ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵀⵉⵍ ⵏ ⵜⵓⵛⵛⵉⵜ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵢⴻⵙⵙⴰⵡⴻⴹ ⵍⴻⵎⵄⴰⵡⵏⴰ ⵏ ⵜⴳⴻⵍⴷⴰ ⵜⴰⵙⴰⵄⵓⴷⵉⵜ ⵉ ⵢⵉⵚⴻⵃⵔⴰⵡⵉⵢⴻⵏ
ⵍⴻⵣⵣⴰⵢⴻⵔ – ⴰⵀⵉⵍ ⵏ ⵜⵓⵛⵛⵉⵜ ⴰⵎⴰⴹⵍⴰⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵢⴻⵏⵏⴰ-ⴷ ⴰⵙⵙ ⵏ ⵜⵜⵍⴰⵜⴰ ⴷⴰⴽⴽⴻⵏ ⵢⴻⵙⵙⴰⵡⴻⴹ ⵜⵜⴻⵄⴱⴻⵢⵢⴰ ⵏ ⵜⵓⵛⵛⵉⵜ ⴰⵢⴷⴻⴳ ⵍⵍⴰⵏ 252 ⵏ ⵢⵉⵟⵓⵏⴻⵏ ⵏ ⵜⵉⵏⵉ (ⵜⵜⵎⴻⵕ) ⵉ ⵢⵉⵣⵔⵓⵣⴰⵖ ⵉⵚⴻⵃⵔⴰⵡⵉⵢⴻⵏ ⵏ ⵜⵉⵏⴷⵓⴼ ⴷⴻⴳ ⵍⴷⵣⴰⵢⴻⵔ, ⵢⴻⵔⵏⴰ ⴰⵢⴰ ⴷ ⴰⵃⵔⵉⵛ ⵙⴻⴳ ⵡⴰⵢⴻⵏ ⴰⵢ ⴷ-ⵜⴻⵜⵜⵚⴻⴷⴷⵉⵇ ⵜⴳⴻⵍⴷⴰ ⵜⴰⵙⴰⵄⵓⴷⵉⵜ ⵢⴰⵍ ⴰⵙⴻⴳⴳⴰⵙ ⵉ ⵢⵉⵎⴷⴰⵏⴻⵏ-ⴰ.
ⵜⵜⴻⵄⴱⴻⵢⵢⴰ-ⴰ ⵜⵄⴻⴷⴷⴰ ⵖⴻⴼ ⵜⴻⴷⵡⴰⵏⵜ ⵏ ⵓⵙⴰⴳⴻⵏ (ⵍⵎⴻⵔⵚⴰ) ⵏ ⵡⴻⵀⵕⴰⵏ ⴷⴻⴳ ⵓⴽⴰⵜⴰⵔ ⵏ ⵍⴻⵎⵄⴰⵡⵏⴰ ⵜⴰⵍⵙⴰⵏⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵡⴰⵀⵉⵍ ⴰⵎⴰⴹⵍⴰⵏ ⵏ ⵜⵓⵛⵛⵉⵜ ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴷⵣⴰⵢⴻⵔ.
ⴷ ⵜⵉⴽⴽⴻⵍⵜ ⵜⵉⵙ ⵙⴻⵎⵎⵓⵙⴻⵜ (ⵅⴻⵎⵙⴰ) ⴰⵢⴷⴻⴳ ⴰⵔⴰ ⴷ-ⵢⵉⵍⵉ ⵓⵚⴻⴷⴷⴻⵇ ⴰⵎ ⵡⴰ ⵉ ⵢⵉⵣⵔⵓⵣⴰⵖ ⵏ ⵓⵏⴻⵥⵔⵓⴼ ⵓⵜⵔⵉⵎ ⴷⴻⴳ ⵍⴷⵣⴰⵢⴻⵔ, ⵖⴻⴼ ⵍⴻⵃⵙⴰⴱ ⵏ ⵓⴹⵔⵉⵙ-ⴰ, ⵢⴻⵔⵏⴰ ⵜⵜⴻⵄⴱⴻⵢⵢⴰ-ⴰ ⵜⴻⵇⵍⴻⵄ ⵙⴻⴳ ⵓⵙⴰⴳⴻⵏ ⵏ ⵡⴻⵀⵕⴰⵏ ⴳⴰⵔ 23 ⴷ 24 ⵢⴻⴱⵔⵉⵔ ⴷⴻⴳ ⵢⵉⵏⴻⴳⴱⴰⵔⴻⵏ ⴰⵢ ⴱⵓⴱⴱⴻⵏ ⵢⵉⴽⴰⵎⵢⵓⵏⴻⵏ ⴷ ⵓⵣⵣⵉⴳⴻⵏ ⵢⴻⵔⵏⴰ ⵜⴻⵡⵡⴻⴹ ⵜⵜⴻⵄⴱⴻⵢⵢⴰ-ⴰ 3 ⵏ ⵡⵓⵙⵙⴰⵏ ⵙⴰⴽⴽⵉⵏ.
