ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⵉⵢⵉⵜⴰ ⴷ ⵓⵜⵄⴻⴷⴷⵉ ⵖⴻⴼ ⵢⵉⴳⴻⵔⴷⴰⵏ: ⴰⴷ ⵢⵉⵍⵉ ⵜⵜⴰⵡⵉⵍ ⵉ ⵓⴽⵛⴰⴼ ⵏ ⵡⴰⵢⴰ ⵓⵇⴱⴻⵍ ⵜⴰⴳⴰⵔⴰ ⵏ 2015
ⵍⴷⵣⴰⵢⴻⵔ ⵜⴰⵎⴰⵏⴻƔⵜ – ⴰⴷ ⵢⵉⵍⵉ ⵜⵜⴰⵡⵉⵍ ⵉ ⵓⴽⵛⴰⴼ ⵏ ⵜⵢⵉⵜⴰ ⴷ ⵓⵜⵄⴻⴷⴷⵉ ⵖⴻⴼ ⵢⵉⴳⴻⵔⴷⴰⵏ ⵓⵇⴱⴻⵍ ⵜⴰⴳⴰⵔⴰ ⵏ ⵓⵙⴻⴳⴳⴰⵙ-ⴰ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵅⴻⴱⴱⵔⴻⵏ ⴰⵙⵙ ⵏ ⵍⵃⴻⴷⴷ ⵙⵖⵓⵔ ⵓⵖⵍⵉⴼ ⵏ ⵜⴻⵎⵙⴻⵜⵍⴻⵍⵜ ⵜⴰⵖⴻⵍⵏⴰⵡⵜ, ⵜⴰⵡⴰⵛⵓⵍⵜ ⴷ ⵜⴻⴳⵏⵉⵜ ⵏ ⵜⵎⴻⵟⵟⵓⵜ.
« ⴰⵖⵍⵉⴼ ⵏ ⵜⴻⵎⵙⴻⵜⵍⴻⵍⵜ ⵍⴰ ⵢⴻⵜⵜⵀⴻⵢⵢⵉ ⴰⵙⴻⵏⴼⴰⵔ ⵏ ⵜⵜⴰⵡⵉⵍ ⵏ ⵓⴽⵛⴰⴼ ⵏ ⵜⴻⴽⵔⵉⴹⵜ ⵎⴳⴰⵍ ⵢⵉⴳⴻⵔⴷⴰⵏ, ⵢⴻⵔⵏⴰ ⵜⵜⴰⵡⵉⵍ-ⴰ ⴰⴷ ⴷ-ⵢⴻⵡⵊⴻⴷ ⵓⵇⴱⴻⵍ ⵜⴰⴳⴰⵔⴰ ⵏ 2015 » ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⵏⴻⵎⵀⴰⵍⵜ ⵜⴰⵎⴰⵜⵓⵜ ⵏ ⵜⵡⴰⵛⵓⵍⵜ, ⵏ ⵜⴻⴳⵏⵉⵜ ⵏ ⵜⵎⴻⵟⵟⵓⵜ ⴷ ⵓⵎⵜⴰⵡⴰ ⴰⵏⵎⴻⵜⵜⵉ ⴷⴻⴳ ⵓⵖⵍⵉⴼ, ⴽⵀⴰⴷⵉⴷⵊⴰ ⵍⴰⴰⴷⵊⴻⵍ.
ⵜⵜⴰⵡⵉⵍ-ⴰ ⴰⴷ ⵜⵜⴻⴽⴽⵉⵏ ⴷⴻⴳ-ⵙ ⵢⵉⵃⵔⵉⵛⴻⵏ ⴷ ⵜⵉⴷⴷⵓⴽⵍⵉⵡⵉⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ, ⵢⴻⵔⵏⴰ « ⵉⵙⵡⵉ-ⵏⵏⴻⵙ ⴷ ⴰⵙⵎⴰⵍ ⵏ ⵜⴻⵖⵡⴰⵍⵜ ⴷ ⵓⵙⵙⴻⵎⵢⵓⴷⴷⴻⵙ ⴳⴰⵔ ⵢⵉⴷⵉⵙⴰⵏ ⴷ ⵓⴽⵛⴰⴼ ⵏ ⵢⵉⵔ ⵜⵉⴽⵍⵉ ⴰⵢ ⴷ-ⵜⵜⴰⵡⵉⵏ ⴽⵔⴰ ⴷ ⵢⵉⴳⴻⵔⴷⴰⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ.
