Asebter amenzawi

Ad yili useǧhed n uṣaḍuf yerzan adlis s yeḍrisen n usemres

LEZZAYER – Aneɣlaf n yidles Azzedine Mihoubi, yenna-d ass n ttlata deg Lezzayer tamanaɣt, belli aɣlif-is ad yelhu d ukemmel, s yeḍrisen n usemres, asenfar n uṣaḍuf yerzan amahil d wulzuz n udlis ‘’akken’’ ad nessuddes ulzuz n udlis akken ad yeddu akken yessefk. Asenfar-a n uṣaḍuf s timmad-is ‘’ad yesbadu tamasit n yemdanen yettmahalen deg ulzuz n udlis (imeẓragen, imeskaren, imzenzen, d tama terza temguri n udlis d uẓrag-is), i d-yenna Mass Mihoubi deg temlilit n useqqamu n uɣlan, yerzan tasmuli d uskasi ɣef usenfar n uṣaḍuf icudden ɣer umahil d wulzuz n udlis. Deg tririt ɣef tuttra n yiwen n uɛeggal n texxamt tunnigt i d-yekkan seg seg uḥric wis krad n uselway, ɣef ‘’uḥeggef’’ n yimeskaren seg tama n yimeẓragen, aneɣlaf n yidles yesseḥres awal ɣef ussefki yessefk ad nefk ‘’aḥric ameqran n lfayda’’ i umeskar. Yenna-d Mass Mihoubi, deg liḥala-a ‘’amḍan n yimeẓragen deg Lezzayer ur d-yekka ara nnig 800 ideg 500 kan i d-yufraren seg iɛedda useggas n Lezzayer deg Fransa deg useggas n 2003, aya akka yekka-d seg tallalt n unabaḍ.

Seg tama nniḍen, Mass Mihubi yesseḥres awal ɣef ussefki yessefk ad nesnulfu ‘’kraḍ tmesriyin ara d-yettuɣalen yal aseggas’’ deg Lezzayer tamanaɣt ugar n tmesrit tagraɣlant n udlis n Lezzayer (SILA). Tamesrit i lmend n unekcum aɣurbiz, tayeḍ terza adlis n yigurdan d wis kraḍ i udlis atiknikan. Inekcumen n yiɛeggalen n Useqqamu n uɣlan rzan abeɛda ɣef wuguren icudden s ulzuz n udlis amedya n uswaḍ n yidlisen d-iẓergen deg tmurt-nneɣ d wid deg tmura n beṛṛa, allus n ulday n ulemma aɣelnaw n udlis, asmil n usuɣel, tanezwit d tlelli n wawal.