ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵙⴻⵍⵍⴰⵍ ⵉⴳⴻⵔ-ⴷ ⵜⵉⵖⵔⵉ ⵙⴻⴳ ⵕⵓⵎⴰ ⴰⴽⴽⴻⵏ ⴰⴷ ⴷ-ⵏⵏⵓⵍⴼⵓⵏ ⵢⵉⵏⵓⵔⴰⵔ ⵉⵎⴰⵢⵏⵓⵜⴻⵏ ⵏ ⵓⵎⵄⴰⵡⴻⵏ ⴳⴰⵔ ⵍⴷⵣⴰⵢⴻⵔ ⴷ ⵟⵟⴰⵍⵢⴰⵏ

ⵕⵓⵎⴰ – ⴰⵏⴻⵖⵍⴰⴼ ⴰⵎⴻⵏⵣⵓ, ⴰⴱⴷⴻⵍⵎⴰⵍⴻⴽ ⵙⴻⵍⵍⴰⵍ, ⵉⴳⴻⵔ-ⴷ ⵜⵉⵖⵔⵉ ⴰⵙⵙ ⵏ ⵍⴰⵕⴻⴱⵄⴰ ⵙⴻⴳ ⵕⵓⵎⴰ ⵉ ⵍⵎⴻⵏⴷ ⵏ ⵓⵙⵏⵓⵍⴼⵓ ⵏ « ⵢⵉⵏⵓⵔⴰⵔ ⵉⵎⴰⵢⵏⵓⵜⴻⵏ » ⵏ ⵓⵎⵄⴰⵡⴻⵏ ⴳⴰⵔ ⵍⴷⵣⴰⵢⴻⵔ ⴷ ⵟⵟⴰⵍⵢⴰⵏ ⵉ ⵡⴰⵙⵙⴰⵖⴻⵏ ⵉⴷⴰⵎⵙⴰⵏⴻⵏ « ⵉⵊⴻⵀⴷⴻⵏ ».

ⵙⴻⴳ ⵢⵉⴷⵉⵙ ⵏ ⵜⴻⵥⵡⴻⵔⵜ, ⵍⴷⵣⴰⵢⴻⵔ ⴷ ⵜⴰⵎⵓⵔⵜ ⵜⴰⵏⴼⴰⵔⴰⵙⵜ ⵜⴰⵎⴻⵇⵔⴰⵏⵜ ⵢⴻⵔⵏⴰ ⵜⴻⵙⵙⵓⵎⴻⵔ-ⴷ ⴰⴷ ⴷ-ⵜⴻⵙⵏⵓⵍⴼⵓ ⵉⵏⵓⵔⴰⵔ ⵉⵎⴰⵢⵏⵓⵜⴻⵏ ⵏ ⵓⵎⵄⴰⵡⴻⵏ ⴰⵙⵓⴷⴷⵙⴰⵏ ⴷ ⵟⵟⴰⵍⵢⴰⵏ ⵙ ⵓⴹⵎⴰⵏ ⵏ ⵜⵖⴻⵍⵍⵉⵙⵜ (ⵍⴰⵎⴰⵏ) ⵏ ⵜⵎⵓⵔⵜ-ⴰ ⴷ ⵜⵓⵕⵓⴼⵜ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵙⵙⵉⵡⴻⴹ ⵏ ⵜⴻⵥⵡⴻⵔⵜ ⵖⴻⵔ-ⵙⴻⵏⵜ ⴰⵎ ⵍⴳⴰⵣ, ⴰⵒⵉⵜⵕⵓⵍ ⴷ ⵜⵔⵉⵙⵉⵜⵉ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵙⴻⵍⵍⴰⵍ ⴷⴻⴳ ⵢⵉⵡⴻⵏ ⵏ ⵓⵙⴰⵔⴰⴳ ⵏ ⵜⵖⴻⵎⵙⴰ ⴰⵢ ⵉⴳⴰ ⴷ ⵓⵙⴻⵍⵡⴰⵢ ⵏ ⵓⵙⴻⵇⵇⴰⵎⵓ ⵏ ⵢⵉⵏⴻⵖⵍⴰⴼⴻⵏ ⵏ ⵟⵟⴰⵍⵢⴰⵏ, ⵎⴰⵜⵜⴻⵧ ⵔⴻⵏⵣⵉ.

