ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵉⴱⵔⵉⴷⴻⵏ ⵢⴻⵙⵙⴻⴼⴽ ⴰⴷ ⵜⵜⵡⴰⴱⵏⵓⵏ ⴰⴽⴽⴻⵏ ⴰⴷ ⵏⴻⴼⵄⴻⵏ ⵜⵉⵎⴻⵜⵜⵉ ⴷ ⵜⴷⴰⵎⵙⴰ
ⵍⴻⵎⴷⴻⵢⵢⴰ – ⴰⵏⴻⵖⵍⴰⴼ ⵏ ⵢⵉⵎⵓⵀⴰⵍ ⵉⵏⴰⴳⴷⵓⴷⴻⵏ, ⴰⴱⴷⴻⵍⵎⴰⵍⴻⴽ ⵧⵓⴰⵍⵉ, ⵢⴻⵏⵏⴰ-ⴷ, ⵎⵉ ⵢⴻⵙⵙⴻⵏⵇⴻⴷ ⴰⵙⵙ ⵏ ⵍⴻⵜⵏⵉⵢⴻⵏ ⴰⵥⴻⴹⴹⴰ ⵏ ⵢⵉⴱⵔⵉⴷⴻⵏ ⵏ ⵜⵡⵉⵍⴰⵢⵜ ⵏ ⵍⴻⵎⴷⴻⵢⵢⴰ, ⴷⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵜⵜⵡⴰⴱⵏⵓⵏ ⵢⵉⴱⵔⵉⴷⴻⵏ ⵉ ⵍⵎⴻⵏⴷ ⵏ ⵏⵏⴼⴻⵄ ⴰⵢ ⵣⴻⵎⵔⴻⵏ ⴰⴷ ⵜ-ⵉⴷ-ⴰⵡⵉⵏ ⵉ ⵜⵎⴻⵜⵜⵉ ⴷ ⵜⴷⴰⵎⵙⴰ, ⵎⴰⵛⵉ ⵉ ⵜⵎⴻⵔⵏⵉⵡⵜ ⴽⴰⵏ ⵏ ⵢⵉⴽⵉⵍⵓⵎⵉⵜⵔⴻⵏ.
« ⵢⴻⵙⵙⴻⴼⴽ ⴰⴷ ⵏⵅⴻⵎⵎⴻⵎ ⵖⴻⴼ ⵏⵏⴼⴻⵄ (ⴰⵔⴰ ⴷ-ⴰⵡⵉⵏ ⵢⵉⴱⵔⵉⴷⴻⵏ) ⴷⴻⴳ ⵜⵎⴻⵜⵜⵉ ⴷ ⵜⴷⴰⵎⵙⴰ, ⵎⴰⵛⵉ ⵖⴻⴼ ⵓⵎⴹⴰⵏ ⵏ ⵢⵉⴽⵉⵍⵓⵎⵉⵜⵔⴻⵏ ⴰⵢ ⵏⴻⴱⵏⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ ⴷⴻⴳ ⵜⴻⵔⵣⵉ ⵏ ⵓⵙⵙⴻⴼⵇⴻⴷ ⵏ ⵢⵉⵅⴻⴷⴷⵉⵎⴻⵏ ⵏ ⵜⵖⵓⵣⵉ ⵏ ⵓⴳⴻⵏⵏⴰⵔⵉ ⵏ ⵍⵃⴻⵎⴷⴰⵏⴻⵢⵢⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴰⴽⴽⴻⵏ ⴰⵥⴻⴹⴹⴰ ⴰⵖⴻⵍⵏⴰⵡ ⵏ ⵢⵉⴱⵔⵉⴷⴻⵏ ⵢⴻⵙⵙⴻⴼⴽ ⴰⴷ ⴷ-ⵢⵉⵍⵉ « ⵉ ⵍⴼⴰⵢⴷⴰ ⵏ ⵓⵙⵙⴻⴼⵜⵉ ⴷ ⵜⵏⴻⴼⵍⵉⵜ ⵏ ⵜⴻⵎⴷⵉⵏⵉⵏ-ⵏⵏⴻⵖ ».
