Asebter amenzawi

Aseqqamu n Tɣellist n Yiɣlanen Yeddukklen iger-d tiɣri i uḥbas uɛḍil n yimenɣi i uɛawen n medden deg Yaman

NEW YORL (Iɣlanen Yeddukklen) – Aseqqamu n tɣellist n Yiɣlanen Yeddukklen yerna-d taɣect-nnes ɣer teɣri n umaru amatu n Yiɣlanen Yeddukklen, Ban Ki-moon, i lmend n uḥbas n yimenɣi i uɛawen n wid yenḍerren deg Yaman.

Deg yiwet n tseɣrut ay d-yeffɣen ass n ttlata tameddit, 15 n tmura ay yettekkan deg Useqqamu n tɣellist (laman) gren-d tiɣri i « wakk idisan ay terza temsalt ad ssifessen afraq n lemɛawna ay yessefken ad d-yili s tɣawla, deg laman yerna war uguren s ussifses i wid yettɛawanen akken ad awḍen ɣer wid yeḥwajen lemɛawna-a, ladɣa wid yeḥwajen adawi ».

Deg tlemmast n Mayu, yella-d uḥbas uɛḍil n yimenɣi i tallit n 5 n wussan akken ad zemrent tneggiwin n uɛawen ad ferqent lemɛawna.

Yaman yenker deg-s yimenɣi seg wasmi ay d-kecmen yiɣewwaɣen iḥutiyen ɣer tmaneɣt n Ṣenɛa deg Ctembeṛ yerna uẓan-d ɣer temdint n Ɛaden, deg unẓul, dɣa d aya ay iḥettmen aselway Abd Rabbo Mansour Hadi ad yerwel ɣer Tgelda Tasaɛudit.

Tamsisit taɛṛabt yellan ddaw ṛṛay n Tgelda Tasaɛudit, la tekkat tamurt n Yaman s lbumbat seg 26 Meɣres yezrin, akken ad teẓẓeɛ iɣewwaɣen iḥutiyen, yerna tiytiwin-a glant s wugar n 2000 n tmeddurin ɣef leḥsab n kra n yidisan.