« ⴷⴻⴳ ⵍⴷⵣⴰⵢⴻⵔ, ⵏⴻⵜⵜⴼⴰⵔⴰⵙ-ⴷ ⵜⴰⵥⵡⴻⵔⵜ, ⴰⵒⵉⵜⵕⵓⵍ ⴷ ⵍⴳⴰⵣ, ⵢⴻⵔⵏⴰ ⴰⵇⵍ-ⴰⵖ ⴰⴷ ⴷ-ⵏⴻⵙⵏⵓⵍⴼⵓⵢ ⵉⵙⵙⴻⴼⵜⵉⵢⴻⵏ ⵉⵎⴰⵢⵏⵓⵜⴻⵏ ⵉ ⵓⵙⵙⴻⵊⵀⴻⴷ ⵏ ⵜⵣⴻⵎⵎⴰⵔ-ⵏⵏⴻⵖ ⵏ ⵓⴼⴰⵔⴻⵙ ⴷⴻⴳ ⵓⵏⵔⴰⵔ-ⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵙⵙⴻⴼⵀⴻⵎ ⵎⴰⵙⵙ ⵙⴻⵍⵍⴰⵍ, ⴰⵢ ⵉⴳⴰⵏ ⵜⵉⵔⵣⵉ ⵏ ⵓⵅⴻⴷⴷⵉⵎ ⵖⴻⴼ ⵟⵟⴰⵍⵢⴰⵏ ⴰⵏⴷⴰ ⴰⵢ ⵢⴻⵙⴻⵍⵡⵉ ⴷ ⵎⴰⵙⵙ ⵔⴻⵏⵣⵉ ⵉⵅⴻⴷⴷⵉⵎⴻⵏ ⵏ ⵜⴻⵎⵍⵉⵍⵉⵜ ⵜⵉⵙ 3 ⵏ ⵓⵙⵡⵉⵔ ⵓⵏⵏⵉⴳ ⴳⴰⵔ ⵍⴷⵣⴰⵢⴻⵔ ⴷ ⵟⵟⴰⵍⵢⴰⵏ.

ⵎⴰⵙⵙ ⵙⴻⵍⵍⴰⵍ ⵉⵄⴰⵡⴻⴷ ⵉⵡⴻⴽⴽⴻⴷ-ⴷ ⴷⴰⴽⴽⴻⵏ ⴰⵙⵙⴰⵖⴻⵏ ⴳⴰⵔ ⵍⴷⵣⴰⵢⴻⵔ ⴷ ⵟⵟⴰⵍⵢⴰⵏ ⴳⴻⵔⵔⵣⴻⵏ, ⵢⴻⵔⵏⴰ ⵢⴻⵏⵏⴰ-ⴷ ⴷⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵇⵇⵍⴻⵏ ⵢⵉⵏⵓⵔⴰⵔ ⵉⵎⴰⵢⵏⵓⵜⴻⵏ ⵏ ⵓⵎⵄⴰⵡⴻⵏ ⴳⴰⵔ ⵙⵏⴰⵜ-ⴰ ⵏ ⵜⵎⵓⵔⴰ ⴷ ⵍⵍⵙⴰⵙ ⵉ « ⵓⵙⵙⴻⵊⵀⴻⴷ » ⵏ ⵡⴰⵙⵙⴰⵖⴻⵏ ⵓⴷⵎⵉⵙⴻⵏ ⴳⴰⵔ ⵙⵏⴰⵜ-ⴰ ⵏ ⵜⵎⵓⵔⴰ.

