ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⴱⵟⴰⵍ ⵏ ⵓⵎⴰⴳⵔⴰⴷ 87 ⴱ ⴰⴷ ⵢⴻⵜⵜⵡⴰⵙⵙⴻⴼⵄⴻⵍ ⵓⵍⴰ ⵉ ⵡⴰⵢⴻⵏ ⵉⵄⴻⴷⴷⴰⵏ

ⴱⵓⵎⴻⵔⴷⴰⵙ – ⴰⵎⴰⴳⵔⴰⴷ ⵡⵉⵙ 87 ⴱ ⵏ ⵍⵇⴰⵏⵓⵏ ⵏ ⵓⵅⴻⴷⴷⵉⵎ ⴰⴷ ⵢⴻⵜⵜⵡⴰⴱⵟⴻⵍ ⵢⴻⵔⵏⴰ ⴰⴷ ⵢⴻⵙⵄⵓ ⵍⴰⵜⴻⵕ ⵓⵍⴰ ⵖⴻⴼ ⵡⴰⵢⴻⵏ ⵉⵄⴻⴷⴷⴰⵏ ⵙⴻⴳ ⵢⴻⵏⵏⴰⵢⴻⵔ ⵏ 2015 ⴷ ⴰⵙⴰⵡⴻⵏ, ⵢⴻⵔⵏⴰ ⴰⴱⵟⴰⵍ-ⴰ ⴰⴷ ⴷ-ⵢⵉⵍⵉ ⴰⴽⴽⴻⵏ ⴽⴰⵏ ⴰⵔⴰ ⴼⴰⴽⴻⵏⵜ ⵜⵙⴻⴽⴽⵉⵔⵉⵏ ⵜⵉⴷⴻⴱⵍⴰⵏⵉⵏ ⴰⵢ ⵢⴻⵇⵇⵏⴻⵏ ⵖⴻⵔ ⵡⴰⵢⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⴷⴻⴳ ⴱⵓⵎⴻⵔⴷⴰⵙ ⵓⵎⴰⵔⵓ ⴰⵎⴰⵜⵓ ⵏ ⵜⴷⵓⴽⵍⵉ ⵜⴰⵎⴰⵜⵓⵜ ⵏ ⵢⵉⵅⴻⴷⴷⴰⵎⴻⵏ ⵉⴷⵣⴰⵢⵔⵉⵢⴻⵏ (ⵓⴳⵜⴰ), ⴰⴱⴷⴻⵍⵎⴰⴷⵊⵉⴷ ⵙⵉⴷⵉ ⵙⴰⵉⴷ.

« ⵍⴰ ⴷ-ⵢⴻⵜⵜⵉⵍⵉ ⵓⵙⵙⴻⴼⵇⴻⴷ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵉⵎⵉⴹⴰⵏⴻⵏ ⴷ ⵢⵉⵅⴻⴷⴷⴰⵎⴻⵏ ⴰⵢ ⵜⴻⵔⵣⴰ ⵜⵙⴻⴽⴽⵉⵔⵜ-ⴰ ⵏ ⵓⴱⵟⴰⵍ, ⵢⴻⵔⵏⴰ ⴰⴱⵟⴰⵍ-ⴰ ⴰⴷ ⵢⴻⵏⴼⴻⵄ ⴰⴽⴽ ⵜⴰⴳⴳⴰⵢⵉⵏ (ⵏ ⵢⵉⵅⴻⴷⴷⴰⵎⴻⵏ) » ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵙⵉⴷⵉ ⵙⴰⵉⴷ ⴷⴻⴳ ⵢⵉⵡⴻⵜ ⵏ ⵜⵉⵏⴰⵡⵜ ⵉ ⵍⵎⴻⵏⴷ ⵏ ⵓⵔⵥⴰⵎ ⵏ ⵓⵙⵡⵉⵔ ⵏ ⵜⵡⵉⵍⴰⵢⵜ ⵡⵉⵙ 6 ⵏ ⵜⴷⵓⴽⵍⵉ ⵜⴰⵎⴰⵜⵓⵜ ⵏ ⵢⵉⵅⴻⴷⴷⴰⵎⴻⵏ ⵉⴷⵣⴰⵢⵔⵉⵢⴻⵏ, ⴷ ⴰⵙⵡⵉⵔ ⴰⵢⴷⴻⴳ ⵃⴻⴷⵕⴻⵏ 400 ⵏ ⵢⵉⵎⵙⴻⵏⵎⵓⵍⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⵉ ⵢⵉⵅⴻⴷⴷⴰⵎⴻⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ ⴷⴰⴽⴽⴻⵏ ⴰⴷ ⴷ-ⵙⴼⴰⵢⴷⵉⵏ « ⵙⴻⴳ ⵜⵎⴻⵔⵏⵉⵡⵜ ⴷⴻⴳ ⵜⵛⴻⵀⵕⵉⵢⵉⵏ-ⵏⵙⴻⵏ ⵢⴻⵔⵏⴰ ⴰⴷ ⴷ-ⵢⵉⵍⵉ ⵡⴰⵢⴰ ⵙⴻⴳ ⵢⴻⵏⵏⴰⵢⴻⵔ ⵏ 2015 ».

