ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵙⴻⵍⵍⴰⵍ ⵉⴳⴻⵔ-ⴷ ⵜⵉⵖⵔⵉ ⵉ ⵜⴻⵕⵎⵉⵙⵉⵏ ⵜⵉⵖⴻⵍⵏⴰⵡⵉⵏ ⴰⴽⴽⴻⵏ ⴰⴷ ⴽⴻⵛⵎⴻⵏⵜ ⵍⴻⵙⵡⴰⵇ ⵉⴳⵔⴰⵖⵍⴰⵏⴻⵏ

ⵍⴻⵣⵣⴰⵢⴻⵔ – ⴰⵏⴻⵖⵍⴰⴼ ⴰⵎⴻⵏⵣⵓ, ⴰⴱⴷⴻⵍⵎⴰⵍⴻⴽ ⵙⴻⵍⵍⴰⵍ, ⵉⴳⴻⵔ-ⴷ ⵜⵉⵖⵔⵉ ⴰⵙⵙ ⵏ ⵜⵜⵍⴰⵜⴰ ⴷⴻⴳ ⵍⴷⵣⴰⵢⴻⵔ ⵉ ⵜⴽⴻⴱⴱⴰⵏⵉⵢⵉⵏ ⵜⵉⴷⵣⴰⵢⵔⵉⵢⵉⵏ ⵜⵉⵏⴰⴳⴷⵓⴷⵉⵏ ⴷ ⵜⵓⵙⵍⵉⴳⵉⵏ ⴰⴽⴽⴻⵏ ⴰⴷ ⴽⴻⵛⵎⴻⵏⵜ ⵍⴻⵙⵡⴰⵇ ⵉⴳⵔⴰⵖⵍⴰⵏⴻⵏ, ⴰⵎ ⵡⴰⴽⴽⴻⵏ ⴰⵔⴰ ⵜⵜⴻⴽⴽⵉⵏⵜ ⵙ ⵜⵉⴷⴻⵜ ⴷⴻⴳ ⵓⵙⵙⴻⵕⵡⵓ ⵏ ⵙⵙⵓⵇ ⴰⵖⴻⵍⵏⴰⵡ.

« ⵢⴻⵙⵙⴻⴼⴽ ⴰⴷ ⵜⴽⴻⵛⵎⴻⵎ ⵍⴻⵙⵡⴰⵇ ⵉⵎⴰⵢⵏⵓⵜⴻⵏ ⴷⴻⴳ ⵜⵎⵓⵔⴰ ⵏ ⵓⵣⵖⴰⵔ ⴰⵛⴽⵓ ⴰⵢⴰ ⴰⴷ ⵢⴻⵜⵜⴻⴽⴽⵉ ⴷⴻⴳ ⵓⵙⵏⴻⵔⵏⵉ ⵏ ⵜⴻⵣⵎⴻⵔⵜ-ⵏⵡⴻⵏ ⴷⴻⴳ ⵓⵎⵙⵉⵣⵡⴻⵔ ⵢⴻⵔⵏⴰ ⴰⴷ ⵢⴻⵙⵙⴻⵍⵀⵓ ⵜⴰⵖⴰⵔⴰ ⵏ ⵢⵉⴼⴰⵔⵉⵙⴻⵏ-ⵏⵡⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵙⴻⵍⵍⴰⵍ ⵎⵉ ⵢⴻⵙⵙⴰⵡⴻⵍ ⴷ ⵢⵉⴳⴻⵏⵙⴰⵙⴻⵏ ⵏ ⵜⴽⴻⴱⴱⴰⵏⵉⵢⵉⵏ ⵜⵉⵖⴻⵍⵏⴰⵡⵉⵏ ⴰⵢ ⵢⴻⵜⵜⴻⴽⴽⴰⵏ ⴷⴻⴳ ⵜⴻⵥⵔⵉⴳⵜ ⵜⵉⵙ 48 ⵏ ⵜⴻⵎⵣⵉⴽⴽⴻⵏⵜ ⵜⴰⴳⵔⴰⵖⵍⴰⵏⵜ ⵏ ⵍⴷⵣⴰⵢⴻⵔ ⵜⴰⵎⴰⵏⴻⵖⵜ (ⴼⵉⴰ).