ⵎⵉ ⵜ-ⵜⵜⵔⴻⵏ ⵢⵉⵏⴻⵖⵎⴰⵙⴻⵏ ⵉⵟⴰⵍⵢⴰⵏⵉⵢⴻⵏ ⵖⴻⴼ ⵓⵙⴻⵏⴼⴰⵔ ⵏ ⴳⴰⵍⵙⵉ (ⴰⵇⴰⴷⵓⵙ ⵏ ⵍⴳⴰⵣ ⴳⴰⵔ ⵍⴷⵣⴰⵢⴻⵔ ⴷ ⵟⵟⴰⵍⵢⴰⵏ ⴰⵔⴰ ⵢⴻⵣⵔⵉⵏ ⵖⴻⴼ ⵜⴻⴳⵣⵉⵔⵜ ⵏ ⵙⴰⵔⴷⵉⵏⵢⴰ), ⵎⴰⵙⵙ ⵙⴻⵍⵍⴰⵍ ⵢⴻⵏⵏⴰ-ⴷ ⴷⴰⴽⴽⴻⵏ « ⴰⴷ ⴷ-ⵙⵙⵓⴷⴷⵔⴻⵏ ⴰⵙⴻⵏⴼⴰⵔ-ⴰ ⴷⴻⴳ ⵓⴽⴰⵜⴰⵔ ⵏ ⵜⵎⵓⵖⵍⵉ ⵜⴰⵎⴰⵢⵏⵓⵜ ⵏ ⵓⴹⵎⴰⵏ ⵏ ⵜⵖⴻⵍⵍⵉⵙⵜ ⵉ ⵜⵓⵕⵓⴼⵜ ⴷ ⵟⵟⴰⵍⵢⴰⵏ ⵙ ⵜⴻⵖⴱⴰⵍⵓⵜ ⵏⵉⴹⴻⵏ » ⴰⵔⴰ ⵢⴻⵙⵙⴰⵡⴰⴹⴻⵏ ⵍⴳⴰⵣ ⵙⴻⴳ ⵍⴷⵣⴰⵢⴻⵔ.

ⴷⵖⴰ ⵉ ⵍⵎⴻⵏⴷ ⵏ ⵡⴰⵢⴰ, ⴰⴷ ⵜⴻⵔⵏⵓ ⵍⴷⵣⴰⵢⴻⵔ ⵙⴻⴳ ⵍⴳⴰⵣ ⴰⵢ ⵜⴻⵙⵙⴰⵡⴰⴹ ⵖⴻⵔ ⵟⵟⴰⵍⵢⴰⵏ ⴷ ⵜⵓⵕⵓⴼⵜ ⵢⴻⵔⵏⴰ ⴰⴷ ⵜⵉⵍⵉ ⴷ ⵜⴰⵖⴱⴰⵍⵓⵜ ⵢⴻⵜⵜⵡⴰⴹⴻⵎⵏⴻⵏ ⵢⴻⵔⵏⴰ ⵢⴻⵍⵍⴰ ⴼⴻⵍⵍ-ⴰⵙ ⵍⴻⵜⵜⴽⴰⵍ, ⴰⵎ ⵡⴰⴽⴽⴻⵏ ⴰⵔⴰ ⴷ-ⵜⴻⴳ ⴰⵙⴻⵏⴼⴰⵔ ⴰⵎⴰⵢⵏⵓ ⴰⵢⴷⴻⴳ ⴰⵔⴰ ⴷ-ⵜⴻⵙⵙⵓⵎⴻⵔ ⴰⴷ ⵜⴻⵙⵙⴰⵡⴻⴹ ⵜⵔⵉⵙⵉⵜⵉ ⴰⵔⴰ ⴷ-ⵢⴻⵜⵜⵡⴰⵅⴻⴷⵎⴻⵏ ⵙ ⵍⴳⴰⵣ ⵏ ⵍⴷⵣⴰⵢⴻⵔ ⵉ ⵜⵓⵕⵓⴼⵜ ».

ⵙⴻⴳ ⵢⵉⴷⵉⵙ ⵏⵉⴹⴻⵏ, ⵢⴻⵏⵏⴰ-ⴷ ⴷⴰⴽⴽⴻⵏ ⴰⵙⴻⵏⴼⴰⵔ-ⴰ ⴰⴷ ⵢⴻⵇⵇⴻⵍ ⴷ ⵜⵉⵛⵛⵓⵔⴽⴰ ⴰⵢⴷⴻⴳ ⴰⵔⴰ ⴷ-ⵜⴻⵜⵜⵡⴰⵅⴷⴰⵎ ⵜⴻⵥⵡⴻⵔⵜ ⴷⴻⴳ ⵍⴷⵣⴰⵢⴻⵔ, ⴰⴷ ⵜⴻⵣⴳⴻⵔ ⵍⴻⴱⵃⴻⵕ ⵢⴻⵔⵏⴰ ⴰⴷ ⵜⴻⵏⵣ ⴷⴻⴳ ⵡⴰⴽⴽ ⵜⵓⵕⵓⴼⵜ ⵙ ⵜⵉⵛⵛⵓⵔⴽⴰ ⴷ ⵢⵉⵟⴰⵍⵢⴰⵏⵉⵢⴻⵏ, ⵢⴻⵔⵏⴰ ⵢⴻⵏⵏⴰ-ⴷ ⴷⴰⴽⴽⴻⵏ ⴰⵙⴻⵏⴼⴰⵔ-ⴰ ⵏ ⵓⵣⴻⴽⴽⴰ ⵢⴻⵙⵄⴰ ⴰⵣⴰⵍ.