ⴷⴻⴳ ⵡⴰⵡⴰⵍ-ⵏⵏⴻⵙ ⵉ ⵡⵉⴷ ⴰⵢ ⵉⵛⵉⴽⴽⴻⵏ ⴷⴰⴽⴽⴻⵏ ⴰⴱⵟⴰⵍ-ⴰ ⵓⵔ ⵢⴻⵜⵜⵡⴰⵙⵙⴻⴼⵄⴰⵍ ⴰⵔⴰ, ⴰⵎⴰⵔⵓ ⴰⵎⴰⵜⵓ ⵏ ⵜⴷⵓⴽⵍⵉ ⵜⴰⵎⴰⵜⵓⵜ ⵏ ⵢⵉⵅⴻⴷⴷⴰⵎⴻⵏ ⵉⴷⵣⴰⵢⵔⵉⵢⴻⵏ ⵉⵡⴻⴽⴽⴻⴷ-ⴷ ⴷⴰⴽⴽⴻⵏ ⵕⵕⴰⵢ ⵏ ⵓⴱⵟⴰⵍ-ⴰ « ⵓⵍⴰⵛ ⴷⴻⴳ-ⵙ ⵜⵓⵖⴰⵍⵉⵏ », ⵢⴻⵔⵏⴰ ⴷ ⴰⵙⴻⵍⵡⴰⵢ ⵏ ⵜⴻⴳⴷⵓⴷⴰ ⴰⵢ ⵜ-ⵢⴻⴷⴷⵎⴻⵏ. ⵙ ⵡⴰⵢⴰ, « ⴰⴷ ⵢⴻⵜⵜⵡⴰⵙⵙⴻⴼⵄⴻⵍ ⴰⴽⴽⴻⵏ ⵢⴻⵍⵍⴰ », ⵓⵍⴰ ⵎⴰ ⵜⴰⵎⵓⵔⵜ ⵍⴰ ⵜⴻⵜⵜⵄⴻⴷⴷⵉ ⵖⴻⴼ ⵜⴰⵍⵓⴼⵜ ⵏ ⵍⴻⵅⵚⴰⵚ ⵏ ⵜⴻⴷⵔⵉⵎⵜ ⵢⴻⵔⵏⴰ ⵢⴻⴱⴷⴰ ⵢⴻⵜⵜⴱⴰⵏ-ⴷ ⵡⴰⵢⴰ ⵖⴻⴼ ⵡⴰⴽⴽ ⵜⵉⵎⵓⵔⴰ ⴰⵢ ⴷ-ⵢⴻⵜⵜⴼⴰⵔⴰⵙⴻⵏ ⵉⵙⴻⵔⵖⴰ, ⵖⴻⴼ ⵍⵊⴰⵍ ⵏ ⵓⵏⵇⴰⵙ ⵏ ⵓⵎⴻⴷⵅⵓⵍ-ⵏⵙⴻⵏⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⵎⴰⵙⵙ ⵙⵉⴷⵉ ⵙⴰⵉⴷ ⵉⴳⴻⵔ-ⴷ ⵜⵉⵖⵔⵉ ⴰⴽⴽⴻⵏ « ⵓⵔ ⵜⵜⴰⴽⴼⴻⵏ ⴰⵔⴰ ⵎⴻⴷⴷⴻⵏ ⵜⴰⵎⴻⵥⵥⵓⵖⵜ ⵉ ‘ⵢⵉⵎⵛⴻⵡⵡⵍⴻⵏ’-ⴰ ⴰⵢ ⵢⴻⴱⵖⴰⵏ ⴰⴷ ⵙⵕⵓⵃⴻⵏ ⵍⴰⵎⴰⵏ ⴰⵢ ⵢⴻⵙⵄⴰ ⵓⵖⴻⵔⵎⴰⵏ ⴷⴻⴳ ⵓⵡⴰⵏⴰⴽ-ⵏⵙⴻⵏ (ⴷⴷⵓⵍⴰ) », ⴰⵎ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⴷⴰⴽⴽⴻⵏ ⴰⵡⴰⵏⴰⴽ ⵍⴰ ⵢⴻⵜⵜⴻⴳ ⴰⴽⴽ ⴰⵢⴻⵏ ⵓⵎⵉ ⵢⴻⵣⵎⴻⵔ ⴰⴽⴽⴻⵏ ⴰⴷ ⵢⴻⵙⵙⴻⵍⵀⵓ ⴰⵙⵡⵉⵔ ⵏ ⵜⵓⴷⴻⵔⵜ ⵏ ⵓⵖⴻⵔⵎⴰⵏ ⵍⴰⴷⵖⴰ ⵙ ⵓⵙⵙⴻⵍⵀⵓ ⵏ ⵜⴻⴳⵏⵉⵜ ⵜⴰⴷⴰⵎⵙⴰⵏⵜ ⵏ ⵜⵎⵓⵔⵜ.

ⵎⴰⵙⵙ ⵙⵉⴷⵉ ⵙⴰⵉⴷ ⵢⴻⵏⵏⴰ-ⴷ ⴷⴰⵖ ⵜⴰⴷⵓⴽⵍⵉ ⵜⴰⵎⴰⵜⵓⵜ ⵏ ⵢⵉⵅⴻⴷⴷⴰⵎⴻⵏ ⵉⴷⵣⴰⵢⵔⵉⵢⴻⵏ ⴷⵉⵎⴰ ⵜⴻⵜⵜⴻⴽⴽⴰ ⴷⴻⴳ ⵓⵙⵏⵓⵍⴼⵓ ⵏ ⵓⵅⴻⴷⴷⵉⵎ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵛⴽⴻⵕ, ⵙⴻⴳ ⵢⵉⴷⵉⵙ ⵏⵉⴹⴻⵏ, ⵍⴻⵕⵢⵓⵢ ⴷ ⵜⴽⴻⴱⴱⴰⵏⵉⵢⵉⵏ ⵜⵉⵏⴰⴳⴷⵓⴷⵉⵏ ⴷ ⵜⵓⵙⵍⵉⴳⵉⵏ ⴰⵢ ⵉⵣⴻⵎⵔⴻⵏ « ⴰⴷ ⵜⵜⴻⴽⴽⵉⵏⵜ ⴷⴻⴳ ⵓⵙⵙⴻⵏⵇⴻⵙ ⵏ ⵍⴻⵅⵚⴰⵚ ⵏ ⵓⵅⴻⴷⴷⵉⵎ ⴰⵢ ⵉⵃⵓⵣⴰⵏ ⵉⵍⴻⵎⵥⵉⵢⴻⵏ, ⴷ ⵓⵙⵙⴻⵍⵀⵓ ⵏ ⵓⵙⵡⵉⵔ ⵏ ⵜⵓⴷⴻⵔⵜ ⵏ ⵢⵉⵅⴻⴷⴷⴰⵎⴻⵏ ».

