Asebter amenzawi

Tafaska tagraɣlant n Wehṛan n usaru aɛṛab: tebda temsizwert n yisura iwezlanen

WEHṚAN – Timsizwert n yisura iwezlanen tebda ass n lexmis deg tzeɣɣa n tsinimatikt n « Waresnis » deg Wehṛan, deg ukatar n teẓrigt tis 8 n tfaska tagraɣlant n Wehṛan n usaru aɛṛab (FIOFA), yerna i lmend n waya, sɛeddan-d sin n yisura ara yettekkin deg temsizwert-a.

Asaru amezwaru d « Mae wa dam » (Aman d yidammen) n yimseḍru ameṛṛuki Abdelilah El Djohari, ma d wis sin, isem-nnes « El Imara » (limaṛa) n yimseḍru alibi Mouayed Zabtiya.

Ad d-ilin yiskasiyen sdeffir usɛeddi n yisura, yerna ad ḥedṛen deg-sen wudmawen yettwassnen deg tẓeuri, igensasen n ttawilat n yisalan d yimarayen n tẓuri tis 7, ladɣa wid ay iḥemmlen isura iwezlanen.

Timsizzelt n yisura iwezlanen n teẓrigt-a n FIOFA ad ttekkin deg-s 14 n yisura seg 11 n tmura. Ldzayer ad tettekki s 3 n yisura, gar-asen « Nsibi » (Aḍewwal-inu) n Hassan Belaid, « Risala ila Obama » (Tabṛat i Obama) n Mohamed Mohammedi, d « El Mamar » (Azrug) n Anis Djaad.

Isura niḍen seg tmura n Maṣer, Tunes, Beḥṛin, Lubnan, Muriṭanya, Limaṛat taɛṛabin yeddukklen d Falesṭin ara yettekkin s usau n « Aneɣmas ilelli ».

D yiwet n tseqqamut n yinefrayen ara ifernen asaru ara irebḥen, yerna aselway n tseqqamut-a d imseḍru n tliẓri n Ldzayer Mohamed Hazourli. Taseqqamut-a ad ilin deg-s daɣ Ahmed Chawki, d amezɣan amaṣri n ssinima, taneɣmast-tamedyazt Meriem Haidari seg Iṛan, imseḍru d umaru n yisinaṛyuten ameṛṛuki Hassan Benjelloun, d tgensast n ssinima n Usudu aɛṛab n Paris, tasurit Liane Chouaf.