ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴱⵓⵔⵓⵏⴷⵉ: ⵉⵎⵙⵓⵍⵜⴰ ⵓⵔ ⵊⵊⵉⵏ ⴰⵔⴰ ⴰⴽⴽ ⵎⴻⴷⴷⴻⵏ ⴰⴷ ⴳⴻⵏ ⵜⵉⵎⴻⵙⴱⴰⵏⵉⵢⵉⵏ

ⴱⵓⵊⵓⵎⴱⵓⵔⴰ – ⵜⴰⵎⵙⵓⵍⵜⴰ ⵏ ⴱⵓⵔⵓⵏⴷⵉ ⵓⵔ ⵜⴻⵊⵊⵉ ⴰⵔⴰ ⴰⴽⴽ ⵎⴻⴷⴷⴻⵏ, ⴰⵙⵙ ⵏ ⵍⴰⵕⴻⴱⵄⴰ, ⴰⴷ ⴳⴻⵏ ⵜⵉⵎⴻⵙⴱⴰⵏⵉⵢⵉⵏ ⵎⴳⴰⵍ ⵓⴷⴰⴱⵓ ⴷⴻⴳ ⵢⵉⴳⵎⴰⵏⴻⵏ ⵏ ⵜⵎⴰⵏⴻⵖⵜ ⴱⵓⵊⵓⵎⴱⵓⵔⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵏⵏⴰⵏ ⵜⵜⴰⵡⵉⵍⴰⵜ ⵏ ⵢⵉⵙⴰⵍⴰⵏ.

ⵇⵔⵉⴱ ⵙⵏⴰⵜ ⵏ ⵍⴻⴷⵡⴰⵕ ⴰⵢⴰ ⵙⴻⴳ ⵡⴰⵙⵎⵉ ⴰⵢ ⵜⵜⵡⴰⴼⴻⵔⵇⴻⵏ ⴰⵟⴰⵙ ⵏ ⵢⵉⵎⵙⵓⵍⵜⴰ ⴷⴻⴳ ⵢⵉⴳⵎⴰⵏⴻⵏ ⵏ ⴱⵓⵊⵓⵎⴱⵓⵔⴰ, ⵢⴻⵔⵏⴰ ⴰⵏⴷⴰ ⵎⴰ ⵢⴻⵍⵍⴰ ⵓⵎⵙⴻⴳⵔⴰⵡ ⵏ ⵍⵖⴰⵛⵉ ⴰⵢⴷⴻⴳ ⵛⵉⴽⴽⴻⵏ ⴱⵖⴰⵏ ⴰⴷ ⴳⴻⵏ ⵜⴰⵎⴻⵙⴱⴰⵏⵉⵜ, ⴰⴷ ⴷ-ⴳⵔⴻⵏ ⵢⵉⵎⵙⵓⵍⵜⴰ-ⵏⵏⵉ ⵉⵎⴰⵏ-ⵏⵙⴻⵏ ⵢⴻⵔⵏⴰ ⴰⴷ ⵜⴻⵏ-ⴼⴻⵔⵇⴻⵏ ⵙ ⵍⴳⴰⵣ ⵏ ⵢⵉⵎⴻⵟⵟⴰⵡⴻⵏ, ⵖⴻⴼ ⵍⴻⵃⵙⴰⴱ ⵏ ⵜⴻⵖⴱⵓⵍⴰ-ⴰ.

ⵉⵎⵙⵓⵍⵜⴰ ⵍⴰ ⵜⵜⴰⵣⵣⴰⵍⴻⵏ ⴷⴻⴼⴼⵉⵔ ⵢⵉⵎⴻⵙⴱⴰⵏⵉⵢⴻⵏ ⴰⵔⵎⴰ ⴷ ⵜⵉⵣⴻⵏⵇⴰⵜⵉⵏ ⵜⵉⵎⴻⵥⵢⴰⵏⵉⵏ ⴰⴽⴽ, ⴷⴻⴳ ⵡⴰⴽⵓⴷ ⴰⵢⴷⴻⴳ ⵉⵣⴻⵏⵇⴰⵏ ⵉⵎⴻⵇⵔⴰⵏⴻⵏ ⴰⵜⵏⵉ ⴷⴷⴰⵡ ⵜⵄⴻⵙⵙⴰⵙⵜ ⵉⵊⴻⵀⴷⴻⵏ ⵏ ⵢⵉⵎⵙⵓⵍⵜⴰ, ⵢⴻⵔⵏⴰ ⴼⴻⵔⵙⴻⵏ-ⵜⴻⵏ ⵙⴻⴳ ⵢⵉⵃⴻⴱⴱⴰⵙⴻⵏ-ⵏⵏⵉ ⴰⵢ ⵙⵙⴻⵔⵙⴻⵏ ⵢⵉⵎⴻⵙⴱⴰⵏⵉⵢⴻⵏ.