ⵜⵜⴻⵄⴱⴻⵢⵢⴰ-ⴰ ⵅⴻⴱⴱⵔⴻⵏ-ⴷ ⴼⴻⵍⵍ-ⴰⵙ ⴷⴻⴳ ⵢⵉⵡⴻⵜ ⵏ ⵜⴼⴰⴳⵍⴰ ⴷⴻⴳ ⵜⵎⴰⵀⴻⵍⵜ ⵜⴰⵙⴰⵄⵓⴷⵉⵜ ⵙ ⵓⵃⴷⴰⵕ ⵏ ⵓⵏⵎⴰⵀⴰⵍ ⴰⵙⴰⵄⵓⴷⵉ ⴷⴻⴳ ⵍⴷⵣⴰⵢⴻⵔ, ⵎⴰⵀⵎⵧⵓⴷ ⴱⵉⵏ ⵀⵓⵙⵙⴰⵉⵏ ⵇⴰⵜⵜⴰⵏ, ⴷ ⵔⵧⵎⴰⵉⵏ ⵙⵉⵔⵧⵉⵙ, ⴰⵏⴻⵎⵀⴰⵍ ⵏ ⵡⴰⵀⵉⵍ ⵏ ⵜⵓⵛⵛⵉⵜ ⴰⵎⴰⴹⵍⴰⵏ ⵏ ⵍⴷⵣⴰⵢⴻⵔ.
« ⴰⵚⴻⴷⴷⴻⵇ ⵏ ⵜⵉⵏⵉ ⵜⴰⵙⴰⵄⵓⴷⵉⵜ ⴷ ⵜⴰⵖⴰⵡⵙⴰ ⵢⴻⵙⵄⴰⵏ ⴰⵣⴰⵍ ⴷⴻⴳ ⵜⵓⵛⵛⵉⵜ ⵏ ⵡⵉⴷ ⴰⵔⴰ ⴷ-ⵢⴻⵙⴼⴰⵢⴷⵉⵏ ⵙⴻⴳ-ⵙ ⴷⴻⴳ ⵡⴰⵢⵢⵓⵔ ⵏ ⵔⴻⵎⴹⴰⵏ ⵢⴻⵔⵏⴰ ⴰⵢⴰ ⵉⵄⴰⵡⴻⵏ ⵉⴳⴻⵔⴷⴰⵏ ⵢⴻⵇⵇⴰⵔⴻⵏ ⴷⴻⴳ ⵢⵉⵎⴰⵣⵉⵔⴻⵏ ⵏ ⵜⵉⵏⴷⵓⴼ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵙⵉⵔⵧⵉⵙ, ⴰⵢ ⴷ-ⵢⴻⵔⵏⴰⵏ ⴷⴰⴽⴽⴻⵏ « ⴰⵄⴰⵡⴻⵏ-ⴰ ⴰⴷ ⵢⴻⵊⵊ ⵉⵎⴻⵣⴷⴰⵖⴻⵏ ⵏ ⵢⵉⵎⴰⵣⵉⵔⴻⵏ ⴰⴷ ⴱⴻⴷⴷⵍⴻⵏ ⵛⵡⵉⵟ ⵜⵓⵛⵛⵉⵜ ⴷⴻⴳ ⵡⴰⴽⵓⴷ ⴰⵢⴷⴻⴳ ⵅⵓⵚⵚⴻⵏ ⵢⵉⴷⵔⵉⵎⴻⵏ ».