ⴰⵃⵔⵉⵛ ⵏ ⵢⵉⵎⵓⵀⴰⵍ ⵉⵏⴰⴳⴷⵓⴷⴻⵏ « ⵢⴻⵙⵙⴻⴼⴽ ⴰⴷ ⵢⴻⵏⵏⴻⵔⵏⵉ ⵓⴳⴰⵔ ⵢⴻⵔⵏⴰ ⵓⵔ ⵢⴻⵜⵜⵖⵉⵎⵉ ⴰⵔⴰ ⴽⴰⵏ ⴷⴻⴳ ⵜⵏⴻⴼⵍⵉⵜ ⵜⴰⴳⵍⴰⵡⵉⵜ ⵏ ⵓⵥⴻⴹⴹⴰ ⴰⵖⴻⵍⵏⴰⵡ ⵏ ⵢⵉⴱⵔⵉⴷⴻⵏ » ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵧⵓⴰⵍⵉ, ⴰⵢ ⴷ-ⵢⴻⵙⴼⴻⵀⵎⴻⵏ ⴷⴰⴽⴽⴻⵏ ⵜⴰⵎⵓⵖⵍⵉ-ⴰ ⵢⴻⵙⵙⴻⴼⴽ ⴰⴷ ⵜⴻⵜⵜⴻⴽⴽⵉ ⴷⴻⴳ ⵓⵙⵙⴻⵔⴱⴻⵃ ⴰⴷⴰⵎⵙⴰⵏ ⵏ ⵜⴻⵎⵏⴰⴹⵉⵏ ⵏ ⵜⵍⵉⵙⴰ ⵏ ⵜⵎⵓⵔⵜ ⵢⴻⵔⵏⴰ ⴰⴷ ⵜⴻⵙⵙⵉⴼⵙⴻⵙ ⴰⵙⵙⴻⴼⵜⵉ ⴷⴻⴳ ⵜⴻⵎⴷⵉⵏⵉⵏ ⴰⵢⵖⴻⴼ ⵄⴻⴷⴷⴰⵏ ⵢⵉⴱⵔⵉⴷⴻⵏ ⵏ ⵓⵥⴻⴹⴹⴰ ⴰⵖⴻⵍⵏⴰⵡ.
ⴰⵏⴻⵖⵍⴰⴼ ⵉⵃⴻⵜⵜⴻⵜ-ⴷ, ⵙⴻⴳ ⵢⵉⴷⵉⵙ ⵏⵉⴹⴻⵏ, ⴷⴰⴽⴽⴻⵏ ⵢⴻⵙⵙⴻⴼⴽ ⴰⴷ ⴷ-ⵜⵉⵍⵉ ⵜⵉⴽⵍⵉ ⵢⴻⵎⵜⴰⵡⴰⵏ, ⵓⵍⴰ ⵎⵉ ⴰⵔⴰ ⵜⵜⵡⴰⴱⵏⴰⵢⴻⵏ ⵢⵉⵙⴻⵏⴼⴰⵔⴻⵏ, ⴰⴽⴽⴻⵏ ⵓⵔ ⴷ-ⵢⴻⵜⵜⵉⵍⵉ ⴰⵔⴰ ⵉⵄⴻⴹⴹⴻⵍ ⵏⴻⵖ ⵣⵣⵢⴰⴷⴰ ⵏ ⵓⵚⴻⵔⵔⴻⴼ ⵖⴻⴼ ⵢⵉⵙⴻⵏⴼⴰⵔⴻⵏ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴰⴽⴽⴻⵏ ⴰⵙⵙⴻⵎⵢⵓⴷⴷⴻⵙ ⴷ ⵓⵎⵢⴻⵙⵙⵎⴰⴷ ⵢⴻⵙⵙⴻⴼⴽ ⴰⴷ ⵉⵍⵉⵏ ⴷ ⵍⵍⵙⴰⵙ ⵏ ⵡⴰⵙⵙⴰⵖⴻⵏ ⴳⴰⵔ ⵜⴻⵎⵏⴰⴹⵉⵏ ⴷ ⵢⵉⵎⴹⴻⴱⴱⵔⴻⵏ ⵏ ⵢⵉⵛⴰⵏⵟⵉⵢⴻⵏ ⴰⴽⴽⴻⵏ ⴰⴷ ⵏⴻⴼⵄⴻⵏ ⵢⵉⵙⴻⵏⴼⴰⵔⴻⵏ-ⴰ.
