Asebter amenzawi

Tebda-d temlilit tis 3 n umciweṛ gar Yilibiyen deg Ldzayer

LDZAYER TAMANEƔT – Tebda-d temlilit tis 3 n udiwenni gar Yilibiyen, d tin aydeg ara ttekkin yimḍebbren d yiɣellaten n yikabaren isersiyen d yimeɣnasen ilibiyen ass n laṛebɛa deg Ldzayer Tamaneɣt ddaw leɛnaya n Yiɣlanen Yeddukklen i lmend n ferru n taluft n Libya s ubrid aserti.

Tafagla n urẓam n temlilit-a yesselwi-tt uneɣlaf n tɣawsiwin n Lmeɣreb, n Tdukli tafriqit d Temɣunt taɛṛabt, Abdelkader Messahel, s uḥdaṛ n umazun uzzig n Yiɣlanen Yeddukklen i Libya, Bernardino Leone.

Timlilit-a tis kraḍt (3) deg Ldzayer Tamaneɣt tudef deg ukatar n lmejhud yettkemmilen n Ldzayer akken ad d-tessemlil idisan ilibiyen ɣer umciweṛ akken ad d-taf taluft n Libya tifrat s ubrid n tserti, ladɣa imi anabaḍ d umni n tmurt-a bḍan ɣef sin yerna la ttnaɣen ɣef udabu.

Menɣir timsal yeqqnen ɣer ussebded n unabaḍ n tdukli taɣelnawt, imttekkiyen ad ssiwlen, deg sin-a n wussan ay d-yetteddun, ɣef wayen ay yessefken ad yettweg deg temsalt n tɣellist (laman) d tedyanin tineggura ay d-yellan deg Libya, ɣef wakken ay d-yenna Mass Messahel yiwen wass uqbel temlilit-a.

Attekki deg temlilit-a « d ayen ara d-yawin lateṛ meɣɣren ugar imi ara ilin deg-s wudmawen ilibiyen imaynuten ay yesɛan dduṛ deg unrar », ɣef wakken ay d-yenna uneɣlaf.