ⵍⵉⴱⵢⴰ: ⵢⴻⵙⵙⴻⴼⴽ ⴰⴷ ⴷ-ⵇⵇⵍⴻⵏⵜ ⵜⴰⵍⵡⵉⵜ ⴷ ⵜⵖⴻⵍⵍⵉⵙⵜ ⵓⵇⴱⴻⵍ ⵟⵓⴱⴻⵔ 2015

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵙⵙⴰⵖⴻⵏ ⵉⴳⵔⴰⵖⵍⴰⵏⴻⵏ, ⵎⴰⵙⵙ ⵙⴻⵍⵍⴰⵍ ⵢⴻⴱⴷⴻⵔ-ⴷ ⴷⴰⴽⴽⴻⵏ ⵜⴰⴳⵏⵉⵜ ⴷⴻⴳ ⵍⵉⴱⵢⴰ ⴰⵢⴷⴻⴳ ⵓⵔ ⴷ-ⵢⴻⵇⵇⵉⵎ ⴰⵔⴰ ⴰⵟⴰⵙ ⵏ ⵡⴰⴽⵓⴷ ⵉ ⵍⵎⴻⵏⴷ ⵏ ⵢⵉⵔⵉⵔⵉ ⵏ ⵜⴰⵍⵡⵉⵜ ⴷ ⵓⵔⴽⴰⴷ, ⴰⵛⴽⵓ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵙⵙⴻⴼⵀⴰⵎ, ⴷⴻⴳ ⵡⴰⵢⵢⵓⵔ ⵏ ⵟⵓⴱⴻⵔ ⴰⵢ ⴷ-ⵢⴻⵜⵜⴻⴷⴷⵓⵏ, ⴰⴷ ⵜⴼⴰⴽ ⵜⴰⵍⵍⵉⵜ ⵏ ⵍⴻⵃⴽⴻⵎ ⵏ ⵜⵙⵓⴷⴰ ⴰⵢ ⵢⴻⵙⵙⴻⴷⴷⴰⵢⴻⵏ ⴰⴷⴰⴱⵓ ⵏ ⵍⵉⴱⵢⴰ.

ⵙ ⵡⴰⵢⴰ, ⵉⴳⴻⵔ-ⴷ ⵜⵉⵖⵔⵉ ⵉ ⵓⵎⵖⵉⵡⴰⵏ ⴰⴳⵔⴰⵖⵍⴰⵏ ⴰⴽⴽⴻⵏ ⴰⴷ ⵢⴻⵜⵜⴻⴽⴽⵉ ⵢⴻⵔⵏⴰ ⴰⴷ ⵢⴻⵅⴷⴻⵎ ⵉ ⵍⵎⴻⵏⴷ ⵏ ⵜⵉⴼⵔⴰⵜ ⴷⴻⴳ ⵜⴰⵍⵓⴼⵜ ⵏ ⵍⵉⴱⵢⴰ ⵙ ⵓⵎⵛⵉⵡⴻⵕ, ⵢⴻⵔⵏⴰ ⵎⴰ ⵓⵔ ⴷ-ⵢⴻⵍⵍⵉ ⵡⴰⵢⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵄⴻⵢⵢⴻⵏ, « ⵜⵉⴳⵔⴰⵡⵉⵏ ⵜⵉⵔⴻⴱⵔⴰⴱⵉⵏ ⴰⵢ ⵢⴻⵜⵜⴽⴻⵎⵎⵉⵍⴻⵏ ⵜⵜⴻⴼⵔⵓⵔⵓⵅⴻⵏⵜ ⴷⴻⴳ ⵜⴻⵎⵏⴰⴹⵜ-ⴰ ⴰⴷ ⴼⴽⴻⵏⵜ ⴰⵥⴰⵔ ⴷⴻⴳ-ⵙ ».

