Asebter amenzawi

Ldzayer d tinebgit n yiseɣ deg temzikkent tagraɣlant n tmerrit n « Euroal 2015 »

LDZAYER TAMANEƔT – Ldzayer ad tettekki i tikkelt tamezwarut s yisem-nnes d tinebgit n yiseɣ deg teẓrigt tis 10 n temzikkent tagraɣlant n tmerrit « Euroal 2015 » ara d-yilin gar 3 d 5 Yunyu ay d-yetteddun deg Malaga (Spenyul), d tin aydeg ara ttekkin ugar n 150 n yinemzikknen seg 19 n tmura tibeṛṛaniyin, ɣef wakken ay d-yenna yiwen n ulɣu n Tnarit taɣelnawt n tmerrit (ONAT).

Tanefsart n Tnarit taɣelnawt n tmerrit tesɛa tajumma n 80 n yimitren imkuẓen yerna tezga-d deg tallunt tagejdant n temzikkent-a. Swejden-d tanefsart-a akken ad yeddukkel deg-s uneṣli d utrar deg uqeddem n Ldzayer i wid ara d-yasen ad merrḥen deg-s, yerna tanefsart-a tesskanay-d tizemmar n Ldzayer deg tmerrit, ɣef wakken ay d-yenna ulɣu-a.

Tanefsart-a ad tili d tawwurt ireẓmen i tkebbaniyin tidzayriyin n tmerrit akken ad semlent ifarisen-nsent, yerna ad d-ilin daɣ deg-s yirmuden idelsanen d yinaẓuren.

Ad d-tili daɣ tnemsalt n sin n wussan i lfayda n tkebbaniyin tidzayriyin n tmerrit akken ad afent abrid ad d-gent inermisen d temtilin-nsent tibeṛṛaniyin yerna ad ssiwḍent ɣer ticcurka d yimḍebbren n tneggiwin timeqranin akk n tmerrit deg umaḍal, akken ad semlent tamerrit deg Ldzayer yerna ad d-qeddment tizemmar n tmerrit n tmurt-a.

Anemhal amatu n Tnarit taɣelnawt n tmerrit ad d-iqeddem, deg temzikkent-a, yiwen n usarag s uzwel n « Tizemmar n Ldzayer deg tmerrit ».

Afran n Ldzayer d tinebgit n yiseɣ d ayen ay d-yesskanayen dakken yella lebɣi i ussejhed d usdumu n wassaɣen n ticcurka gar Ldzayer d Tuṛuft d ussejhed n umɛawen gar sin-a n yidisan deg yinurar yemgerraden.

I usmekti, azal n 37.314 n yimerrayen ispenyuliyen ay d-yerzan ɣef Ldzayer deg 2014.