Asebter amenzawi

Asenfar n ssuq n tẓuri deg Tlemsan (imḍebber)

TLEMSAN – Imḍebbren n uḥric n yidles la ssefrayen ad d-gen ssuq n tẓuri ara iɛemmṛen yal dduṛt seg wass n 8 Yunyu d asawen deg udeg amezruyan n Lmecwaṛ, deg Tlemsan, i lmend n wass n unaẓur, ɣef wakken ay d-yenna unemhal n Wammas n tẓuriyin d temzikknin n twilayt.

Ssuq-a ad d-yili daɣ d amkan wuɣur ara d-ttemlilin yinaẓuren seg yal ṣṣenf, am wakken ara yerẓem waya abrid i ussejhed n tẓuri d yidles deg Tlemsan, ɣef wakken ay d-yenna unemhal-a i Tnegga n Yisalan n Ldzayer.

Asnulfu n ssuq-a deg umkan amezruyan am Lmecwaṛ d ayen ara yejjen wid iḥemmlen taẓuri d yinaẓuren ad d-ttemlilin, yerna ad yettekki waya deg usduqqes n tẓuri ed yidles.

Asfugel ay d-yetteddun n wass aɣelnaw n unaẓur ad d-yessemlil akk inaẓuren (imasdagen, imseḍra n yisura, isegbaren, imeskenwen, imekla, imẓawanen, atg.) deg yiwen n umkan ireẓmen aydeg ara ilint snat n tqaɛtin aydeg ara zemren yinaẓuren ad d-qeddmen ihanayen-nsen srid sdat yinerzafen.

Isreqqaten, imsunɣen, imeskenwen, imẓawanen d yinaẓuren niḍen ad ttekkin deg tnemsalin sdaxel udeg-nni n Lmecwaṛ neɣ deg uxxam n yidles, akken ad jjen agdud, ladɣa imarayen n tẓuri, ad ssnen inaẓuren neɣ ad zhun d wid ay ḥemmlen yagi.

Asfugel n wass aɣelnaw n unaẓur ad d-yili daɣ d tagnit i wakk inaẓuren d wakk tiẓuriyin n tmaneɣt n Yizeyyaniyen (Tlemsan) ad mmeẓren deg yiwen n wass n usfugel ay werjin d-yelli uqbel, ɣef wakken ay aɣ-d-nnan.