« ⴰⵇⵍ-ⴰⵖ ⴷⴻⴳ ⵜⴻⴳⵏⵉⵜ ⴰⵢⴷⴻⴳ ⵏⴻⵣⵎⴻⵔ ⴰⴷ ⴷ-ⵏⴰⴼ ⵉⵎⴰⵏ-ⵏⵏⴻⵖ ⵙⴷⴰⵜ ⵏ ⴷⴰⵄⴻⵛ ⵜⴰⵎⴰⵢⵏⵓⵜ ⴷⴻⴳ ⵍⵉⴱⵢⴰ. ⵏⴻⵜⵜⵡⴰⵙⵙⴻⵇⵏⴻⵄ ⴷⴰⴽⴽⴻⵏ ⵉⵎⴻⴷⴷⵓⴽⴰⵍ-ⵏⵏⴻⵖ ⵉⵟⴰⵍⵢⴰⵏⵉⵢⴻⵏ ⵓⴽⵉⵏ ⵉ ⵜⴰⵍⵓⴼⵜ ⵢⴻⵔⵏⴰ ⵍⴰ ⵏⵅⴻⴷⴷⴻⵎ ⵢⵉⴷ-ⵙⴻⵏ ⵉ ⵍⵎⴻⵏⴷ ⵏ ⵜⵉⴼⵔⴰⵜ ⴷⴻⴳ ⵍⵉⴱⵢⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

« ⵔⵔⴻⴱⵔⴰⴱ ⵢⴻⵣⵎⴻⵔ ⴰⴷ ⵢⴻⵜⵜⵡⴰⵔⵏⵓ ⵙ ⵢⵉⵖⵉⵍ, ⵎⴰⵛⴰ ⵢⴻⵃⵡⴰⵊ ⴷⴰⵖ ⵍⴻⵛⵖⴰⵍ ⵉⵙⴻⵔⵜⵉⵢⴻⵏ ⵏ ⵓⵎⵙⵓⵖⴰⵍ ⵉ ⵓⵙⵙⴻⵎⵇⴰⵔⴰⴱ ⴷ ⵓⵙⵙⴻⵎⵙⵓⵖⴰⵍ ⵏ ⵡⴰⴽⴽ ⵉⴷⵉⵙⴰⵏ, ⴰⵛⴽⵓ ⴷ ⵡⴰ ⴰⵢ ⴷ ⴰⴱⵔⵉⴷ ⴰⵡⵃⵉⴷ ⴰⵔⴰ ⴷ-ⵢⴻⵔⵔⴻⵏ ⵜⴰⵍⵡⵉⵜ ⴷ ⵜⵖⴻⵍⵍⵉⵙⵜ (ⵍⴰⵎⴰⵏ) ⴷⴻⴳ ⵍⵉⴱⵢⴰ ⴷ ⵡⴰⴽⴽ ⵜⴰⵎⵏⴰⴹⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⴳⴻⵔ ⵜⴰⵎⴰⵡⵜ ⵎⴰⵙⵙ ⵙⴻⵍⵍⴰⵍ.

ⴷⴻⴳ ⵜⴻⵎⵙⴰⵍⵜ-ⴰ, ⵎⴰⵙⵙ ⵙⴻⵍⵍⴰⵍ ⵢⴻⵏⵏⴰ-ⴷ ⴷⴰⵖ ⴷⴰⴽⴽⴻⵏ ⵢⴻⴼⵕⴻⵃ ⵙ ⵜⵎⵓⵖⵍⵉ ⵜⴰⴷⵣⴰⵢⵔⵉⵜ ⴷⴻⴳ ⴼⴻⵔⵔⵓ ⵏ ⵜⵍⵓⴼⴰ, ⴷ ⵜⵉⵏ ⴰⵢ ⵢⴻⴱⵏⴰⵏ ⵖⴻⴼ ⵓⵎⵛⵉⵡⴻⵕ ⴰⵢⴷⴻⴳ ⴰⵔⴰ ⵜⵜⴻⴽⴽⵉⵏ ⵢⵉⴷⵉⵙⴰⵏ ⵢⴻⵎⴳⴻⵔⵔⴰⴷⴻⵏ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⴱⴷⴻⵔ, ⴷⴻⴳ ⵡⴰⵢⴰ, ⴰⵎⵜⴰⵡⴰ ⵏ ⵜⴰⵍⵡⵉⵜ ⵏ ⵓⵎⵙⵓⵖⴰⵍ ⴰⵖⴻⵍⵏⴰⵡ ⵏ ⵎⴰⵍⵉ, ⴰⵢ ⴷ-ⵢⴻⵍⵍⴰⵏ ⵙ ⵕⵕⴰⵢ ⵏ ⵍⴷⵣⴰⵢⴻⵔ.