ⵙⴻⴳ ⵢⵉⴷⵉⵙ ⵏⵉⴹⴻⵏ, ⵎⴰⵙⵙ ⵙⵉⴷⵉ ⵙⴰⵉⴷ ⵢⴻⵏⵏⴰ-ⴷ, ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵙⵙⴻⵡⵊⴻⴷ ⵉ ⵡⴰⵢⵢⵓⵔ ⵉⵎⵇⴻⴷⴷⴻⵙ ⵏ ⵔⴻⵎⴹⴰⵏ, ⴷⴰⴽⴽⴻⵏ ⵜⵜⵡⴰⵀⴻⵢⵢⴰⵏⵜ-ⴷ ⵜⵊⴻⵍⵍⴰⴱⵉⵏ ⵏ ⵢⵉⴷⵔⵉⵎⴻⵏ, ⵙ ⵓⵎⵄⴰⵡⴻⵏ ⵏ ⵢⵉⵖⵍⵉⴼⴻⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ ⴷ ⵢⵉⵎⴹⴻⴱⴱⵔⴻⵏ ⵏ 48 ⵏ ⵜⵡⵉⵍⴰⵢⵉⵏ, ⴰⴽⴽⴻⵏ ⴰⴷ ⴷ-ⴳⴻⵏ ⵍⴻⵙⵡⴰⵇ ⵓⵇⵔⵉⴱⴻⵏ ⵉ ⵍⵎⴻⵏⴷ ⵏ ⵓⵃⵓⴷⴷⵓ ⵏ ⵜⴻⵣⵎⴻⵔⵜ ⵏ ⵜⵉⵖⵉⵏ ⵉ ⵓⵖⴻⵔⵎⴰⵏ, ⵙ ⵓⵙⵙⴻⵔⴽⴻⴷ ⵏ ⵙⵙⵓⵎⴰⵜ ⴷ ⵓⵙⵙⵓⴷⴷⴻⵙ ⵏ ⵙⵙⵓⵇ.

ⴰⵙⵡⵉⵔ-ⴰ ⵏ ⵜⵡⵉⵍⴰⵢⵜ ⵢⴻⵍⵍⴰ-ⴷ ⴷⴻⴳ ⵓⵙⵓⴷⵓ ⴰⵖⴻⵍⵏⴰⵡ ⵏ ⵜⵎⴻⵔⵔⵉⵜ ⵏ ⴼⵉⴳⵓⵉⴻⵔ (ⴱⵓⵎⴻⵔⴷⴰⵙ) ⵢⴻⵔⵏⴰ ⵖⵔⴰⵏ-ⴷ ⴷⴻⴳ-ⵙ ⴰⵎ ⵡⴰⴽⴽⴻⵏ ⴰⵢ ⴷ-ⵙⵙⵓⴽⴽⴻⵏ ⵜⵉⵟ ⵖⴻⴼ ⵓⵕⴰⴱⵓⵍ ⵏ ⵢⵉⵎⴻⵏⵣⴰⵢⴻⵏ ⴷ ⵡⵓⴷⵔⵉⵎ ⵏ ⵜⴷⵓⴽⵍⵉ ⴷⴻⴳ ⵜⵡⵉⵍⴰⵢⵜ-ⴰ, ⵙⴰⴽⴽⵉⵏ ⵄⴰⵡⴷⴻⵏ ⴼⴻⵔⵏⴻⵏ ⴰⵎⴰⵜⵓ ⵏ ⵜⵡⵉⵍⴰⵢⵜ ⵧⵎⴰⵔ ⵛⵀⴻⴱⴰⴱ ⴰⴽⴽⴻⵏ ⴰⴷ ⵢⴻⵃⴽⴻⵎ ⵜⴰⴷⵓⴽⵍⵉ ⴷⴻⴳ ⴱⵓⵎⴻⵔⴷⴰⵙ ⵉ ⵍⴻⵡⵚⴰⵢⴰ ⵜⵉⵙ 4, ⴰⵎ ⵡⴰⴽⴽⴻⵏ ⴰⵢ ⵢⴻⵜⵜⵡⴰⴼⵔⴻⵏ ⴷⴰⵖ ⵓⵙⴻⵇⵇⴰⵎⵓ ⴰⵙⵍⴻⴽⵎⴰⵏ ⴰⵢⴷⴻⴳ ⵜⵜⴻⴽⴽⴰⵏ 39 ⵏ ⵢⵉⵎⴰⵙⵍⴰⴹⴻⵏ.