ⵜⵉⵎⴹⴻⴱⴱⴻⵔⵜ-ⴰ ⵜⴻⵏⵏⴰ-ⴷ ⴷⴰⴽⴽⴻⵏ « ⵍⵍⴰⵏ ⴰⵟⴰⵙ ⵏ ⵢⵉⴳⴻⵔⴷⴰⵏ ⵢⴻⵜⵜⵡⴰⵜⴻⵏ ⵏⴻⵖ ⵢⴻⵜⵜⵡⴻⴵⴵⴻⵏ ⵢⴻⵔⵏⴰ ⵏⴹⴻⵔⵔⴻⵏ ⴷⴻⴳ ⵜⵙⵓⵙⵎⵉ », ⴰⵎ ⵡⴰⴽⴽⴻⵏ ⴰⵢ ⴷ-ⵜⴻⵔⵏⴰ ⴷⴰⴽⴽⴻⵏ ⵜⵜⴰⵡⵉⵍ-ⴰ ⵍⴰ ⵜ-ⵉⴷ-ⵙⵙⴻⵡⵊⴰⴷⴻⵏ ⵙ ⵓⵎⵄⴰⵡⴻⵏ ⴷ ⵢⵉⵎⴰⵣⵣⴰⵢⴻⵏ ⵏ ⵓⵙⴻⵏⴷⵓⵇ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉ ⵜⴳⴻⵔⴷⴰ (ⵓⵏⵉⵛⴻⴼ). ⵜⵜⴰⵡⵉⵍ-ⴰ ⴰⴷ ⵢⵉⵍⵉ ⴷ ⵢⵉⵡⴻⵏ ⵙⴻⴳ ⵡⴰⵍⵍⴰⵍⴻⵏ ⴰⵔⴰ ⵢⴻⵙⵊⴻⵀⴷⴻⵏ ⴰⵙⵙⴻⴼⵄⴻⵍ ⵏ ⵓⵙⴻⵏⴼⴰⵔ ⵏ ⵍⵇⴰⵏⵓⵏ ⵏ ⵓⵃⵓⴷⴷⵓ ⵏ ⵢⵉⴳⴻⵔⴷⴰⵏ.
ⵜⵜⴰⵡⵉⵍ-ⴰ « ⴰⴷ ⴷ-ⵢⴻⵊⴱⴻⴷ ⵍⵡⴻⵍⵀⴰ ⵖⴻⴼ ⵢⵉⵡⴻⵜ ⵏ ⵜⴻⴳⵏⵉⵜ ⵏ ⵜⴻⴽⵔⵉⴹⵜ, ⵙ ⵡⴰⵍⵍⴰⵍⴻⵏ ⴰⵔⴰ ⵢⴻⵜⵜⵡⴰⵙⵇⴻⴷⵛⴻⵏ ⵉ ⵡⴰⵢⴰ, ⴳⴰⵔ-ⴰⵙⴻⵏ ⵍⴰⴷⵖⴰ ⵓⴹⴹⵓⵏ ⴰⵣⴻⴳⵣⴰⵡ 15-27 ⵏ ⵓⵖⵍⵉⴼ ⵏ ⵜⴻⵎⵙⴻⵜⵍⴻⵍⵜ ⵜⴰⵖⴻⵍⵏⴰⵡⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ.
ⵎⴰⵙⵙⴰ ⵍⴰⴰⴷⵊⴻⵍ ⵜⴻⵏⵏⴰ-ⴷ, ⵙⴻⴳ ⵢⵉⴷⵉⵙ ⵏⵉⴹⴻⵏ, ⴷⴰⴽⴽⴻⵏ ⵍⴻⵚⵏⴰⴼ ⵢⴻⵎⴳⴻⵔⵔⴰⴷⴻⵏ ⵏ ⵜⴻⴽⵔⵉⴹⵜ ⴰⵢ ⵢⴻⵜⵜⵄⴻⴷⴷⵉⵏ ⵖⴻⴼ ⵢⵉⴳⴻⵔⴷⴰⵏ ⵎⴰⵛⵉ ⴷⴻⴳ ⵍⴷⵣⴰⵢⴻⵔ ⴽⴰⵏ ⴰⵢ ⵍⵍⴰⵏ, ⴰⵎ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⴷⴰⴽⴽⴻⵏ ⵡⵉⵏ ⴰⵔⴰ ⵉⵙⵓⵙⵎⴻⵏ « ⵢⴻⴼⴽⴰ ⴰⴼⵓⵙ ».