ⵎⵉ ⵢⴻⵔⵣⴰ ⵖⴻⴼ ⵜⵏⴻⴼⵙⴰⵔⵉⵜ ⵏ ⵢⵉⵏⴻⵎⵣⵉⴽⴽⵏⴻⵏ ⵉⴷⵣⴰⵢⵔⵉⵢⴻⵏ, ⴰⵏⴻⵖⵍⴰⴼ ⴰⵎⴻⵏⵣⵓ ⵉⴳⴻⵔ-ⴰⵙⴻⵏ-ⴷ ⵜⵉⵖⵔⵉ ⴰⴽⴽⴻⵏ « ⴰⴷ ⵙⵄⴻⵊⵍⴻⵏ ⴰⴼⴰⵔⴻⵙ ⴰⴽⴽⴻⵏ ⴰⴷ ⵣⴻⵎⵔⴻⵏ ⴰⴷ ⵙⵙⴻⵕⵡⵓⵏ ⴰⵙⵙⵓⵜⴻⵔ ⴰⵖⴻⵍⵏⴰⵡ ⵢⴻⵔⵏⴰ ⴰⴷ ⴽⴻⵛⵎⴻⵏ ⵍⴻⵙⵡⴰⵇ ⵉⴱⴻⵕⵕⴰⵏⵉⵢⴻⵏ ».

ⵜⵉⵕⵎⵉⵙⵉⵏ ⵜⵉⵖⴻⵍⵏⴰⵡⵉⵏ ⵢⴻⵙⵙⴻⴼⴽ ⴷⴰⵖ « ⴰⴷ ⵙⵙⵓⴳⴳⵜⴻⵏⵜ ⵉⵛⵔⵉⴽⴻⵏ ⵉⴳⵔⴰⵖⵍⴰⵏⴻⵏ ⴰⴽⴽⴻⵏ ⴰⴷ ⴷ-ⴼⴰⵔⵙⴻⵏⵜ ⵓⴳⴰⵔ, ⵅⵉⵔ ⵢⴻⵔⵏⴰ ⵙ ⵜⵖⴰⵡⵍⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵃⴻⵜⵜⴻⵜ.

ⴷⴻⴳ ⵜⵏⴻⴼⵙⴰⵔⵜ ⵏ ⵜⴽⴻⴱⴱⴰⵏⵉⵜ ⵜⴰⵖⴻⵍⵏⴰⵡⵜ ⵏ ⵢⵉⵎⵙⴻⴷⴷⴰⵢⴻⵏ ⵉⵎⴳⵓⵔⴰⵏⴻⵏ (ⵙⵏⵠⵉ), ⵎⴰⵙⵙ ⵙⴻⵍⵍⴰⵍ ⵢⴻⵏⵏⴰ-ⴷ ⴷⴰⴽⴽⴻⵏ « ⵓⵔ ⵏⴻⵣⵎⵉⵔ ⴰⵔⴰ ⴰⴷ ⵏⴻⵙⵃⵓⵍⴼⵓ ⵉⴷⵣⴰⵢⵔⵉⵢⴻⵏ ⴰⴷ ⵙⵙⵓⴷⵔⴻⵏ ⴰⴼⴰⵔⵉⵙ ⴰⵖⴻⵍⵏⴰⵡ ⵢⵉⵍⵉ ⴰⵏⵢⴰ ⵏ ⵓⴼⴰⵔⴻⵙ (ⴰⵖⴻⵍⵏⴰⵡ) ⴷ ⴰⵎⴰⵥⴰⵢ », ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴰⴽⴽⴻⵏ « ⵉⴷⵣⴰⵢⵔⵉⵢⴻⵏ ⵍⴰ ⴷ-ⵙⵙⵓⵜⵓⵔⴻⵏ ⵉⴼⴰⵔⵉⵙⴻⵏ ⵏ ⵜⵖⴰⵔⴰ ⵢⴻⵔⵏⴰ ⴷ ⵜⵉⴽⴻⴱⴱⴰⵏⵉⵢⵉⵏ ⵜⵉⵖⴻⵍⵏⴰⵡⴻⵏ ⴰⵢ ⵢⴻⵙⵙⴻⴼⴽⴻⵏ ⴰⴷ ⴳⴻⵏⵜ ⵍⵡⴰⵊⴻⴱ-ⵏⵙⴻⵏⵜ ⴷⴻⴳ ⵡⴰⵢⴰ ».