ⵜⵉⴽⵍⵉ-ⴰ ⵜⴻⵙⵙⴰⵡⴻⴹ ⴰⴷ ⵜⴻⵙⵙⴻⵏⵇⴻⵙ ⵎⵍⵉⵃ ⵜⵉⵎⴻⵙⴱⴰⵏⵉⵢⵉⵏ, ⵉⵎⵉ ⴰⵙⵙ ⵏ ⵍⴰⵕⴻⴱⵄⴰ ⵜⴰⵚⴻⴱⵃⵉⵜ, ⵓⵔ ⴷ-ⵜⴻⵍⵍⵉ ⵓⵍⴰ ⴷ ⵢⵉⵡⴻⵜ ⵏ ⵜⵎⴻⵙⴱⴰⵏⵉⵜ ⵜⴰⵎⴻⵇⵔⴰⵏⵜ, ⵢⵉⵍⵉ ⵜⴰⵎⵓⵔⵜ-ⴰ ⵜⴻⵙⵄⴻⴷⴷⴰ ⵓⴳⴰⵔ ⵏ ⵡⴰⵢⵢⵓⵔ ⴷⴻⴳ ⵛⵛⵡⴰⵍ ⵎⵉ ⴷ-ⴼⴼⵖⴻⵏ ⵍⵖⴰⵛⵉ ⴰⴷ ⴳⴻⵏ ⵜⵉⵎⴻⵙⴱⴰⵏⵉⵢⵉⵏ ⵎⴳⴰⵍ ⵓⵙⴻⵍⵡⴰⵢ ⵒⵉⴻⵔⵔⴻ ⵏⴽⵓⵔⵓⵏⵣⵉⵣⴰ ⴰⵢ ⴷ-ⵢⴻⵙⵙⴻⵔⵙⴻⵏ ⵉⵎⴰⵏ-ⵏⵏⴻⵙ ⵖⴻⵔ ⵜⴻⴼⵔⴰⵏⵉⵏ ⵉ ⵜⵉⴽⴽⴻⵍⵜ ⵜⵉⵙ ⴽⵔⴰⴹⵜ (ⵜⵍⴰⵜⴰ).

ⵙⴻⴳ ⵡⴰⵙⵎⵉ ⴰⵢ ⴷ-ⵢⴻⴼⴼⴻⵖ ⵢⵉⵙⴰⵍⵉ ⴷⴰⴽⴽⴻⵏ ⵎⴰⵙⵙ ⵏⴽⵓⵔⵓⵏⵣⵉⵣⴰ ⵢⴻⴱⵖⴰ ⴰⴷ ⵢⴻⵜⵜⴻⴽⴽⵉ ⴷⴻⴳ ⵜⴻⴼⵔⴰⵏⵉⵏ ⵉ ⵜⵉⴽⴽⴻⵍⵜ ⵜⵉⵙ ⴽⵔⴰⴹⵜ ⴷⴻⴳ ⵜⴳⴰⵔⴰ ⵏ ⵢⴻⴱⵔⵉⵔ, ⵇⵔⵉⴱ ⵢⴰⵍ ⴰⵙⵙ ⵜⵜⵉⵍⵉⵏⵜ-ⴷ ⵜⵎⴻⵙⴱⴰⵏⵉⵢⵉⵏ ⴷⴻⴳ ⵢⵉⵣⴻⵏⵇⴰⵏ ⵏ ⴱⵓⵊⵓⵎⴱⵓⵔⴰ, ⵢⴻⵔⵏⴰ ⵢⴻⵜⵜⵉⵍⵉ-ⴷ ⴷⴰⵖ ⵢⵉⵎⴻⵏⵖⵉ ⴷ ⵢⵉⵎⵙⵓⵍⵜⴰ. ⵓⴳⴰⵔ ⵏ 30 ⵏ ⵢⵉⵎⴷⴰⵏⴻⵏ ⴰⵢ ⵢⴻⵎⵎⵓⵜⴻⵏ ⴷⴻⴳ ⵜⴻⴳⵏⵉⵜ-ⴰ ⵏ ⵛⵛⵡⴰⵍ ⴰⵙⴻⵔⵜⵉ ⴰⵎⴻⵇⵔⴰⵏ, ⵢⴻⵔⵏⴰ ⵜⴰⴳⵏⵉⵜ ⵏ ⵜⵖⴻⵍⵍⵉⵙⵜ (ⵍⴰⵎⴰⵏ) ⵜⴻⵅⵚⴻⵔ ⵎⵍⵉⵃ.