ⴰⵀⵉⵍ ⵏ ⵜⵓⵛⵛⵉⵜ ⴰⵎⴰⴹⵍⴰⵏ ⵢⴻⵜⵜⵄⴰⵡⴰⵏ ⵉⵣⵔⵓⵣⴰⵖ ⵉⵚⴻⵃⵔⴰⵡⵉⵢⴻⵏ ⴷⴻⴳ ⵍⴷⵣⴰⵢⴻⵔ ⵙⴻⴳ 1986. ⴷⴻⴳ ⵢⵉⵎⴰⵣⵉⵔⴻⵏ ⵏ ⵢⵉⵣⵔⵓⵣⴰⵖ ⵉⵚⴻⵃⵔⴰⵡⵉⵢⴻⵏ, ⴰⴼⵔⴰⵇ ⵏ ⵜⵓⵛⵛⵉⵜ ⵙⴷⵓⴽⴽⵓⵍⴻⵏ-ⵜ ⴷ ⵡⴰⵀⵉⵍ ⵏ ⵓⵃⴰⵕⴻⴱ ⵏ ⵍⴰⵥ ⴷ ⵡⴰⵀⵉⵍ ⵏ ⵜⵓⵛⵛⵉⵜ ⴷⴻⴳ ⵓⵖⴻⵔⴱⴰⵣ ⵉ ⵍⵎⴻⵏⴷ ⵏ ⵓⵙⵙⴻⴱⵖⴻⵙ ⵏ ⵍⴻⵇⵔⴰⵢⴰ ⵏ ⵢⵉⴳⴻⵔⴷⴰⵏ ⵉⵣⵔⵓⵣⴰⵖ.
ⴰⴽⴽ ⵍⴻⵎⵄⴰⵡⵏⴰ ⵏ ⵡⴰⵀⵉⵍ ⵏ ⵜⵓⵛⵛⵉⵜ ⴰⵎⴰⴹⵍⴰⵏ ⴷⴻⴳ ⵍⴷⵣⴰⵢⴻⵔ ⵜⵜⴹⴰⴼⴰⵔⴻⵏⵜ-ⵜⵜ ⵜⵓⴷⴷⵙⵉⵡⵉⵏ ⵜⵉⵖⴻⵍⵏⴰⵡⵉⵏ ⴷ ⵜⴻⴳⵔⴰⵖⵍⴰⵏⵉⵏ ⵜⵓⵛⵔⵉⴽⵉⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⴻⴼⵜⴰⵔⵜ-ⴰ, ⴰⴽⴽⴻⵏ ⴰⴷ ⵢⴻⵜⵜⵡⴰⴹⵎⴻⵏ ⴰⴷ ⵜⴰⵡⴻⴹ ⵍⴻⵎⵄⴰⵡⵏⴰ ⵖⴻⵔ ⵡⵉⵏ ⵓⵎⵉ ⵜⴻⵜⵜⵡⴰⵣⴻⵏ.
ⴰⵀⵉⵍ ⵏ ⵜⵓⵛⵛⵉⵜ ⴰⵎⴰⴹⵍⴰⵏ ⴷ ⵏⴻⵜⵜⴰ ⴰⵢ ⴷ ⵜⴰⵏⴻⴳⴳⴰ ⵜⴰⵍⵙⴰⵏⵜ ⵜⴰⵎⴻⵇⵔⴰⵏⵜ ⴰⴽⴽ ⴰⵢ ⵢⴻⵜⵜⵃⴰⵕⴰⴱⴻⵏ ⵍⴰⵥ ⴷⴻⴳ ⵓⵎⴰⴹⴰⵍ ⵙ ⵓⴼⵔⴰⵇ ⵏ ⵜⵓⵛⵛⵉⵜ ⴷⴻⴳ ⵜⴻⴳⵏⴰⵜⵉⵏ ⵏ ⵍⵃⵉⵔ, ⵢⴻⵔⵏⴰ ⵜⵅⴻⴷⴷⴻⵎ ⴷ ⵢⵉⵎⵖⵉⵡⴰⵏⴻⵏ ⴰⴽⴽⴻⵏ ⴰⴷ ⵜⴻⵙⵙⴻⵊⵀⴻⴷ ⴰⵅⴻⴷⴷⵉⵎ-ⵏⵏⴻⵙ. ⵢⴰⵍ ⴰⵙⴻⴳⴳⴰⵙ, ⴰⵀⵉⵍ ⵏ ⵜⵓⵛⵛⵉⵜ ⴰⵎⴰⴹⵍⴰⵏ ⵢⴻⵜⵜⵄⴰⵡⴰⵏ ⵓⴳⴰⵔ ⵏ 80 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵎⴷⴰⵏⴻⵏ ⴷⴻⴳ 75 ⵏ ⵜⵎⵓⵔⴰ.