ⴰⵏⴻⵖⵍⴰⴼ ⴰⵎⴻⵏⵣⵓ ⵉⴳⴻⵔ-ⴷ, ⵙⴻⴳ ⵢⵉⴷⵉⵙ ⵏⵉⴹⴻⵏ, ⵜⵉⵖⵔⵉ ⵉ ⵜⴽⴻⴱⴱⴰⵏⵉⵜ ⵜⴰⵖⴻⵍⵏⴰⵡⵜ ⵏ ⵢⵉⵙⴰⴼⴰⵔⴻⵏ ⵙⴰⵉⴷⴰⵍ ⴰⴽⴽⴻⵏ ⴰⴷ ⵜⴻⵙⵙⴻⵎⵖⴻⵔ ⴰⵎⵓⵔ-ⵏⵏⴻⵙ ⴷⴻⴳ ⵙⵙⵓⵇ ⴰⵖⴻⵍⵏⴰⵡ ⴰⵢⴷⴻⴳ ⵜⴻⴹⴹⴻⴼ, ⵉⵎⵉⵔ-ⴰ, 20%, ⵢⴻⵔⵏⴰ ⵢⴻⵙⵙⵓⵜⴻⵔ-ⴰⵙ ⴰⴷ ⵜⴰⵡⴻⴹ ⵖⴻⵔ 50% ⴰⴽⴽⴻⵏ ⴰⴷ ⵜⴻⵣⵎⴻⵔ ⴰⴷ ⵜⴻⵙⵙⴻⵕⵡⵓ ⵙⵙⵓⵇ ⴰⵖⴻⵍⵏⴰⵡ ⵏ ⵓⵙⴰⴼⴰⵔ.

« ⵓⵔ ⵜⴻⵜⵜⵄⴻⴹⴹⵉⵍ ⴰⵔⴰ ⵙⴰⵉⴷⴰⵍ ⴰⴷ ⵜⴻⵙⵄⵓ ⵙⵏⴰⵜ ⵏ ⵍⵍⵓⵣⵉⵏⴰⵜ ⵜⵉⵎⴰⵢⵏⵓⵜⵉⵏ ⵢⴻⵔⵏⴰ ⴰⵢⴰ ⴷ ⵜⴰⵖⴰⵡⵙⴰ ⵢⴻⵍⵀⴰⵏ, ⴷ ⴰⵛⵓ ⴽⴰⵏ, ⴰⵢⴰ ⵓⵔ ⴷ-ⵢⴻⵜⵜⵇⴰⵎ ⴰⵔⴰ ⵉⵎⵉ ⴰⵙⵙⵓⵜⴻⵔ ⴰⵖⴻⵍⵏⴰⵡ ⵏ ⵢⵉⵙⴰⴼⴰⵔⴻⵏ ⴷ ⵢⵉⴼⴰⵔⵉⵙⴻⵏ ⵏ ⵓⴷⴰⵡⵉ ⵎⴰⵣⴰⵍ-ⵉⵜ ⵢⴻⵊⵀⴻⴷ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⵉ ⵢⴻⵙⵙⴰⵡⴻⵍ ⴷ ⵢⵉⵎⴹⴻⴱⴱⴻⵔ ⵏ ⵜⵏⴻⴼⵙⴰⵔⵜ ⵏ ⵜⴽⴻⴱⴱⴰⵏⵉⵜ-ⴰ.