ⴱⵓⵔⵓⵏⴷⵉ ⵜⵡⴻⵅⵅⴻⵔ ⵜⵉⴼⵔⴰⵏⵉⵏ ⵏ ⵓⵎⵏⵉ ⴷ ⵜⵖⵉⵡⴰⵏⵉⵏ ⵙ 10 ⵏ ⵡⵓⵙⵙⴰⵏ ⴷⴷⴰⵡ ⵍⵃⴻⵕⵙ ⵏ ⵓⵎⵖⵉⵡⴰⵏ ⴰⴳⵔⴰⵖⵍⴰⵏ, ⵢⴻⵔⵏⴰ, ⵍⴻⵎⵎⴻⵔ ⴷ ⵍⴻⴱⵖⵉ, ⴰⴷ ⴷ-ⵉⵍⵉⵏⵜ ⴰⵙⵙ ⵏ ⵍⵊⴻⵎⵄⴰ, ⵙⴰⴽⴽⵉⵏ, ⴰⴷ ⴷ-ⴰⵙⴻⵏⵜ ⵜⴻⴼⵔⴰⵏⵉⵏ ⵜⵉⵙⴻⵍⵡⴰⵢⴰⵏⵉⵏ ⴷⴻⴳ ⵡⴰⵙⵙ ⵏ 26 ⵢⵓⵏⵢⵓ, ⵎⴰ ⴷⴻⴳ ⵡⴰⵙⵙ ⵏ 17 ⵢⵓⵍⵢⵓ, ⴷ ⵜⵉⴼⵔⴰⵏⵉⵏ ⵏ ⵓⵙⵉⵏⴰⵜ.

ⴰⵙⵙ ⵏ ⵍⵃⴻⴷⴷ, ⵜⴻⵍⵍⴰ-ⴷ ⵜⵇⴰⵛⵓⵛⵜ ⵏ ⵜⵎⵓⵔⴰ ⵏ ⵜⴻⴼⵔⵉⵇⵜ ⵏ ⵓⴳⵎⵓⴹ ⴷⴻⴳ ⵜⴰⵏⵣⴰⵏⵢⴰ, ⵢⴻⵔⵏⴰ ⵜⵉⵎⵓⵔⴰ ⴰⵢ ⵢⴻⵜⵜⴻⴽⴽⴰⵏ ⴷⴻⴳ ⵜⵇⴰⵛⵓⵛⵜ-ⴰ ⵙⵙⵓⵜⵔⴻⵏⵜ ⴰⴷ ⵜⵜⵡⴰⵡⴻⵅⵅⵔⴻⵏⵜ ⵜⴻⴼⵔⴰⵏⵉⵏ, ⵎⴰ ⵛⵡⵉⵟ, ⴰⵔⵎⴰ ⴷ ⵜⴰⵍⴻⵎⵎⴰⵙⵜ ⵏ ⵢⵓⵍⵢⵓ. ⵜⴰⵙⴻⵇⵇⴰⵎⵓⵜ ⵜⴰⵖⴻⵍⵏⴰⵡⵜ ⵏ ⵜⴻⴼⵔⴰⵏⵉⵏ (ⵛⴻⵏⵉ) ⵜⴻⵙⵙⵓⵎⴻⵔ-ⴷ ⵓⵍⴰ ⴷ ⵏⴻⵜⵜⴰⵜ ⴰⵢⴰ ⵉ ⵜⵙⴻⵍⵡⵉⵜ, ⵎⴰⵛⴰ ⴰⵔ ⴰⵙⵙ-ⴰ, ⵜⴰⵙⴻⵍⵡⵉⵜ ⵡⴻⵔⵄⴰⴷ ⵓⵔ ⴷ-ⵜⴻⵔⵔⵉ ⵍⴻⵅⴱⴰⵔ ⵖⴻⴼ ⵜⴻⵎⵙⴰⵍⵜ-ⴰ.