⵎⴻⴷⴷⴻⵏ ⵛⵛⵓⵔⵓⴹ ⵏ ⵓⵏⴻⴽⵛⵓⵎ ⵖⴻⵔ ⵢⵉⵖⵙⵓⵔⴻⵏ ⵏ ⵓⵙⵙⵉⵍⴻⵖ ⵏ ⵜⴻⵎⵙⴻⵜⵍⴰ ⵜⴰⵖⴻⵍⵏⴰⵡⵜ, ⵜⵉⵎⴻⵣⵣⵓⴳⵉⵏ ⴷ ⵢⵉⵙⵙⵉⵍⵖⴻⵏ ⴰⵢ ⴷ-ⵢⴻⵜⵜⵉⵍⵉⵏ ⵉ ⵍⴼⴰⵢⴷⴰ ⵏ ⵢⵉⴼⴻⵙⵢⴰⵏⴻⵏ, ⵉⴷⵓⴼⴻⵙⵢⴰⵏⴻⵏ ⴷ ⵡⵉⴷ ⵢⴻⴳⵕⴰⴷⵉⵏ, ⴰⵎ ⵡⴰⴽⴽⴻⵏ ⴰⵢ ⴷ-ⵙⵙⴻⵔⵙⴻⵏ ⴷⴰⵖ ⵜⵜⴰⵡⵉⵍⴰⵜ ⵢⴻⵎⴳⴻⵔⵔⴰⴷⴻⵏ ⴰⵢ ⵜⴻⵙⵙⴻⵇⴷⴰⵛ ⵜⴼⴻⴽⴽⴰ-ⴰ ⴰⴽⴽⴻⵏ ⴰⴷ ⵜⴻⴹⵎⴻⵏ ⵜⴰⵖⴻⵍⵍⵉⵙⵜ.

ⵍⴻⵃⵙⴰⴱⴰⵜ ⵏ ⵜⴻⵏⵣⴰⴹⵜ ⵏ ⵡⴻⵀⵕⴰⵏ ⵏ ⵜⴻⵎⵙⴻⵜⵍⴰ ⵜⴰⵖⴻⵍⵏⴰⵡⵜ ⵢⴻⵇⵇⵏⴻⵏ ⵖⴻⵔ ⵍⴻⵛⵖⴰⵍ ⵏ ⵜⵉⴳⴳⵜⵉⵏ ⵢⴻⵎⴳⴻⵔⵔⴰⴷⴻⵏ ⵙⵙⴽⴰⵏⴰⵢⴻⵏ-ⴷ ⴷⴰⴽⴽⴻⵏ ⴷⴻⴳ ⵜⴻⵣⵡⴰⵔⴰ ⵏ ⵓⵙⴻⴳⴳⴰⵙ-ⴰ, ⵍⵍⴰⵏⵜ-ⴷ 67 ⵏ ⵜⴻⵎⵙⴰⵍ ⵢⴻⵔⵣⴰⵏ ⵜⴰⵊⵔⵉⵎⵜ ⵢⵓⴷⴷⵙⴻⵏ, ⴰⵙⵙⴻⵜⵜⵉ ⵏ ⵜⴻⵀⵢⵓⴼⵉⵏ (49 ⵙⴻⴳ-ⵙⴻⵏⵜ ⵙⵙⴰⵡⴹⴻⵏⵜ ⵖⴻⵔ ⵜⵓⴹⴹⴼⴰ ⵏ 94 ⵏ ⵢⵉⵎⴷⴰⵏⴻⵏ), ⴰⵎ ⵡⴰⴽⴽⴻⵏ ⴰⵢ ⵜⵜⵡⴰⴹⴹⴼⴻⵏ 11,37 ⵏ ⵢⵉⵇⴻⵏⵟⴰⵔⴻⵏ ⵏ ⵍⴽⵉⴼ, 6,4 ⵏ ⵢⵉⴳⵕⴰⵎⴻⵏ ⵏ ⵜⴽⵓⴽⴰⵢⵉⵏⵜ ⴷ 613 ⵏ ⵜⵄⴻⵇⵇⴰⵛⵉⵏ ⵏ ⵍⴻⵄⵇⴻⵍ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵉⵎⴻⵏⵖⵉ ⵎⴳⴰⵍ ⵢⵉⵏⵉⴳ ⵢⴻⴼⴼⵖⴻⵏ ⵉ ⵍⵇⴰⵏⵓⵏ, ⵍⵍⴰⵏⵜ-ⴷ 310 ⵏ ⵜⴻⵎⵙⴰⵍ ⵏ ⵢⵉⵏⵉⴳ ⵙⴻⴳ ⵍⴱⴻⵔⵔ ⴷ ⵜⵓⴹⴹⴼⴰ ⵏ 60 ⵏ ⵢⵉⵎⴷⴰⵏⴻⵏ ⴳⴰⵔ-ⴰⵙⴻⵏ 4 ⴰⵢ ⵢⴻⵜⵜⵡⴰⵥⵥⵄⴻⵏ ⴱⴻⵕⵕⴰ ⵉ ⵜⵎⵓⵔⵜ ⴷⴻⴳ ⵓⵙⴻⴳⴳⴰⵙ-ⴰ, ⵎⴰ ⴷ ⵢⵉⵡⴻⵜ ⵏ ⵜⴻⵎⵙⴰⵍⵜ ⵜⴻⵙⵙⴰⵡⴻⴹ ⵖⴻⵔ ⵜⵓⴹⴹⴼⴰ ⵏ 23 ⵏ ⵢⵉⵎⴷⴰⵏⴻⵏ ⴷⴻⴳ ⵜⵍⴻⵎⵎⴰⵙⵜ ⵏ ⵢⵉⵍⴻⵍ.

ⵙⴻⴳ ⵢⵉⴷⵉⵙ ⵏⵉⴹⴻⵏ, 240 ⵏ ⵜⴻⵔⵎⴻⴳⴳⵉⵢⵉⵏ ⴷ ⵜⴻⵊⵔⵉⵎⵉⵏ ⵎⴳⴰⵍ ⵢⵉⵎⴷⴰⵏⴻⵏ, ⴷ 362 ⵎⴳⴰⵍ ⵡⴰⵢⵍⴰ ⴰⵢ ⴷ-ⵢⴻⵜⵜⵡⴰⵃⴻⵙⴱⴻⵏ, ⵢⴻⵔⵏⴰ ⵍⵍⴰⵏⵜ-ⴷ 43 ⵏ ⵜⴻⵎⵙⴰⵍ ⵏ ⵜⵓⴽⴻⵔⴹⴰ ⵏ ⵜⴽⴻⵕⵕⵓⵙⵉⵏ ⴰⵢ ⵢⴻⴼⵔⴰⵏ ⵢⴻⵔⵏⴰ ⵙⵙⴰⵡⴹⴻⵏⵜ ⵖⴻⵔ ⵜⵓⴹⴹⴼⴰ ⵏ 12 ⵏ ⵢⵉⵎⴷⴰⵏⴻⵏ ⴷ ⵜⵉⴼⵉⵏ ⵏ 13 ⵏ ⵜⴽⴻⵕⵕⵓⵙⵉⵏ ⴰⵢ ⵢⴻⵜⵜⵡⴰⴽⵔⴻⵏ.