ⵎⴰⵙⵙ ⵙⴻⵍⵍⴰⵍ ⵉⴳⴰ ⴷⴰⵖ ⵉⴼⴰⴷⴷⴻⵏ ⵉ ⵢⵉⵎⴹⴻⴱⴱⵔⴻⵏ ⵏ ⵙⴰⵉⴷⴰⵍ ⴰⴽⴽⴻⵏ ⴰⴷ ⴳⴻⵏ ⵓⴳⴰⵔ ⵏ ⵍⵎⴻⵊⵀⵓⴷ ⴷⴻⴳ ⵓⵅⴷⴰⵎ ⵏ ⵢⵉⵙⴰⴼⴰⵔⴻⵏ ⵏ ⵓⴷⴰⵡⵉ ⵏ ⵓⴽⴻⵏⵙⵉⵔ ⵢⴻⵔⵏⴰ ⴰⴷ ⴷ-ⵏⴰⴷⵉⵏ ⵉⵛⵔⵉⴽⴻⵏ ⵉⴱⴻⵕⵕⴰⵏⵉⵢⴻⵏ ⵉⵎⴰⵢⵏⵓⵜⴻⵏ.

« ⵢⴻⵙⵙⴻⴼⴽ ⴰⴷ ⴷ-ⵏⴻⵖⵔⴻⵎ ⴰⵢⴻⵏ ⵏⴻⵜⵜⵚⴻⵔⵔⵉⴼ, ⴰⵎⴻⵚⵔⵓⴼ-ⴰ ⴷ ⵍⴼⴰⵢⴷⴰ ⵏ ⵡⴰⵢⴻⵏ ⴰⵢ ⵏⴻⵙⵙⴰⵊⵊⴰⵡ ⴷ ⵉⵙⴻⵔⵖⴰ, ⵢⴻⵔⵏⴰ ⵢⴻⵙⵙⴻⴼⴽ ⴰⴷ ⵏⴻⵙⵏⴻⵔⵉ ⵢⴻⵙ-ⵙ ⴰⵙⵙⵉⵊⵊⴻⵡ ⵏ ⵙⵙⴻⵍⵄⴰ ⵜⴰⵖⴻⵍⵏⴰⵡⵜ ⵏ ⵜⴽⴻⴱⴱⴰⵏⵉⵢⵉⵏ ⵜⵉⵖⴻⵍⵏⴰⵡⵉⵏ ⴷ ⵜⵏⴰⴳⴷⵓⴷⵉⵏ ⴷⴻⴳ ⵢⵉⵃⵔⵉⵛⴻⵏ ⵢⴻⵎⴳⴻⵔⵔⴰⴷⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⴰⵏⴻⵖⵍⴰⴼ ⴰⵎⴻⵣⵡⴰⵔⵓ ⵉⴳⴻⵔ-ⴷ ⵜⵉⵖⵔⵉ, ⵙⴻⴳ ⵢⵉⴷⵉⵙ ⵏⵉⴹⴻⵏ, ⵉ ⵜⴽⴻⴱⴱⴰⵏⵉⵢⵉⵏ ⵜⵉⴱⴻⵕⵕⴰⵏⵉⵢⵉⵏ ⴰⴽⴽⴻⵏ ⴰⴷ ⴷ-ⴳⴻⵏⵜ ⵜⵉⴽⴻⴱⴱⴰⵏⵉⵢⵉⵏ ⵜⵓⵛⵔⵉⴽⵉⵏ ⴷ ⵜⴽⴻⴱⴱⴰⵏⵉⵢⵉⵏ ⵜⵉⴷⵣⴰⵢⵔⵉⵢⵉⵏ ⴰⴽⴽⴻⵏ ⴰⴷ ⴷ-ⴳⴻⵏⵜ ⴷⴻⴳ ⵍⴷⵣⴰⵢⴻⵔ ⵉⵙⴻⵏⴼⴰⵔⴻⵏ ⴰⵔⴰ ⴷ-ⵢⴰⵡⵉⵏ ⵍⴼⴰⵢⴷⴰ.