ⵜⵉⵎⴹⴻⴱⴱⴻⵔⵜ-ⴰ ⵜⴻⴽⵛⴻⴼ-ⴷ ⴷⴰⴽⴽⴻⵏ ⵢⵉⵡⴻⵏ ⵏ ⵓⵙⵙⴻⵏⵇⴻⴷ ⵏ ⵕⵕⴰⵢ ⵖⴻⴼ ⵢⵉⵣⴻⵔⴼⴰⵏ ⵏ ⵢⵉⴳⴻⵔⴷⴰⵏ ⴰⵢ ⴷ-ⵢⴻⵍⵍⴰⵏ ⴷⴻⴳ 2014 (ⵉⴳⴰ-ⵜ ⵓⵖⵍⵉⴼ), ⵉⵃⵓⵣⴰ-ⴷ 4.800 ⵏ ⵢⵉⴳⴻⵔⴷⴰⵏ ⴷⴻⴳ 48 ⵏ ⵜⵡⵉⵍⴰⵢⵉⵏ ⵢⴻⵔⵏⴰ « ⵢⴻⵙⵙⴽⴻⵏ-ⴷ ⴷⴰⴽⴽⴻⵏ 46% ⵏ ⵢⵉⴳⴻⵔⴷⴰⵏ ⴰⵢ ⵜⵜⵔⴻⵏ ⵓⵔ ⵙⵙⵉⵏⴻⵏ ⴰⵔⴰ ⵉⵣⴻⵔⴼⴰⵏ-ⵏⵙⴻⵏ ».
ⵉ ⵍⵎⴻⵏⴷ ⵏ ⵡⴰⵢⴰ, ⵙⵡⴻⵊⴷⴻⵏ-ⴷ ⵢⵉⵡⴻⵏ ⵏ ⵓⵎⵏⵉⵔ (ⴰⴷⵍⵉⵙ) ⴷⴻⴳ ⵓⵖⵍⵉⴼ, ⴷ ⵡⵉⵏ ⴰⵢ ⴷ-ⵢⴻⵜⵜⴰⴽⴼⴻⵏ ⵜⵉⵍⵖⴰ ⵜⵉⵃⴻⵔⴼⵉⵢⵉⵏ, ⵙ ⵓⴱⵔⵉⴷ ⵏ ⵓⵙⵙⴻⵍⵎⴻⴷ, ⵖⴻⴼ ⵢⵉⵣⴻⵔⴼⴰⵏ ⵏ ⵢⵉⴳⴻⵔⴷⴰⵏ, ⵍⴰⴷⵖⴰ ⴰⵣⵔⴻⴼ ⵏ ⵢⵉⵙⴻⵎ, ⴰⵣⵔⴻⴼ ⵏ ⵓⴷⴰⵡⵉ, ⵡⵉⵏ ⵏ ⵣⵣⵀⵓ ⴷ ⵡⵉⵏ ⵏ ⵓⵃⵓⴷⴷⵓ.
ⴷⵉⵎⴰ ⴷⴻⴳ ⵜⴻⵎⵙⴰⵍⵜ-ⴰ, ⵜⵉⵎⴹⴻⴱⴱⴻⵔⵜ-ⴰ ⵜⴻⵙⵃⴰⵙⵙⴻⴼ ⴷⴰⵖ ⵉⵎⵉ ⴰⵢ ⵅⵓⵚⵚⴻⵏⵜ ⵜⵙⴻⵙⵜⴰⵏⵉⵏ (ⵉⵃⵜⴰⵛⴻⵏ) ⵖⴻⴼ ⵜⴻⴳⵏⴰⵜⵉⵏ ⵏ ⵜⴻⴽⵔⵉⴹⵜ ⵢⴻⵜⵜⵄⴻⴷⴷⵉⵏ ⵖⴻⴼ ⵢⵉⴳⴻⵔⴷⴰⵏ, ⵢⴻⵔⵏⴰ ⵜⴻⵏⵏⴰ-ⴷ ⴷⴰⴽⴽⴻⵏ ⵢⴻⵙⵙⴻⴼⴽ ⴷⴰⵖ ⴰⴷ ⴷ-ⵉⵍⵉⵏⵜ ⵜⴻⵣⵔⴰⵡⵉⵏ ⵖⴻⴼ ⵡⴰⵎⴻⴽ ⴰⵔⴰ ⵜⵉⵍⵉ ⵜⴻⴳⵏⵉⵜ ⵙⴻⴳ-ⴰ ⴰⵔ ⵙⴷⴰⵜ, ⴰⵛⴽⵓ ⵜⵉⵣⵔⴰⵡⵉⵏ-ⴰ ⴷ ⵜⴰⵖⴱⴰⵍⵓⵜ ⵏ ⵜⴻⵍⵖⴰ ⴰⵔⴰ ⵢⴻⴵⴵⴻⵏ ⵡⵉⴷ ⵜⴻⵔⵣⴰ ⵜⴻⵎⵙⴰⵍⵜ ⴰⴷ ⴷⴷⵎⴻⵏ ⵍⴻⵕⵢⵓⵢ ⵉⵡⴰⵜⴰⵏ.