« ⴷ ⵜⴰ ⴷⴰⵖ ⴰⵢ ⴷ ⵜⵉⴽⵍⵉ ⴰⵢ ⴷ-ⵏⴻⵡⵡⵉ ⴷⴻⴳ ⵜⵓⵏⴻⵙ ⵢⴻⵔⵏⴰ ⴷ ⵜⴰ ⴰⵢ ⵍⴰ ⵏⴻⵜⵜⴹⴰⴼⴰⵔ ⴷⴰⵖ ⴷⴻⴳ ⵍⵉⴱⵢⴰ ⵉⵎⵉⵔ-ⴰ, ⵙ ⵓⵎⵄⴰⵡⴻⵏ ⴷ ⵓⵏⴰⴱⴰⴹ ⴰⵟⴰⵍⵢⴰⵏⵉ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴰⵖ ⴷⴰⴽⴽⴻⵏ ⵍⴷⵣⴰⵢⴻⵔ ⵜⴻⵙⵄⴰ « ⵍⴻⴱⵖⵉ » ⴰⴽⴽⴻⵏ ⴰⴷ ⵜⴽⴻⵎⵎⴻⵍ ⴰⴷ ⵜⴻⵙⵙⴻⴱⵖⴰⵙ ⴰⴽⴽ ⵉⴷⵉⵙⴰⵏ ⴰⴽⴽⴻⵏ ⴰⴷ ⴼⴻⵔⵏⴻⵏ ⴰⴱⵔⵉⴷ ⵏ ⵜⴰⵍⵡⵉⵜ ⴷ ⵓⵎⵛⵉⵡⴻⵕ ⵉ ⴼⴻⵔⵔⵓ ⵏ ⵜⵍⵓⴼⴰ ⴷ ⵓⵙⵙⴻⴱⴷⴻⴷ ⵏ ⵜⵖⴻⵍⵍⵉⵙⵜ.

« ⵜⴰ ⴷ ⵜⵉⴽⵍⵉ ⴰⵢ ⵢⴻⴱⵏⴰⵏ ⵖⴻⴼ ⵜⵉⴼⵔⴰⵜ ⵜⴰⵙⴻⵔⵜⵉⵜ ⴷ ⵓⵎⵛⵉⵡⴻⵕ, ⴷ ⵜⵉⵏ ⴰⵢ ⵉⵣⴻⵎⵔⴻⵏ ⴰⴷ ⴷ-ⵜⴻⵙⵙⴻⴳⵔⴻⵡ ⴰⴽⴽ ⵉⴷⵉⵙⴰⵏ (ⵉⵍⵉⴱⵉⵢⴻⵏ) ⴷⴷⴰⵡ ⵍⴻⵄⵏⴰⵢⴰ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵙ ⵓⵄⴰⵡⴻⵏ ⵏ ⵜⴷⵓⴽⵍⵉ ⵜⵓⵕⵓⴼⵉⵜ ⴷ ⵜⵎⵓⵔⴰ ⵜⵉⵏⴰⵔⴰⴳⵉⵏ (ⵜⵉⵊⵉⵔⴰⵜⵉⵏ) ⵉ ⵍⵎⴻⵏⴷ ⵏ ⵓⵙⵙⴻⴱⴷⴻⴷ ⵏ ⵓⵏⴰⴱⴰⴹ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ, ⴰⵙⵙⴻⴷⴷⵓ ⵏ ⵜⵓⴽⴽⵉⵜ ⴷ ⵓⵙⵙⴻⴱⴷⴻⴷ ⵏ ⵜⵎⴻⵏⴹⴰⵡⵜ ⵉ ⵍⵎⴻⵏⴷ ⵏ ⵓⵙⵙⵓⴷⴷⴻⵙ ⵏ ⵜⴻⴼⵔⴰⵏⵉⵏ ⵜⵉⵍⴻⵍⵍⵉⵢⵉⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵙⴻⵍⵍⴰⵍ ⴰⵢ ⴷ-ⵢⴻⵔⵏⴰⵏ ⴷⴰⴽⴽⴻⵏ « ⵙ ⴽⵔⴰ ⵏ ⵜⵉⴼⵔⴰⵜ ⴰⵔⴰ ⴷ-ⵢⵉⵍⵉⵏ ⵙ ⵢⵉⵖⵉⵍ ⵓⵔ ⵜⴼⴻⵔⵔⵓ ⴰⵔⴰ ⵓⴳⵓⵔ ⵏ ⵍⵉⴱⵢⴰ ».