ⴷⵖⴰ, ⴷⴻⴳ ⵜⴻⴳⵏⵉⵜ-ⴰ, ⵉⵃⴻⵜⵜⴻⵜ-ⴷ ⴷⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵜⴻⵜⵜⵓⵏⴻⴼⴽ ⵜⵓⵣⵡⵉⵔⵜ ⵉ ⵓⴼⴰⵔⴻⵙ ⴷⴻⴳ ⵍⴷⵣⴰⵢⴻⵔ ⵢⴻⵔⵏⴰ ⴰⴷ ⵢⴻⵏⵇⴻⵙ ⵡⴰⵊⵊⴰⵡ ⵏ ⵙⵙⴻⵍⵄⴰ ⵉⵡⴻⵊⴷⴻⵏ ⵙⴻⴳ ⵜⵎⵓⵔⴰ ⵏ ⵓⵣⵖⴰⵔ.

« ⴰⵇⵍ-ⴰⵖ ⵖⴻⵔ ⵢⵉⴷⵉⵙ ⵏ ⵢⵉⵙⴻⵏⴼⴰⵔⴻⵏ ⵉⵙⵓⴷⴷⵙⴰⵏⴻⵏ ⴰⵔⴰ ⴷ-ⵉⵅⴻⵍⵇⴻⵏ ⴰⵅⴻⴷⴷⵉⵎ ⴷ ⵍⴼⴰⵢⴷⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵉⵄⴻⵢⵢⴻⵏ ⴷⴰⴽⴽⴻⵏ ⵓⵔ ⵢⴻⵙⵙⴻⴼⴽ ⴰⵔⴰ ⴰⴷ ⵢⴻⴳⴳⴻⵜ ⵓⵙⵙⵉⵊⴻⵡ ⵢⴻⵔⵏⴰ ⵙⵙⴻⵍⵄⴰ ⵢⴻⵙⵙⴻⴼⴽ ⴰⴷ ⴷ-ⵜⴻⵜⵜⵡⴰⵅⴷⴻⵎ ⵙ ⵓⵇⴰⴷⴻⵔ ⵏ ⵢⵉⵍⵓⴳⴰⵏ ⵉⴳⵔⴰⵖⵍⴰⵏⴻⵏ.

« ⵢⴻⵙⵙⴻⴼⴽ ⴰⴷ ⴷ-ⵏⴻⵅⴷⴻⵎ ⵙⵙⴻⵍⵄⴰ ⵙ ⵓⵇⴰⴷⴻⵔ ⵏ ⵢⵉⵍⵓⴳⴰⵏ ⵉⴳⵔⴰⵖⵍⴰⵏⴻⵏ ⵢⴻⵔⵏⴰ ⵙ ⵓⵇⴰⴷⴻⵔ ⵏ ⵢⵉⵣⵎⴰⵎⴻⵏ ⵏ ⵛⵛⵓⵔⵓⴹ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ ⴰⵎⴻⵏⵣⵓ, ⴰⵢ ⴷ-ⵢⴻⴷⴷⵓⴽⴽⵍⴻⵏ ⵖⴻⵔ ⵜⴻⵣⵉⴽⴽⴻⵏⵜ-ⴰ ⴷ ⵡⴰⵟⴰⵙ ⵙⴻⴳ ⵢⵉⵏⴻⵖⵍⴰⴼⴻⵏ ⵏ ⵓⵏⴰⴱⴰⴹ ⴷ ⵢⵉⴳⴻⵏⵙⴰⵙⴻⵏ ⵉⴷⵉⵒⵍⵓⵎⴰⵜⵉⵢⴻⵏ ⵏ ⵜⵎⵓⵔⴰ ⵏⵉⴹⴻⵏ ⴰⵢ ⵉⵅⴻⴷⴷⵎⴻⵏ ⴷⴻⴳ ⵍⴷⵣⴰⵢⴻⵔ.